Пакистандики парихорлуқ вә һәрбий исрапчилиққа қарши ачлиқ елан қилиш һәрикитидә уйғур паалийәтчиләрму орун алди

Пакистандики раҗа җиһангир әхтәр исимлик бир аммиви паалийәтчи, мушу айниң 12-күнидин 21-күнигичә, исламабадда ачлиқ елан қилип, пакистандики һөкүмәт, ахбарат вә җамаәтләрниң диққәт мәзкизигә айланған иди.
Мухбиримиз шөһрәт һошур
2011.09.28
pakistan-parixorluq-305.jpg Пакистандики парихорлуқ вә һәрбий исрапчилиққа қарши ачлиқ елан қилиш һәрикитидә уйғур паалийәтчиләрму қатнашти. 2011-Йили сентәбир.
RFA/Shohret Hoshur

Парихорлуқ вә һәрбий исрапчилиққа қарши елип берилған бу ачлиқ елан қилиш һәрикитигә, равалпиндидики өмәр уйғур вәхпиму иштрак қилди. Паалийәткә миллий кийимлири билән келип қатнашқан уйғур паалийәтчиләр, 10 күн җәрянида уйғур вә уйғур мәсилисини пакистан хәлқигә йәнә бир қетим тонуштуруш пурситигә игә болди.

Мәзкур ачлиқ елан қилиш һәрикитини, пешқәдәм аммиви паалийәтчи раҗа җиһангир әхтәр әпәнди башлиған. У ачлиқ елан қилиш баянатида пакистан парламентида мәхсус парихорлуққа қарши қанун мақуллинишини вә һөкүмәтниң һәрбий хираҗәтни азайтип һиндистан билән болған мунасивәтни яхшилашни, бу арқилиқ пакистан җәмийитидә параванлиқ ишлирини йүксәлдүрүшни тәләп қилған. Бу тәләпләр пакистандики уйғур паалийәтчиләрниң қизғин алқишиға еришкән.

Пакистан һөкүмитиниң уйғур пидаий вә сиясий панаһланғучиларни хитайға қайтуруп бериш вәқәлири пакистандики уйғурларни азаблап келиватқан мәсилиләрниң бири. Пакистанда йәнә хитайға қарши аммиви паалийәтләрниң тосқунлуққа учришиму, бу йәрдики уйғур җамаитини биарам қиливатқан бир сәлбий вәзийәт. Уйғур паалийәтчиләр, пакистанда парихорлуққа хатимә берилсә, һәқиқий демократийә йолға қоюлса, мәзкур вәзийәтниң тәбиий һалда оңшилишидин үмид күтмәктә.

Нөвәттә пакистандики уйғурлар, пакистанниң хитай сияситидә өзгириш болушини, болупму униң хитайға беқиндичилиқиниң азийишини арзу қилмақта вә бу арзулири үчүн пайдилиқ болған һәр қандақ паалийәтләргә актип һалда қатнашмақта. Өмәр уйғур вәхпиниң ғоллуқ әзалиридин абдуқейим әпәнди пакистанниң һиндистан билән болған мунасивити һәққидики шәхсий тәсиратилирини баян қилиду.

Исламабадтики ачлиқ елан қилиш һәрикити 10-күнигә қәдәм қойғанда, пакистандики бир қисим парламент әзалири, һөкүмәт әмәлдарлири ачлиқ елан қилинған мәйданға йетип келип, раҗа әхтәр әпәндигә тәләплирини орундайдиғанлиқи һәққидә вәдә бәргән. Буниң билән ачлиқ елан қилиш һәрикити түнүгүн ахирлашқан. Әмма раҗа әпәнди берилгән вәдә қисқа вақит ичидә әмәлийләшмисә, ачлиқ елан қилишни қайта башлайдиғанлиқини, һаятини бу йолда ахирлаштуридиғанлиқини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.