Австралийидики уйғурлар олимпик мәшилигә қарши туруш үчүн камбераға топланди

Олимпик мәшили чаршәнбә күни австралийә пайтәхти канберра әтрапидики бир һәрбий айродромға йетип кәлгәндә мәшәлни канберадики бир австралийә йәрлик қәбилисиниң ақсақили күтүвалди. Канберадики мәшәлни йәткүзүш мурасими пәйшәнбә күни өткүзүлиду.
Мухбиримиз әркин хәвири
2008.04.23

 Мәшәлниң камбераға йетип келиши билән австралийидики уйғур, тибәт вә кишилик һоқуқни яқлиғучи шәхс вә гуруһларниң олимпик мәшилигә қарши туруш һәрикитиниң пәрдиси рәсмий ечилди. Дуня уйғур қурултийиниң австралийә вәкили һүсән һәсән әпәнди канберадики олимпик мәшилигә қарши туруш намайишини тәшкиллигүчи затларниң биридур. У, бу қетимқи намайиш үчүн австралийиниң седний, адалайд шәһиридики нурғун уйғур муһаҗирлар вә мелбурн шәһиридә яшайдиған аз сандики бир қисим уйғурларниң сәпәрвәр қилинғанлиқини, адалайддики уйғурларниң чаршәнбә күни камберада һазир болғанлиқи, седнийдики уйғурларниң әтә әтигән сәһәрдә мәхсус аптобус билән камбераға йетип келидиғанлиқини билдүрди.

Олимпик мәшилигә қарши әң шиддәтлик наразилиқлар ғәрб әллиридә болупму лондон, париж вә сан-франсеско шәһәрлиридә, истанбулда шундақла һиндистанниң йеңи деһли шәһиридә йүз бәргән иди. Алақидар даириләр шиддәтлик наразилиқлар түпәйли нурғун җайларда мәшәлни йәткүзүш мусаписини қисқартиш яки мәшәлниң өтәр йолини өзгәртишкә мәҗбур болди. Олимпик мәшили камбераға йетип келиштин бурун һиндонозийәниң җакарта шәһиридә айландурулған.

Бу йәрдә даириләр олимпик мәшилигә қарши намайишларни чәклигән, мәшәлниң йүрүш мусаписини қисқартқан болсиму, лекин йәнила кичик көләмлик наразилиқларниң йүз беришини тосиялмиди. Пәйшәнбә күни канберадики мурасимда олимпик мәшили йәнә шиддәтлик наразилиққа дуч келиши мумкин.

Хәвәрләргә қариғанда сәйшәнбә күни бир қанчә намайишчи седний портидики чоң көврүкниң шадисиға тибәтни қоллайдиған лозунка асмақчи болғанда , сақчиларниң тутқун қилишиға учриған. Йәнә бәзи намайишчилар шу күни ахшими пиржикторда седний көврүкигә хитайниң тибәттики намайишни бастурғанлиқини әйибләйдиған шуарларни чүшүргән һәм хитай даирилирини далай лама билән сөһбәт өткүзүшкә үндигән. Австралийә мәтбуатлириниң хәвәр қилишичә, пәйшәнбә күни йүз беридиған наразилиққа аз дегәндә 2000 адәм қатнишиши мумкин. Һүсән һәсән әпәнди, уйғур намайишчиларниң әтә олимпик мәшилини өчириветишкә тиришидиғанлиқини билдүрди.

Австралийә һөкүмити олимпик мәшилиниң бихәтәрликини қоғдаш үчүн бәзи җиддий тәдбирләрни алди. Хәвәрләргә қариғанда , даириләр олимпик мәшилини йәткүзүш мусаписини қисқартип, әслидики 20 километир мусапини 16 километирға чүшүргән, мәшәлни тар кочиларда елип йүрүшни чоң кочиларда елип йүрүшкә өзгәрткән шундақла йолниң икки қасниқиға төмүр ришаткиларни йәрләштүргән.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.