Osloda Uyghur meschiti quruldi

Norwégiyidiki Uyghur jama'iti norwégiye dölitining bu dölettiki herxil dinlargha étiqad qilghuchi millet we guruppilargha yaritip bergen iqtisadiy ewzellikliridin paydilinip, oslo shehiride bir Uyghur jamesi échishni arzu qilip kelgen idi.

Uyghurlarning téximu uyushushini ishqa ashurush, bolupmu ösüp yétiliwatqan yash-ösmürlerge Uyghur ana tili, medeniyiti we islam étiqadini ögitish üchün yaxshi shara'it hazirlap bérish meschit qurushning eng muhim nishanliridin biri bolghan idi. Netijide birqanche yilliq tirishchanliqlar arqiliq, dölettin muqim bérilidighan iqtisadiy yardem qolgha keltürülüp, bu arzu axiri ré'alliqqa aylinip, 10-noyabir küni norwégiyidiki Uyghurlar özlirining Uyghur jamesining échilghanliqini tebriklidi.

RFA/Aygul

Murasim qur'an tilawet bilen bashlandi.

Qira'et axirlashqandin kéyin “Uyghur islam medeniyet merkizi” ning qanuni wakaletchisi semet abla ependi murasimgha yétekchilik qildi we jamening échilish munasiwiti bilen tebrik sözi qildi.

Semet abla ependi yene köpchilikke Uyghur islam medeniyet merkizining qurulush jeryani, ezalarning sani,dölettin bérilgen pul we bundin kéyin diqqet qilishqa tégishlik munasiwetlik qa'ide-nizamlarni qisqa chüshendürüp ötkendin kéyin bu xeyrlik ishning wujudqa chiqishi üchün küch chiqarghan, yardemde bolghan kishilerge birmu-bir ismini atap turup rehmet éytti.

Yighin küntertipi boyiche jamening imami atawulla qarim we telim-terbiye ishlirigha mes'ul xadimi turghunjan qarimlar söz qildi.

Tebriklesh murasimida yurt aqsaqalliri, jama'et wekillirimu tebrik sözi sözlidi.

Mexmut ependi ziyaritimizni qobul qilip, bu jamening échilishining norwégiyidiki Uyghurlar üchün intayin katta ish bolghanliqi we buning üchün özining köp teshekkür éytidighanliqini bildürdi.

Turghunjan qarim ziyaritimizni ayrim qobul qilip, jamening norwégiyidiki Uyghurlar üchün élip kélidighan yaxshiliqliri heqqide toxtaldi we jama'etni qolgha kelgen bu ewzellikning qedrini bilish hem buningdin ünümlük paydilinishqa chaqirdi.

Uyghur, türk we bashqa millet kishiliri qatnashqan bu murasim besh sa'et etrapida dawamliship kechqurun sa'et 17:00 lerde xeyrlik axirlashti.