Обама америкиниң әлқаидигә қарши урушқа атланғанлиқини җакарлиғандин кейинки тәйвән мәсилиси

Америка президенти обама америкиниң әлқаидигә қарши урушқа атланғанлиқини җакарлиғандин кейинла, америкиниң тәйвән җәмийити шу күни кечидә тәйбейдә, америкиниң тәйвәнгә башқурулидиған бомбидин мудапиә көрүш сестимиси сетип беридиғанлиқини җакарлиған иди.
Мухбиримиз вәли
2010-01-11
Share
Obama-Terror-hujumi-toghrisida-sozde-305.jpg Сүрәт, президент обаманиң роджистива байрими күнидики террорлуқ һуҗумдин кейин, террор мәсилиси тоғрисида нутуқ бериватқан көрүнүши.
www.whitehouse.gov Дин елинди.

Шуниңдин кейин хитай ташқи ишлар министирлики 3 күн ичидә 5 қетим баянат елан қилип, америкиға наразилиқ билдүрди. Тәйвәндә давамлишиватқан оттура мәзгиллик сайламда болса, гоминдаң партийиси наһайити зор мәғлубийәткә учриди. Әмди бүгүн хитай башқурулидиған бомба мудапиә сестимисиға қарши синақ елип барди. Әркин асия радиосиниң обзорчиси, һазир тәйвәндә туруватқан лин бавхуа әпәнди бу һәқтә мулаһизә елан қилди.
 
Америка президенти обама 1 ‏ - айниң 8‏ - күни, америкиниң әлқаидигә қарши урушқа атланғанлиқини җакарлиғандин кейинла, америкиниң тәйвән җәмийити шу күни кечидә тәйбейдә, америкиниң тәйвәнгә башқурулидиған бомбидин мудапиә көрүш сестимиси сетип беридиғанлиқини җакарлиған иди. Мулаһизичиләрниң қаришичә, бу, йеңи вәзийәттә, америкиниң тәйвәнни өзиниң башқурулидиған бомбиға тақабил туруш сестимисиға киргүзгәнликидин дерәк бериду.

Бошүн тор гезитиниң баян қилишичә, тәйвәнниң америкиниң илғар қораллириға игә болуватқанлиқидин хәвәр тапқан хитай буниңға қарита, 3 күн ичидә 5 қетим баянат елан қилип, америкиға наразилиқ билдүрди. Хитай елан қилған бу баянатларниң һәммисидә, америкиниң тәйвәнгә қорал сетишини дәрһал тохтитишни мәқсәт қилди.

Мәркизи агентлиқиниң баян қилишичә, тәйвәндә давамлишиватқан оттура мәзгиллик сайламда, гоминдаң партийиси зор мәғлубийәткә учриди.

Хитайниң шихуа агентлиқиниң баян қилишичә, хитай бүгүн 1‏ - айниң 11 ‏ - күни, чоң қуруқлуқта башқурулидиған бомба сестимисиға қарши туруш сениқи елип барди.

Дуня хитай коммунист партийисини яқтурмайду

-‏ - Тәйвән президенти ма йиңҗю бейҗиңға тәслим болған иди, ‏ -‏- дәйду әркин асия радиосиниң обзорчиси, һазир тәйвәндә туруватқан хитай мәсилилири мутәхәссиси лин бавхуа әпәнди бу һәқтә елан қилған обзорида, -- әмма хитай әлчиси чен йүнлин тәйвәнгә кәлгәндә, тәйвән хәлқи қаттиқ қарши турғанлиқтин вә тәйвәндә давамлишиватқан оттура мәзгиллик сайламда, гомнидаң партийисигә берилгән аваз бәкла азлап кәткәнликтин, ма йиңҗю һәрикитини бир аз астилатти. Бундақ әһвал астида, хитай һәрбий җәһәттин күч көрситиш тактикисини қоллинип, тәйвән хәлқини бесим билән қорқутмақчи болуп, бир туруп америкиға қарши баянат елан қилса, йәнә бир җәһәттин тәйвәнгә қарши башқурулидиған бомба синақ қилди.

Обаманиң хитайға қилған муамилиси юмшақ болғанлиқтин, хитай уни көзигә илмиди, әлқаидиму көзигә илмиди

Лин бавхуа әпәндиниң қаришичә, америка президенти обама хитайға силиқ муамилә қилған иди, у, америка билән хитай оттурисидики дипломатик мунасивәтниң җанлиқ болушини көзлигән әлбәттә. Әмма обаманиң хитайға қилған муамилиси юмшақ болғанлиқтин, хитай уни көзигә илмиди, әлқаидиму уни көзигә илмиди. Хитай вә әлқаидә уни көзгә илмиғансири, һәрхил вәқә көрүлүшкә башлиди, америка хәлқи ичидә, обаманиң абруйи төвәнләп кәтти.

Һазир хитай коммунист партийиси билән дост болувалған башқа дөләт башлиқлириниң инавити чүшүп кәтти

Бундақ әһвал америкидила әмәс, башқа дөләтләрдиму көрүлди. Хитайға йеқинчилиқ қилған японийә баш минситири юкио хатояманиму японийидә қоллайдиған аваз азлап кәтти. Хитайға йеқинчилиқ қилған тәйвән президенти ма йиңҗюниңму тәйвәндә инавити төкүлди.

Демәк, дуня хитай коммунист партийисини яқтурмайду. Шуңлашқа хитай коммуист партийиси билән дост болувалған кишиләрниң инавити чүшүп кәтти.

Хитай коммунист партийиси күчлүктин қорқидиған явашни бозәк қилидиған бир учум лүкчәк

Лин бавхуа әпәндиниң баян қилишичә, америка президенти обама бултур 11‏ - айда хитайни зиярәт қилғанда, америкиниң тәйвән мунасивити қанунини тилға алмиған иди, хитай бу пурсәттин пайдилинип, тәйвәнгә болған бесимни күчәйтш билән биллә, америкини тәйвәнни қоғдаш мәҗбурийитидин ваз кәчтүрмәкчи болди. Хитай коммунист партийиси бир учум лүкчәк. Лүкчәк дегән шундақ, күчлүктин қорқиду, явашни бозәк қилиду.

Хитайда һазир һәрбий офитсерларму дөләт ишлири тоғрисида баян елан қилидиған ғәлитә һадисә пәйда болуп қалди

Лин бавхуа әпәндиниң қаришичә, хәлқара қаидә буйичә, дөләтләр арисидики ишлар тоғрисида дөләтниң ташқи ишлар министирлиқи оттуриға чиқип сөзләйду, һәр ким чиқип өз алдиға қалаймиқан сөзлимәйду. Әмма хитайда һазир ким халиса, чиқип қалаймиқан баянат елан қилидиған һадисә пәйда болуп қалди. Мәсилән, хитайниң ло юән дегән бир генерал маюр дәриҗилик һәрбий офитсери оттуриға чиқип, башқа дөләтләргә қарита баянат елан қилип, бир дәм америкини, бирдәм тәйвәнни тиллап кәтти.

Буниңдин қариғанда, һазир ху җинтав һәрбийләрни башқуралмайдиған яки һәрбийләр мушундақ қаиидисизлик қилиш арқилиқ ху җинтавға, өзиниң сиясий җәһәттә тәсири барлиқини ипадиләп қоймиса болмайдиған һалға чүшүп қалған болса керәк.

Юқиридики аваз улинишидин, бу һәқтики мәлуматимизниң тәпсилатини аңлайсиләр.
 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.