Obamaning afghanistan istratégiyisi heqqidiki uchurlar
Muxbirimiz weli
2009.11.30
2009.11.30

www.whitehouse.gov Din élindi.
Bu yil 8 - ayda, amérika qisimlirining afghanistandiki générali stenli mék kristal prézidént obamadin, afghanistan'gha yene 40 ming esker köpeytishni telep qilghan idi. Shuningdin buyan obama 'yéngi afghanistan istratégiyisi' heqqide munasiwetlik meslihetchiliri bilen kéngishiwatidu. U eng axiriqi qararini élish üchün, mushu yéqiniqi bir nechche kün ichide yene amérika dölet mejlisiningmu pikrini anglidi.
Obama emdi 12 - ayning 1 - küni (ete) nyuyork shtatidiki west poynt herbiy akadémiyiside yéngi afghanistan istratégiyisni jakarlaydu.
Afghanistanda sekkiz yildin buyan dawamlishiwatqan urushning yönilishini qandaq özgertish kérek?
Amérika awazining bayan qilishiche, obama 11 - ayning 11 - küni amérika dölet bixeterlik kéngishining, afghansitanda esker köpeytish kérekmu? kérek bolsa qandaq qilip sekkiz yildin buyan dawamlishiwatqan bu urushning yönilishini özgertish kérek? dégen mesilide élip barghan axiriqi qétimliq muzakirisini anglighan idi. Bu muzakiride, prézidntning talliwélishi üchün töt xil layihe qoyulghan idi.Eskerni qayerge orunlashturush, qachan chékindürüp chiqish mesilisi 10 qétim muzakire qilindi
11 - Ayning 29 - küni obama chaqirghan kabint yighinida, afghanistanda esker köpeytish mesilisi yene bir qétim muzakire qilindi. Aqsarayning bayanatchisi gébbsning muxbirlarning so'allirigha jawab bergende éytishiche, buningdin burun afghanistan istratégiysi heqiqide 10 qétim muzakire qilin'ghan. Bu muzakirilerde eskerni qayerge orunlashturushla emes, belki qachan chékindürüp chiqish mesilisimu tepsiliy muzakire qilin'ghan. Hazir prézidént obama afghanistan istratégiyisi heqqide qaytidin muzakire qilishni orunlashturmidi. Bu, amérikining hazirqi afghanistan istratégiysi piship yétilgenlikidin dérek béridu.Gébbsning bayan qilishiche, wéytnam urushi mezgilide, amérikining wéytnamda turushluq bash elchixanisida ishligen, hazir amérikining pakistandiki bash elchixanisida ishlewatqan, yillardin buyan bir nechche amérika prézidéntining urush toghrisida alghan qararlirining tepsilatini pishshiq bildighan erbablarmu, amérikining bu qétimqi afghanistan istratigiyisi heqqidiki muzakirilirige yuqiri baha bergen.
2001 - Yili 12 - ayda osama binladinni afghanistanda tutidighan purset qoldin ketküzüp qoyulghan
B b s ning 11 - ayning 29 - küni bayan qilishiche, amérika kéngesh palatasi teyyarlighan doklatta, 'jorji bush hökümiti we uning herbiy qomandanliri 2001 - yili 12 - ayda, osama binladin we bashqa elqa'ide bashliqliri afghanistanning tora - bora taghliridiki öngkürge yushurunup turghanda, yeni pütünley amérika qisimlirining zerbe bérish da'irisi ichide turghanda, ularni tutush üchün esker köpeytish telep qilin'ghan idi. Emma eyni waqitta, bu heqte qarar élish kéchikip qalghanliqi üchün, osama binladin afghansitandin pakistanning qebililer rayonigha qéchip kéliwalghan. Shuning bilen ularni afghanistanda tutidighan purset qoldin ketküzüp qoyulghan' dep körsitilgen.Shuningdin kéyin osama binladin pakistanda, uning qandaq yushurunup yürgenliki heqqidiki uchurlarmu éniq emes
Doklatta bayan qilinishiche, shuningdin kéyin, osama binladin bashqa bir dölette, yeni amérikining ittipaqdéshi bolghan pakistanda, bu, bashqa bir mesile. Emma shuningdin kéyin, hetta osama binladinning pakistan da'iriside qandaq yushurunup yürgenliki yaki hetta bar yaki yoqluqi heqqidiki uchurlarmu éniq emes.Afghanistan qisimlirining küchini ashurush muhim noqta qilinishi kérek
Emdi obama 12 - ayning 1 - küni (ete) nyuyork shtatidiki west poynt herbiy akadémiyiside yéngi afghanistan istratégiyisni jakarlash aldida turghanda, bügün amérika dölet mejlisi ezaliri obamagha yene meslihet berdi. Amérika awazining bayan qilishiche, mishigin shtatidin saylan'ghan amérika kéngesh palata ezasi, amérika kéngesh palatasining herbiy komitét re'isi karl léwin bergen teklipide, afghanistan qisimlirining küchini ashurush muhim noqta qilinishi kéreklikini tekitlidi.Esker ewetidighan jay, del elqa'ichidiler we talibanlar baza quruwélip amérika qisimlirigha hujum qiliwatqan jay bolushi kérek
Jenubiy karolina shitatidin saylan'ghan amérika dölet mejlisining jumhuriyetchi ezasi gréyxem teklipide 'esker ewetidighan orun yer sharidiki bashqa jay emes, del sowét ittipaqi chékinip chiqip ketkendin kéyin, talibanlar igiliwalghan, amérika qisimlirigha hujum qilip 3 mingdin artuq amérika eskirini öltürgen elqa'ichidiler we talibanlarning bazisi bar jay bolushi kérek', 'obamaning jumhuriyetchilerning qollishigha érishish yaki érishelmesliki del mushu noqtida,' dep körsetti.Uchur wastilirining texminlinishiche, obama afghanistan'gha 30 mingdin 35 mingghiche esker köpeytish dégen layihini qobul qilishi we afghanistandiki urush heqqide yéngi istratégiye qollinishi mumkin. Bu qétim ewetilidighan esker ichide amérika déngiz armiyisining 9 ming neper quruqluqta jeng qilidighan eskiri bar, elwette.