UAA Pakistanning 9 Uyghurni xitaygha qayturushigha naraziliq bildürdi

Amérika Uyghur birleshmisi bügün bayanat élan qilip, pakistanning 9 neper Uyghurni xitaygha qayturup bergenlikige naraziliq bildürdi. Teshkilat bayanatida, pakistanning iqtisadiy menpe'etini közde tutup, xelq'ara qanunni depsende qilghanliqini eyiblidi.
Muxbirimiz shöhret hoshur
2009-04-29
Share
xu-zardari-beyjingda-305.jpg 15 - Öktebir, xitayni ziyaret qiliwatqan pakistan prézidénti asif zardari bilen xu jintaw, xitay hörmet qarawullirining aldida.
AFP Photo

Amérika Uyghur birleshmisi, xitayning atalmish "3 xil küchler" ge qarshi zerbe bérish heriketliri bilen Uyghur yashlirini chet'elge chiqip panahlinish we chet'elde pa'aliyet élip bérishqa mejburlighanliqini, shangxey hemkarliq guruhining yolsiz shertnamiliri, Uyghur pa'aliyetchilirini ziyankeshlikke uchritiwatqanliqini, shunga xelq'ara jama'etning xitaygha qayturulghan 9 neper Uyghurning teqdirini yéqindin közitishini telep qildi.

Mezkur teshkilat bayanatida, bundin ilgiri pakistandin qayturulghan isma'il semet qatarliq pa'aliyetchilerning ölümge buyrulghanliqini, osman elixan qatarliqlarning teqdirining hazirghiche melum emeslikini eskertip, mezkur 9 Uyghurning sotlinish jeryanining axbaratqa ochuq we xelq'ara qanuniy tertipler buyiche élip bérilishi üchün alaqidar xelq'ara jem'iyetlerni heriketke chaqirdi.

Uyghur teshkilatliri arqa - arqidin weqege qarita naraziliqini ipadilewatqan peytte, Uyghur jama'iti arisida weqe heqqidiki mulahizilermu dawam qilmaqta.

Pakistan metbu'atlirida ashkarilinishiche, xitay ikki yilning aldida pakistan hökümitige 170 neper Uyghurning tizimlikini sunup, ularni xitaygha qayturup bérishni telep qilghan. Pakistan hökümiti Uyghur pa'aliyetchilirini xitaygha qayturushta her waqit yeng ichi sodisi qilmaqta we weqeni mumkin qeder xelq'ara jama'ettin yoshurun élip barmaqta.

Nöwette pakistandiki qebililer rayonining 9 neper Uyghurning xitaygha qayturulishida mes'uliyiti bar - yoqluqi Uyghur közetküchiler arisida oylishiliwatqan bir mesilidur.

Bügün pakistandiki bir türküm Uyghur yashliri radi'omizgha téléfon qilip, 9 Uyghurning pakistan'gha qayturulushining mes'uliyiti mesiliside, pakistan hökümiti bilen pakistan xelqining ayrim qarilishi kéreklikini bildürdi.

Bu yash yene, pakistan we turkiy jumhuriyetlerning siyasitide choqum özgirish bolidighanliqini, bu jaylarda xelqqe wekillik qilidighan partiyilerning hakimiyet béshigha kélishi bilen, Uyghur siyasitidiki xataliqlirini tüzitidighanliqigha ümid bilen qaraydighanliqini bildürdi.

9 Uyghurning xitaygha qayturulghanliqi heqqidiki inkaslar Uyghur tor betliridimu dawam qilmaqta. Kökbayraq torida yézilghan bir inkasta, xitay - pakistan hemkarliqigha oxshash gheyriy insany hemkarliqlarning Uyghur musteqilchilirining iradisini sunduralmaydighanliqi, weten - millet üchün taqqa chiqqan yashlarning buningdinmu éghir bedellerge teyyar ikenliki bildürülgen.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet