Шветсийидики путбол мусабиқисидә хитай гуруппа башлиқи көкбайраққа қарши сақчи чақирди

Уйғур командисини елип кәлгән хитай команда вә гуруппа башлиқлириниң ахбаратқа бәргән ғәйрий нормал баянлири вә сақчиларға қойған ғәйрий нормал тәләплири кишиләрни һәйран қалдурған.
Мухбиримиз шөһрәт һошур
2012.07.24
shwetsiye-axbarat-uyghur-osmur-putbol--305.jpg Шветсийә мәтбуатлирида бесилған уйғур өсмүрләрниң путбол маһарити вә тамашибинлар саһәсидә ләпилдигән шәрқи түркистан байриқи һәққидики хәвәр. 2012-Йили июл.
RFA/Shohret Hoshur

Шветсийидә өткүзүлгән хәлқара яшлар-өсмүрләр путбол мусабиқиси 22‏-июл күни ахирлашти. Бир һәптә давамлашқан мусабиқидә, ғулҗа турпанйүзидин кәлгән үмид командиси шветсийиниң үч командиси, германийиниң бир командиси вә гиритсйиниң бир командиси болуп җәмий 5 командини йәңгән. 6-Рәқиби қибрис(сипрус) командиси билән чүшкәндә наһайити аз бир пәрқ билән йеңилип, һәл қилғуч мусабиқигә қатнишалмиған.Шветсийидә хәлқара яшлар-өсмүрләр путбол мусабиқисигә қатнашқан уйғур балилар. 2012-Йили июл.

Уйғур путболчилар мусабиқә давамида өзлириниң маһаритидин башқа йәнә, хитайдин алаһидә пәрқлинип туридиған чирайи биләнму тамашибинларниң диққитини тартқан. Хитайларға һеч охшимайдиған бу балиларниң қандақ қилип хитай командисида болуп қалғанлиқи тамашибинларға сирлиқ туюлған. Бу сирни тамашибинлар сепидики уйғур паалийәтчиләр қоллиридики ай юлтузлуқ көк байрақ вә мухбирларға бәргән баянатлири билән йешип бәргән. Уйғур путболчиларниң майкисиға йоған һәҗимдә чүшүрүлгән хитайниң бәш юлтузлуқ қизил байриқи бу балиларниң әсли миллий кимликини йошурушқа қурби йәтмигән. Мәлум болушичә, хитай команда башлиқи, тамашибинларниң үмид командисидики путболчиларниң миллий кимлики һәққидики соалға “булар җуңголуқларға охшимайдиған, җуңго пуқралири” дәп җаваб бәргән.

Болупму, хитай команда башлиқиниң шәрқи түркистан байриқини көтүрүвалған уйғур паалийәтчиләр һәққидә тохтилип “әгәр булар җуңгода болған болса террорчи дәп қарилатти вә бу чаққа җазалинип болатти” дегән сөзлири кишиләрни һәйран қалдурған. Хитай команда башлиқи йәнә, мәйданда шәрқи түркистан байриқиниң ләпилдишини тосуш үчүн сақчи чақирған вә уйғур паалийәтчиләр үстидин шикайәт қилған. Мәйданға йетип кәлгән сақчилар, уйғур паалийәтчиләрниң қолида байрақтин башқа нәрсә йоқлуқини көргәндин кейин, хитайниң наразилиқиға писәнт қилмиған. Әксичә уйғур паалийәтчилирини қоллап риғбәтләндүргән.

Юқириқи мәлуматлардин қариғанда, бир түркүм хитай пуқралириниң һәтта, дөләт һакимийитидә вәзипә өтәватқан бир қисим кишиләрниң, бүгүн дуняда омумлашқан әң әқәллий инсаний һәқләрдин, явропадики әң омуми қиммәт қарашлардин хәвәрсизлики, бу сәвәбтин чәтәл сәпәрлиридә күлкилик вә һәҗвий қилиқлардин сақлиналмайватқанлиқи мәлум болмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.