Obamaning salametlik sughurta islahati muhim ötkelni bösüp ötti

Amérikining 44 ‏ - nöwetlik prézidéntliqini tapshuruwalghan barak obama yiraqqa nezer tashlawatqan süretliridin biri.

Amérika prézidénti buni xelqning ghelibisi dédi. Töwende bu heqte muxbirimiz irade tepsili melumat béridu.

Amérika prézidénti barak obamaning eng muhim ish pilanliridin biri dep qariliwatqan salametlik sughurtisi islahat pilani tünügün muhim bir ötkeldin ötti. Yeni amérika kéngesh palatasida 58 démokrat we ikki musteqil ezaning awaz bérishi bilen qanun layihisige da'ir talash - tartishlarni toxtitish toghrisida qarar chiqti.

Buning bilen islahatqa qarshi turuwatqan jumhuriyetchiler qanun layihisining awazgha qoyulushigha tosalghuluq qilalmaydiken. Bu, qanun layihisining muhim bir ötkelni bösüp ötüp, qobul qilinishqa asas sélishi bolup hésablinidiken.

Melum bolushiche, mezkur layihe rozhdéstwo bayrimidin awwal awazgha qoyulidiken.

Amérika prézidénti barak obama qarar chiqqandin kéyin qilghan sözide buni " amérika xelqining ghelibisi" dep atidi we kéngesh palata ezalirigha rehmet éytti.

B b s ning xewirige qarighanda, démokrat eza tom harkin bu heqte toxtulup: "biz bu qanun lahiyisini rozhdéstow bayrimidin awal awazgha qoyumiz. Bu awam palatasining amérika xelqige bayramda qilghan eng yaxshi sowghiti bopqalghusi," dédi.

Dunyadiki bashqa tereqqiy qilghan gherb ellirining eksiche amérika öz puqralirini heqsiz dawalinish sughurtisi bilen teminlimeydu. Amérikida salametlik sughurtisi shexsi shirketler teripidin teminlinidighan bolup, amérikida dawalinish rasxotlirining we sughurta heqlirining yuqiriliqi nahayiti jiddiy bir mesile bopqalghan idi. Jümlidin, eger obama otturigha qoyuwatqan salametlik sughurtisi islahat pilani ishqa kiriship qalsa amérikida shu tapta sughurtisiz yashawatqan 31 milyon amérikiliq sughurtigha érishidu.

Qanun layihiside körsitilishiche, eger qanun yolgha qoyulsa sughurta shirketlirining bahane körsitip késellerni sughurtigha qobul qilishini ret qilishi cheklinidu, yoqsul kishiler dölet yardimi arqiliq sughurtidin behriman bolidu.

Qanun layihisi boyiche yene, 2014 - yilida amérikida dölet sughurtisi berpa qilish arqiliq, shexsi sughurtilarning bahasi kontrol qilinidiken. Buningdin bashqa yene zor kölemlik shirket ishchilirimu choqum sughurtigha eza bolushi kérek iken.

Salametlik sughurta qanunini islahati elwette nurghun munazirilerge duch kelmekte. Jumhuriyetchi ezalarmu mezkur islahatning élip bérilishigha qattiq qarshiliq qilmaqta. Ular bu islahatning döletning xelq üstidiki kontrolluqni ashuruwétidighanliqini, buninggha kétidighan rasxotning kishilerning zimmisidiki baj yükini téximu ashuruwétidighanliqini ilgiri sürmekte. Emma obama bolsa xelqtin bir tiyinmu artuq baj almaydighanliqigha kapaletlik qilidighanliqini éytmaqta.

Biz bundin burun ishligen programmimizda kolombiye unwérsititidiki tibbiy penler doktori memtimin ependi bizning ziyaritimizni qobul qilip, mezkur talash - tartishlargha bolghan chüshenchisini bayan qilip ötken idi. U amérikining hazirqi sughurta séstimisida israpchiliqning intayin éghirliqini, her yili dölet ghezinisi'idin nurghun pulning buninggha chiqip kétiwatqanliqini, shunga obamaning pilanini yolgha qoyghan teqdirde xelqning zimmisidiki yükning artip kétishini éhtimalgha yéqin dep qarimaydighanliqini ipade qilghan idi.
 
Yuqiridiki awaz ulinishidin, bu heqtiki melumatimizning tepsilatini anglaysiler.