Америкида "олимпиктин 9 күн бурун" намлиқ ахбарат елан қилиш йиғини өткүзүлди

Бүгүн йәни 30 ‏ - июл күни америкиниң хәлқаралиқ диний әркинлик комитети, "олимпиктин 9 күн бурун" намида ахбарат елан қилиш йиғини өткүзди. Йиғинда америкиниң инсан һәқлири хизмитигә мәсул палата әзалири вә америкида паалийәт елип бериватқан инсан һәқлири паалийәтчилири қатнашти.
Мухбиримиз шөһрәт һошур хәвири
2008-07-30
Share

 Йиғинда, тибәт, уйғур вә фалунгуң муритлириниң изчил зәрбигә учрап келиватқанлиқи тәкитлинип, хитай һөкүмити, инсан һәқлири мәсилисидә йәнә бир қетим агаһландурулди.

Йиғинда америка палата әзалиридин Sheila Jackson Lee ханим сөз қилип мундақ дәйду: мән узун йиллиқ инсан һәқлири паалийәтчиси, мән хитайниң инсан һәқлири вәзийитидин әндишә қилимән. Мән бу пурсәттә, хитайниң олимпик өткүзүшини қоллайдиғанлиқимни билдүрүш билән биллә, хитайниң өз дөлитидә вә дөләт сиртида инсан һәқлиригә һөрмәт қилишини үмид қилимән.

Йиғинда сөз қилған кеңәш палата әзаси Chsitopher Smith, мундақ дәйду: "хитай олимпик вәдисидә турмиди. Олимпикқа 9 күн қалған мушу күнләрдиму, тибәтлик раһиблар, уйғур мусулманлар, фалунгуң вә христиан муритлири йәнила зулум чекиватиду. Зулум башқа сәвәбтин әмәс, пәқәтла олимпик сәвәбидин."

Бүгүнки йиғинға уйғур миллий һәрикитиниң рәһбири рабийә қадир ханим, хитай демокиратчилиридин яң җйәнли қатарлиқ бир түркүм хитайға қарши өктичи рәһбәрләр қатнашти вә йиғинда сөз қилди. яң җйәнли сөзидә мундақ дәйду: "тарих шуни испатлидики, күчини хәлқтин алмиған, хәлқниң ирадисигә таянмиған бир һөкүмәт дунявий лидер болалмайду." яң җйәнли бу сөзлири арқилиқ, хитай һөкүмити өз дөлити ичидә хәлқигә вәкиллик қилалмиғини үчүн, хәлқаралиқ мәсилиләрдә, җүмлидин судан вә берма мәсилисидә хәлқниң ирадисигә әмәс, диктаторларниң ирадисигә вәкиллик қиливатқанлиқини әскәрткән.

Яң җйәнли сөзидә йәнә, хитай демократик бир дөләт болмиғанлиқи үчүнла, хитайдики аз санлиқ милләтләрниң вә диний гуруппиларниң зулумға учраватқанлиқини, ахбарат әркинлики вә ипадә әркинликиниң боғулуватқанлиқини, хитайда демократик бир һакимийәт тикләнгән тәқдирдә бу мәсилиләрниң өзлүкидин һәл болидиғанлиқини билдүргән. яң җйәнли хитайниң шәндуң өлкисидә туғулған, бейҗиң университетида оқуған, 1986 ‏ - йилидин башлап америкида оқуш, илмий тәтқиқат вә сиясий паалийәт билән шуғулланған. 2002 ‏ - Йили хитайға қайтип, йәр асти партийә қурғанлиқи үчүн қолға елинған. У, 2007 ‏ - йили америка дөләт мәҗлиси, б д т ниң алақидар қарарлири билән түрмидин қоюп берилгән. яң җйәнли нөвәттә америкидики нопузлуқ кишилик һоқуқ паалийәтчиси, шундақла уйғур миллий һәрикитиниң қоллиғучисидур.

Йиғинда йәнә, америка хәлқара диний әркинлик комитетиниң башлиқи Felice D. Gaer Сөз қилип мундақ дәйду: " әслидә биз олимпик сәвәбидин хитайниң инсан һәқлири вәзийитидә сәкрәш характерлик илгириләш болушини күткән идуқ, ундақ болмиди, әксичә, вәзийәт техиму яманлашти, болупму диний затларға зулум техиму еғирлашти.

Йиғинда у президент бушқа хитап қилип, хитайға барғинида, диний әркинлик мәсилисини оттуриға қоюшни вә америкиниң бу мәйданини хитайға билдүрүшни тәләп қилди. Андин хитай һөкүмитигә хитап қилип бир қанчә түрлүк тәклип пикир оттуриға қойди. Бу тәклип пикирләр, уйғур миллий һәрикитиниң рәһбири рабийә қадир ханимниң түрмидики икки оғлини қоюп бериш, уйғур сиясий өктичилиригә қарита бастурушни тохтитиш; тибәтлик раһибларға қарита вәтәнпәрвәрлик тәрбийисини тохтитиш; далай лама билән хитай мәркизи һөкүмити бивастә сөһбәт өткүзүш қатарлиқ мәзмунларни өз ичигә алиду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт