Rusiye jiddiy ishlar ministiri, général armiye shoygu: tuwalar Uyghurlarning tuwada qalghan qérindashliri


2008.03.10

Yéqinda rusiye jiddiy ishlar ministiri, général armiye sérgéy shoygu qazaqistan paytexti astanagha kélip, qazaqistan jumhuriyetlik Uyghur medeniyet merkizining re'isi exmetjan shardinof, doktor abliz abdullayéw bashliq besh kishilik bir wekiller ömikini qobul qilip, ular bilen tuwalar bilen Uyghurlar arisidiki medeniyet alaqiliri jümlidin tüwadiki qedimki Uyghur qel'esini eslige keltürüsh pilani boyiche hemkarliq mesililiri boyiche muzakire élip barghan.

Tuwa millitidin bolghan rusiyining général armiye herbiy unwanidiki ministiri sérgéy shoygu sözide özining Uyghurlargha alahide qiziqidighanliqi, tuwa bilen Uyghurlarning qedimiy medeniyet baghlinishi barliqini eskertken.

Ötken yili rusiye jiddiy ishlar ministiri, général armiye sérgéy shoyguning bashlamchiliqida rusiyining sibiriye rayonidiki tuwa jumhuriyitining tére xöl dep atalghan jayigha jaylashqan miladi 8 - esirdiki Uyghur qaghani moyunchurning qel'esi por - bajinni eslige keltürüsh hemde u jayda arxé'ologiyilik tekshürüsh élip bérish xizmiti bashlan'ghan bolup, buninggha moskwa, qazan, sanktpétérburg qatarliq sheherlerning alimliri ishtirak qilghandin sirt yene mexsus bir fond hem meslihetchiler komitéti qurulup, uninggha rusiye dölet dumasining re'isi gliznof, rusiye ichki ishlar ministiri nurghaliyéw, bixeterlik idarisining bashliqi patrushéw, moskwa sheher bashliqi lushkow hem tataristan jumhuriyitining prézidénti shemiyéw we bashqa bir qisim yuqiri derijilik rusiye dölet rehberliri we bay-karxanichilar qatnashqan idi.

Ötken heptide ministir shoygu qazaqistan paytexti astanagha kelgende qazaqistan Uyghur medeniyet merkizi wekilliri bilen körüshken bolup, söhbetke ishtirak qilghan doktor abliz abdullayéw téléfon ziyaritimizni qobul qildi.

Yuqiridiki ulinishtin, siler öz muxbirimiz ümidwarning sérgéy shoygu bilen bolghan mezkur uchrishishqa qatnashqan, qazaqistan jumhuriyetlik medeniyet ittipaqining alimlar kéngishining mes'uli doktor abliz abdullayéw ependi bilen mezkur uchrishishning mezmunliri heqqide ötküzgen söhbitini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.