Obamaning se'udi erebistanigha qilidighan ziyariti heqqidiki inkaslar

Se'udi erebistanida chiqidighan"el jezire géziti " ning 2009 - yili 31 - may künidiki sanida, se'udi erebistanliq yazghuchi nasir seramining qelimi bilen bir maqale élan qilin'ghan bolup, maqalide amérika prézidénti barak obamaning ottura sherq döletlirige qilidighan ziyaritining bash békitini se'udi erebistani paytexti riyad shehiri qilip teyinlishidiki sewebler üstide etrapliq pikir yürgüzgen we kishilerning bu heqtiki inkaslirini bayan qilghan.
Muxbirimiz ömerjan toxti
2009.06.02
Obama-dewri-305 Amérikining 44 ‏ - nöwetlik prézidéntliqini tapshuruwalghan barak obama yiraqqa nezer tashlawatqan süretliridin biri.
AFP Photo

Nasir serami maqaliside mundaq dep yazghan:" xelqperwerliki bilen alemche shöhret qazan'ghan amérika prézidénti barak obamaning misir zéminige qedem bésishtin awwal ziyaritining birinchi bikitini se'udi erebistani qilip tallighanliqi heqiqeten aqilane tallash idi. Chünki ottura sherqning tinchliq mesilisi amérika qoshma shtatlirining ehmiyet bérishige erziydighan muhim mu'emma bolup, amérika prézidénti obama pelestin dölitining qurulushi, ottura sherqte omumyüzlük tinchliqning emelge éshishi yolida bar küchini chiqirishta rastinla jiddiy ishlimekte. Xususen ottura sherq mesilisi amérikining tinchliqi üchünmu wastiliq tesir körsitidighan derijige yétip qalghan.

Amérika axbarat menbelirining bayanati

Amérika axbarat menbeliri prézidént obamaning amérika hökümiti üchün ottura sherqte tinchliqni emelge ashurushta bir yengdin qol chiqirip birge ishleydighan shériklerni izdeydighanliqini, ottura sherqning tinchliq ishlirini ene shu shérikler bilen birlikte emelge ashurüshni xalaydighanliqini ochuqlighan.

Amérika menbeliridin obamaning ilgiriki tejribilerdin sawaq alghan halda, pelestin mesilisini ereb döletlirining hemkarliqi bilen hel qilish, pelestin - isra'iliye otturisida terepsizlik bilen ish körüp, pelestin zéminide, bir - birini étirap qilidighan we inaq ötidighan isra'iliye - pelestindin ibaret ikki qoshna döletning dewr sürüshi üchün tirishmaqta ikenliki melum.

Prézidént obamaning tunji ottura sherq ziyariti üchün se'udi erebistanini bash béket qilip tallishining yene bir sewebi se'udi erebistanining xelq'aradiki orni idi. Chünki ottura sherq tinchliqi yolida birinchi qétim liwan paytexti biyrut shehiride "tinchliq teklipi" programmisini otturigha qoyghan kishi se'udi erebistani padishahi abdulla ibni abdul'eziz idi.

Metbu'atlarning inkasliri

Gézitte yene, prézidént obamaning ottura sherq ziyaritide misirni birinchi béket qilishtin ibaret programmisini tuyuqsizla özgertip, awwal se'udi erebistanigha, andin kélidighan peyshenbe kuni misirgha bérishni ixtiyar qilghanliqi heqqidiki inkaslarni bayan qilip, kishilerning her xil tehlilliri we köz qarashlirini neqil qilip keltürgen.

Axirida, amérika aqsaray bayanatchisining :" prézidént obamaning awwal se'udi erebistanigha bérishni ixtiyar qilghanliqi uning kün tertibide se'udi erebistanliq mes'ullar bilen söhbetlishidighan mawzularning barliqi seweblik idi. Obama se'udi erebistanliq mes'ullar bilen tinchliq, térrorluqqa qarshi turush, iranning yadro mesilisi, néfit bahasini belgilesh qatarliq muhim mesililer üstide söhbetlishidu" dégen bayanati neqil qilin'ghan.

Misirning ehra tetqiqat we istratégiye merkizining mudiri doktor jamal abdul jewwad obamaning se'udi erebistanini ottura sherq ziyaritide tunji béket qilip tallishi heqqidiki mulahizisini bayan qilip mundaq dégen:" amérika re'isi obamaning ziyaret programmisigha özgertish kirgüzgenliki uning ziyaritidin kütülgen asasliq meqsetke tesir yetküzmeydu. Se'udi erebistani bilen misir ottura sherqtiki nopuzluq we amérika bilen dostluqini normal derijide dawam qildurup kéliwatqan döletlerdur."


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.