Street Zhurnilida nuri türkelning Uyghurlargha adalet namliq maqalisi élan qilindi

Amérika aliy sotining düshenbe künidiki qarari bilen, güentanamodiki Uyghur mehbuslar mesilisi yéngi bir basquchqa qedem qoydi. Sot perhat huzeyfe dawasidiki qarari arqiliq, Uyghur mehbuslarning güentanamo türmisidin qutulush yolini achti. Emdiki mesile mehbuslarning qeyerge yerlishish mesilisidur. Nöwette Uyghur pa'aliyetchiliri buning üchün herikette. Bügün amérikida chiqidighan wal sitrit zhurnilida élan qilin'ghan Uyghurlargha adalet namliq maqale mana bu heriketlerdin bir parchidur.
Muxbirimiz shöhret hoshur xewiri
2008-06-26
Share

 Maqalining aptori nuri türkel amérika Uyghur jem'iyitining sabiq re'isi. Nöwette washin'gtondiki bir tijariy qanun mulazimet shirkitining adwukati. U maqalisida, güentanamodiki Uyghurlarni amérikigha yerleshtürüshni eng toghra yol dep körsitidu we mundaq yazidu: shundaq, Uyghurlarni amérikigha yerleshtürüsh belgilik qiyinchiliqlarni tughduridu, emma aridin 6 yil ötken bügünki künde ishning toghrisi bu. Aptor yene mundaq yazidu: xitay diplomatik qanalliri arqiliq, 100 din artuq döletning bu mehbuslarni qobul qilishigha tosqunluq qildi. Amérikining qobul qilishighimu naraziliq bildüridighanliqi éniq, emma, amérika bu ishni amérika asasiy qanuni we jinayi ishlar qanuni buyiche xitaygha chüshendürüp béreleydu.

Nuri türkel maqaliside yene, Uyghurlarning amérikiliqlar bilen meyli tarixta, meyli bügün bolsun bir menpe'et toqunushi bolmighanliqini, güentanamodiki Uyghurlarning xitaygha qarshi erkinlik jengchiliri ikenlikini, ularning amérikigha qarita bir tehdit amili bolushning mumkinsizlikini bayan qilidu we mundaq yazidu: amérikida Uyghurlarning siyasiy panahliq tilishi mushu esirning 50 ‏ - yilliri bashlan'ghan. Hazirgha qeder amérikida yashawatqan Uyghurlarning mutleq köp qismi siyasiy panahliq tiligen, ular bügün her qaysi sahediki netijiliri bilen amérika jem'iyitige tohpe qoshuwatidu. Nuri turkel pikrini mundaq dawamlashturidu: biz bilen yeni bügün amérikida yashawatqan Uyghurlar bilen bügün güentanamoda turuwatqan Uyghurlarning arisida birla perq bar, u bolsimu, biz bu yerge ayropilan arqiliq kelduq, ular bolsa tagh atlap keldi, yeni tutulup keldi.

Nuri türkel maqaliside yene, Uyghurlarning ezeldin erkinlik we démokratiyeperwer xelq ikenliki, Uyghurlarning bügünki kürishining aldinqi esirde qurghan milliy we démokratik dölitini eslige keltürüsh ikenlikini shu sewebtin, amérikining nöwette élip bériwatqan diktatorlargha qarshi herikitini Uyghurlarmu qarshi éliwatqanliqini bildürüp ötti.

Biz bügün adwokat nuri türkel bilen güentanamodiki Uyghurlar mesilisining Uyghur dawasidiki orni heqqide pikir igiliduq. Uning qarishiche, güentanamodiki Uyghurlar mesilisi yalghuz on nechche Uyghurning hayatiy bixeterliki mesilisi emes, belki bir milletning musteqilliq dawasining heqqaniyliq mesilisidur.

Güentanamodiki her bir Uyghurning dawasining, bügün amérika sotida bir milletning dawasi süpitide otturigha chiqiwatqanliqini eskertken nuri türkel, bu maqalini yézish meqsiti heqqide mundaq toxtilidu: nuri türkelning qarishiche, güentanamodiki Uyghurlar mesilisi bügün yaxshi bir yönülüshke yüzlendi emma, ularning hayati xep - xeterdin tamamen qutulup bolmidi.

Nuri türkel güentanamodiki Uyghurlar mesilisini, muhajirettiki Uyghur teshkilatliri bilen xitay hökümiti arisida xelq'ara sehnidiki eng keskin bir küresh dep qaraydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet