Pakistan ichki ishlar ministirliqi ömer Uyghur wexpining aliy sotqa sun'ghan erzige jawab qayturdi

Buning bilen mezkur teshkilat mes'ulliri ichki ishlar ministirliqi üstidin pakistan aliy sotigha erz sun'ghan idi. Qanuniy tertip boyiche, yéqinda mezkur ministirliq, mezkur erzge qarita aliy sotqa jawab yollighan. Ministirliq jawabida, ömer Uyghur wexpining pakistan dölitige qarshi pa'aliyet bilen shughullan'ghanliqining we teshkilat mes'ullirining amérikigha qéchishni pilanlighanliqining bayqalghanliqini, shuning üchün ularning chégradin chiqishigha cheklime qoyghanliqini bayan qilghan. Ministirliq sottin mezkur erzni bikar qilish bilen birlikte dewagerlerni jazalashni telep qilghan.

Yéqinda pakistan aliy sot mehkimisi, ömer Uyghur wexpining mes'ullirigha, pakistan ichki ishlar ministirliqining dawagha qarita jawabini qisqiche xulasilep yollap bergen. Sotning bu qeghizi in'glizche teyyarlan'ghan bolup, bu xet töwendiki mezmunlarni öz ichige alghan:

RFA/Shohret Hoshur

A. Dewager: muhemmed ömer xan, muhemmed ekber xan
B. Jawabkar: pakistan ichki ishlar ministirliqi

Jawabkarning chüshendürüshi:

1. Ismi tilgha élin'ghan dewagerlerning döletke qarshi pa'aliyetler bilen shughullan'ghanliqi hem pat yéqinda amérikigha qéchishni pilanlighanliqi bayqalghanliqi üchün, bixeterlik tarmaqlirimizning telipige asasen, chégradin chiqishini cheklesh tizimlikige kirgüzüldi.
   
2. Ichki ishlar ministirliqimiz qanuniy tertip boyiche barliq tekshürüshlerni élip bérip, dewagerlerni 2011-yili 2-ayning 19-künidin bashlap, chégradin chiqishtin cheklidi.
   
3. Yuqiriqi pikirge asasen, aliy sotning mezkur dawani inawetsiz qilishini we dewagerlerni jazalishini ümid qilimiz.
   

Ömer Uyghur wexpining bashliqi we dewager ömerjan bu toghrisida oz pikirlirini bildürdi. Ömerjan pikrining axirida eger ichki ishlar ministirliqi özlirini xitaygha qarshi heriketler bilen eyibligen bolsa, buningdin pexirlinidighanliqini, emma, döliti pakistan'gha qarshi eyibligini üchün weqedin epsuslan'ghanliqini bildürdi. Emma u yene aliy sotning axiri toghra qararni béridighanliqigha ishinidighanliqinimu eskertip ötti.

Ömer Uyghur wexpining terkibide aktip pa'aliyet élip bériwatqan yashlardin biri, abduqéyim shemshidindur. Abduqéyim ichki ishlar ministirliqining aliy sotqa bergen jawabida heqiqiy ehwalni yoshurghanliqini otturigha qoydi. Uning bildürüshiche, ularning qara tizimlikke kirgüzülüshide xitay hökümitining telipi, bésimi muhim rol oynighan. Emma ichki ishlar ministirliqi, ömer Uyghur wexpini pakistan'gha qarshi heriket qilish we amérikigha qéchishni pilanlash bilen eyiblep, weqening esli mahiyitini yoshurghan.

Tepsilatini yuqiridiki awaz ulinishidin anglighaysiler.