Өлүм җазасиға һөкүм қилинған парихор әмәлдар: 'хитай түзүлмиси чирикликниң мәнбәси' деди

Хитай һөкүмити, чуңчиң шәһәрлик әдлийә идарисиниң башлиқи вен чяңни парихорлуқ җинайити билән әйибләп, униң өлүмгә һөкүм қилинғанлиқини җакарлиғандин кейин, хитай мәтбуатлирида парихор әмәлдар вен чяңниң өлүм алдидики һес - туйғулири йезилған очуқ хети елан қилинған.
Мухбиримиз миһрибан
2010-05-03
Share

Вен чяң хетидә, "хитай коммунист һөкүмитиниң нөвәттики түзүлмиси, әмәлдарларниң чириклишишидики һәқиқий мәнбә" дегән.
Хитай коммунист һөкүмитиниң нөвәттики түзүлмиси, әмәлдарларниң чириклишишидики һәқиқий мәнбә
Мәлум болушичә, бу хәт елан қилинған тор бекәтлири 10 нәччә миңға йәткән. Һазирғичә хитай тор бәтлиридә, гәрчә бу очуқ хәтниң өлүмгә һөкүм қилинған вен чяңниң өз қоли билән язғанлиқиға қарита талаш - тартишлар болған болсиму, әмма хәттә дейилгән гәпләрниң өлүмгә һөкүм қилинған чирикләшкән хитай әмәлдариниң өлүм алдидики раст сөзи икәнлики җәзимләштүрүлмәктә.

Вен чяң хетидә, өзиниң өлүмгә һөкүм қилинғанлиқиға қайил болмиғанлиқини, чүнки өзигә охшаш чирикләшкән әмәлдарларниң хитайниң һәр қандақ йеридин тепилидиғанлиқини, өзиниң тәлийи каж келип бу қисмәткә қалғанлиқини һесабқа алмиғанда, чириклишип бу дәриҗигә йетишигә, әмәлийәттә хитай һөкүмитиниң нөвәттә йүргүзүватқан сиясити һәм дөләт түзүлмиси сәвәбкар болуватқанлиқини, шуңа әйибләш тоғра кәлсә алди билән әмәлдарларниң чириклишишигә йол ечип бәргән хитай коммунист һөкүмитини әйибләш керәкликини баян қилған.

"Мән өз адәмлиримниң қолида өлидиған болдум"

Вен чяң очуқ хетидә, өзиниң өлүмгә һөкүм қилинишини ойлап бақмиғанлиқини мундақ баян қилған: "мән бир өмүр қанун орунлирида ишлидим, нурғун делоларни бир тәрәп қилдим, нурғун адәмләрни өлүмгә һөкүм қилдим, әсли көңлүмдә күнләрниң биридә, өзүм өлүмгә һөкүм қилған ашу кишиләрниң уруқ - туғқанлири тәрипидин қәстләп өлтүрүлүшим мумкин дәп пәрәз қилған идим, әмма бүгүн өз адәмлирим тәрипидин өлүмгә һөкүм қилиндим, мән бу ақивәтни ойлимиған идим."

"Мәндәк бир әмәлдарни өлтүрүш биләнла мәсилә һәл болмайду!"

Вен чяң хетидә өзигә охшаш әмәлдарларниң хитайда нурғунлиқини, өзини өлтүрүш биләнла хитайдики парихорлуқ, чирикликниң тохтап қалмайдиғанлиқини мундақ баян қилиду: "һәммәйлән мени нурғун пулни пара алди, нурғунлиған қиз - аялларни дәпсәндә қилди дәп әйибләшмәктә. Мән буларни инкар қилмаймән, әмма мениң демәкчи болғиним, һәр қандақ бир адәмни мениң хизмәт орнумға қойса у киши парихорлуқ қилиду, ашна ойнайду, қимар ойнайду, һәтта чирикликтә мәндинму ешип кетиши мумкин. Һазирқи шараитта әгәр бир әмәлдар парихорлуқ қилмиса, чирикләшмисә, сиз ишинәмсиз? у киши хизмәтни қанчә яхши ишлигини биләнму, ундақ кишиниң етибари болмайду. Шуңа бу хил түзүмла болидикән, әмәлдарлар пара алиду, пара бериду. Мәндәк бир әмәлдарни өлтүрүш биләнла мәсилини һәл қилғили болаттиму?"

"Мениң чириклишишимгә бу түзүм, бу җәмийәт җавабкар!"

Вен чяң өзиниң яхши аилә тәрбийиси алғанлиқини, униң бу һалға чүшүп қелишиға һазирқи түзүм һәм җәмийәт сәвәб болғанлиқини мундақ баян қилиду: " кичикимдә мән әркә өсмигән идим, анам маңа яхши адәм болуш, башқиларға зиян салмаслиқ һәққидә тәрбийә қилатти, у даим илгирики гоминдаң әмәлдарлириниң хәлқни қақшатқанлиқи үчүн ағдурулғанлиқини һекайә қилип берәтти. Мана қараңлар, һазирқи әмәлдарлар гоминдаң дәвридикидин нәччә һәссә әскилишип кәтти. Мән пәқәт уларниң ичидики бирила халас! мән гәрчә чирикликтә әйибләнгән болсамму, лекин хәлқ үчүн қилған яхши ишлиримму аз әмәс, мән һәр һалда хәлқ мәнпәәтини һечқачан ойлимайдиған башқа әмәлдарлардин көп пакмән. Мени мушундақ һалға чүшүрүп қойғини, һазирқи түзүм, мушу җәмийәт."

"Ваң лечүән қатарлиқларниң чириклик қилмиши техиму еғир!"

Хоңкоңда чиқидиған "шәпә" журнилиниң баш муһәррири җаң вейго әпәнди зияритимизни қобул қилип, техи йеқиндила тәхиттин чүшкән уйғур аптоном райониниң сабиқ партком секретари ваң лечүәнниң чириклик қилмишиниң вен чяңдин нәччә һәссә еғирлиқини баян қилип мундақ деди: " мениңчә, ваң лечүәнниң чириклики хитайдики һәр қандақ бир әмәлдарға селиштурғандиму еғир. Әмма хитай коммунист һөкүмити уйғур аптоном райониниң муқимлиқи, райондики уйғурларниң демократик һәрикәтлирини бастуруш үчүн, ваң лечүәнгә нисбәтән хәлқниң наразилиқи шунчә күчлүк болсиму, уни 20 йилғичә җазалимиди. Мана әмди униң йөткәлгәнликини елан қилди. Әмма уни җазалайдиғанлиқи һәққидә һазирғичә бирәр шәпә йоқ."

"Хитай коммунист һакимийитила болидикән, хитайдики чириклик йоқалмайду"

Җаң вейго әпәнди сөзидә, хитайниң нөвәттики һакимийитиниң өз әмәлдарлириниң чириклишишигә йол қоюш арқилиқла мәвҗут болуп туруватқанлиқини оттуриға қойди.
 
"Хитайда әмәлдарларниң парихорлуқ қилиши, чириклишиши һазир омумий кәйпиятқа айланди. Нөвәттики хитай коммунист һөкүмити хитай әмәлдарлириниң чириклишишигә йол қоюш арқилиқла, демократийә вә әркинликкә интиливатқан пуқраларниң наразилиқ һәрикәтлирини бастуруп, өз һакимийитини сақлап қеливатиду. Шуңа хитайда коммунист һакимийәт мәвҗутла болидикән, хитайдики чириклик йоқалмайду."

Юқиридики аваз улинишидин, бу һәқтики мәлуматимизниң тәпсилатини аңлайсиләр.


 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт