Пакистандики уйғурлар рабийә ханимниң телефон сөһбитини аңлиди

Хитай әлчиханиси вә пакистан даирилириниң һәр хил сиясий бесими түпәйли, өзлириниң гаңгирап қалғанлиқини билдүргән пакистанда яшаватқан уйғур җамаити, бүгүн уйғур миллий һәрикитиниң рәһбири рабийә қадир ханим билән телефун сөһбити елип барди.
Мухбиримиз әқидә
2010.06.24
Share on WhatsApp
Share on WhatsApp
Omer-wexpi-Rabiye-xanim-telephone-sohbiti-305 Сүрәт, бүгүн пакистанда йашаватқан уйғур җамаити өмәр вәхпиниң орунлаштуруши билән уйғур миллий һәрикитиниң рәһбири рабийә қадир ханим билән телефун сөһбити елип барған йиғин залидин бир көрүнүш.
RFA Photo / Eqide

Рабийә ханимниң сөзлиридин кейин өзлириниң үмидләнгәнликини вә қайтидин ирадә тиклигәнликини билдүргән, пакистан өмәр вәхпиниң муавин рәиси вә әзалири өз қарашлирини ипадилиди.

Хитай һөкүмитиниң уйғурларға қаратқан сиясий зулумлириниң күчийишигә әгишип, болупму өткән йили 5 ‏- июл үрүмчи вәқәси йүз бәргәндин кейин, һәр қайси дөләтләрдә яшаватқан уйғурларниң сиясий паалийәтлири техиму зораймақта, уйғурлар йәнә өз мәдәнийити, өрп - адәтлири омумән миллй кимликини сақлап қелишқиму алаһидә әһмийәт бәрмәктә.

Бирақ хитай һөкүмити, уйғурларниң бу хил һәрикәтлиригә тосқунлуқ қилип, уйғурларниң чәтәлләрдики қануний рәсмийәтлири толуқ беҗирилгән тәшкилат вә һәтта иҗтимаий органлириға сиясий сүйиқәст ишләтмәктә.

Пакистандики өмәр уйғур вәхпи тәрипидин қурулған өмәр уйғур ана тил мәктипи пакистандики хитай әлчиханисиниң бивастә қол тиқиши нәтиҗисидә тақиветилгән.

Қануний рәсмийәтлири толуқ беҗирилгән мәзкүр мәктәпниң тақиветилиши, уйғур җамаитиниң наразилиқини қозғапла қалмай, уларни қаттиқ үмидсизләндүргән, пакистандики уйғурлар өмәр вәхпиниң йетәкчилики астида мәхсус вәкилләр гурупписи қуруп, бу мәсилини қандақ һәл қилишни музакирә қилип, уйғур миллий һәрикитиниң рәһбири рабийә қадир ханимниң йолйоруқи билән иш елип беришни қарар қилған.

Уйғур миллий һәрикитиниң рәһбири рабийә қадир ханим өмәр вәхпи һазирлиған телефун йиғинида җамаәтниң һәргиз үмидсизләнмәсликини, тоғра йолда меңип, тоғра иш қилишни тәвсийә қилған.

Рабийә қадир ханим сөзидә йәнә, мәйли пакистанда болсун яки мисирда болсун вә яки оттура асия дөләтлиридә болсун, дуняниң һәммә җайлирида яшаватқан уйғур хәлқиниң үмидсизлинип бақмиғанлиқини,лекин хитай һөкүмитиниң, вәтән ичидә яшаватқан уйғурларға зулум селиш биләнла чәклинип қалмастин, намрат дөләтләрниң мәнпәәт тоқунушидин пайдилинип туруп, шу дөләтләрдә туруватқан уйғурларға, һәтта дуняниң һәммә йәрлиридә яшаватқан уйғурларға, түрлүк шәкилдә зор бесим ишлитишкә уриниватқанлиқини билдүрди.

Рабийә қадир ханимниң сөзидин кейин, өзлиридә йеңи бир ирадә вә үмид турғузулғанлиқини ейтқан өмәр уйғур вәхпиниң муавин рәиси әкбәрҗан, уйғур яшлириниң худди рабийә қадир ханимниң өзини көргәндәк наһайити хурсән болғанлиқини ейтти.

Җамаәт әрбаблиридин сахирдин әпәнди, рабийә қадир ханимниң сөзидин кейинки тәсиратини ипадилиди.

Телефун йиғини ахирлашқандин кейин, уйғур җамаити рабийә қадир ханим вә уйғурларниң паалийити үчүн дуа тилавәт қилди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.