Obamaning afghanistan ziyariti heqqidiki oxshimighan köz qarashlar

Bügün uchur wastiliri amérika prézidénti obamaning afghanistan'gha qilghan ziyariti heqqide téximu köp uchurlar we mulahiziler élan qildi. Beziliri obamaning bu qétimqi afghanistan ziyariti térrorchiliqa qarshi urushni qaytidin kücheytmekchi dése, beziliri obama bu qétim asasen xamid karzaygha chiriklikke qarshi turush heqqide bésim ishlitishni meqset qilidu dep qaraydu.
Muxbirimiz weli
2010.03.29
Obama-Karzai-kabulda-sohbette-1-305.jpg 28 - Mart küni, prézidént obama afghanistangha tuyuqsiz ziyaret élip bérip, afghan prézidénti karzay bilen körüshken bolup, bu sürette, ular söhbet üstide.
AFP Photo

Amérika prézidénti barak obama 28‏ - mart (yekshenbe) küni afghanistanni téz sür'et bilen ziyaret qilip 29‏ - mart (düshenbe) küni amérikigha qaytip keldi. Obama bu qétimqi ziyaritide afghanistan prézidénti xamid karzay bilen körüshti. Baghram herbiy bazisida amérika eskerlirige söz qildi.

Bu, obamaning amérika prézidénti bolghandin kéyin tunji qétim afghanistanni ziyaret qilishi bolup hésablinidu. Hazir afghanistanda turuwatqan amérika qisimliri we köp dölet qisimlirining sani 100 mingdin ashidu. Obamaning bu qétimqi afghanistan ziyariti heqqide uchur wastiliri her xil oxshimighan tehlillerni otturigha qoymaqta.

'Elqa'idichiler we ékistérmizmchilerni qalaymiqan qilish, weyran qilish, pachaqlash we ularning panahlinidighan jayigha xatime bérish'

Amérika awazining bayan qilishiche, amérika prézidénti obama yekshenbe küni afghanistanda turghan waqti 6 sa'etke yetmeydu. U mushundaq qisqa waqit ichide, amérikining hawa armiye bazisidin tik uchar bilen kabulgha kélip xamid karzay bilen körüshken. Xamid karzayning dölitini qoghdash üchün körsetken tirishchanliqini medihiyiligen we uni hakimiyet bashqurush iqtidarini yaxshilashqa, bolupmu chiriklikke qarshi turushqa chaqirghan.

Xamid karzay afghanistanning hökümet sistémisini qaytidin qurush üchün baj tölep yardem bériwatqan amérika xelqighe teshekkür éytqan we 5 ‏ - ayda amérikini ziyaret qilidighanliqini bildürgen.

Obama afghanistanda turuwatqan amérika eskerlirige söz qilghanda, afghanistan xelqi amérikining ittipaqdéshi, bu xelq özining bixeterlikini qoghdiyalaydu, dep körsitish bilen birge, amérika qisimlirini afghanistanda qozghilang boluwatqan rayonlarda ghelibe qazinipla qalmay, belki herbiydin xali rayonlardimu shuninggha oxshash ghelibe qazinishqa, bolupmu el -qa'idichiler we talibanlarning rohi dunyasi bolghan qendihar hujumigha teyyarlinishqa chaqirghan.

Obama sözide, 'bizning wezipimiz nahayiti éniq, u bolsimu elqa'idichiler we ékistérmichilerni qalaymiqan qilish, weyran qilish we ularning küchlirining panahlinidighan jayini pachaqlash ' dep körsetken.

Amérika qisimlirini talibanlarning heriket küchini axirlashturushqa chaqirish

Fransiye agéntliqining qarishiche, obamaning bu qétimqi afghanistan ziyariti asasen amérika qisimlirini talibanlarning heriket küchini axirlashturushqa chaqirishtin ibaret.
Talibanlarning qaytidin hakimiyet béshigha chiqiwélishining aldini élish
El -jezire téléwiziyisining qarishiche, obamaning bu qétimqi afghanistan ziyariti zor ehmiyetlik ziyaret, u asasen talibanlarning qaytidin hakimiyet béshigha chiqiwélishining aldini élishni meqset qilidu.

Xamid karzaygha chiriklikke qarshi turush heqqide bésim ishlitish

Awstraliyan géziti, bügün amérika géziti, nyuyork waqti gézitlirining qarishiche, obama bu qétim xamid karzaygha chiriklikke qarshi turush, zeherlik chékimlik etkeschilikige qarshi turush heqqide bésim ishletti, bu afghanistanda jiddiylik peyda qilishi mumkin.

Térrorchiliqqa qarshi urushni kücheytish

Shinxu'a agéntliqining qarishiche, obamaning bu qétimqi ziyariti térrorchiliqqa qarshi urushni kücheytishni meqset qilidu.

'Obamaning bu qétimqi afghanistan ziyariti amérika eskerlirining exlaqini buzidu'

FBIS Uchurlirida bayan qilinishiche, taliban bayanatchisi qari yüsüp exmed tünügün afghanistan islam metbu'atining pishawurdiki pashtoche shöbisi arqiliq 'obamaning bu qétimqi afghanistan ziyariti amérika eskerlirining exlaqini buzidu' dep körsetken.

Obama bu qétim afghanistan ziyariti arqiliq özini mustehkemlimekchi

B b s ning bayan qilishiche, obama bu qétim özi dölet ichide saghlamliq islahatini ilgiri sürgen, xelq'ara da rusiye bilen yadro qoralliri heqqide kélishim tüzüshni ilgiri sürgen ehwal astida afghanistan'gha keldi, u, bu qétimqi ziyariti arqiliq özini mustehkemlimekchi.

Emma hazir afghanistan prézidénti xamid karzay xitay bilen köp xil kélishim tüzüp xitay - afghanistan hemkarliqini bashliwetti. Pakistanmu, xuddi pakistan kishilik hoquq komitéti 28‏ - mart küni bayan qilghandek, pakistanda hazir parlamént bilen edliye tarmaqliri bir -birining gépige kirmeydu, xelq ichidiki majiralarni her qaysi mezhepler, qebililer öz aldigha petiwa chiqirip bir terep qiliwéridu, pakistan hazir hökümetsizlik halakitige qedem basti.
 
Yuqiridiki awaz ulinishidin, bu heqtiki melumatimizning tepsilatini anglaysiler.
 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.