Pakistandiki Uyghurlar rabiye xanimning téléfon söhbitini anglidi

Xitay elchixanisi we pakistan da'irilirining her xil siyasiy bésimi tüpeyli, özlirining ganggirap qalghanliqini bildürgen pakistanda yashawatqan Uyghur jama'iti, bügün Uyghur milliy herikitining rehbiri rabiye qadir xanim bilen téléfun söhbiti élip bardi.
Muxbirimiz eqide
2010.06.24
Share on WhatsApp
Share on WhatsApp
Omer-wexpi-Rabiye-xanim-telephone-sohbiti-305 Süret, bügün pakistanda yashawatqan uyghur jamaiti ömer wexpining orunlashturushi bilen uyghur milliy herikitining rehbiri rabiye qadir xanim bilen téléfun söhbiti élip barghan yighin zalidin bir körünüsh.
RFA Photo / Eqide

Rabiye xanimning sözliridin kéyin özlirining ümidlen'genlikini we qaytidin irade tikligenlikini bildürgen, pakistan ömer wexpining mu'awin re'isi we ezaliri öz qarashlirini ipadilidi.

Xitay hökümitining Uyghurlargha qaratqan siyasiy zulumlirining küchiyishige egiship, bolupmu ötken yili 5 ‏- iyul ürümchi weqesi yüz bergendin kéyin, her qaysi döletlerde yashawatqan Uyghurlarning siyasiy pa'aliyetliri téximu zoraymaqta, Uyghurlar yene öz medeniyiti, örp - adetliri omumen milly kimlikini saqlap qélishqimu alahide ehmiyet bermekte.

Biraq xitay hökümiti, Uyghurlarning bu xil heriketlirige tosqunluq qilip, Uyghurlarning chet'ellerdiki qanuniy resmiyetliri toluq béjirilgen teshkilat we hetta ijtima'iy organlirigha siyasiy süyiqest ishletmekte.

Pakistandiki ömer Uyghur wexpi teripidin qurulghan ömer Uyghur ana til mektipi pakistandiki xitay elchixanisining biwaste qol tiqishi netijiside taqiwétilgen.

Qanuniy resmiyetliri toluq béjirilgen mezkür mektepning taqiwétilishi, Uyghur jama'itining naraziliqini qozghapla qalmay, ularni qattiq ümidsizlendürgen, pakistandiki Uyghurlar ömer wexpining yétekchiliki astida mexsus wekiller guruppisi qurup, bu mesilini qandaq hel qilishni muzakire qilip, Uyghur milliy herikitining rehbiri rabiye qadir xanimning yolyoruqi bilen ish élip bérishni qarar qilghan.

Uyghur milliy herikitining rehbiri rabiye qadir xanim ömer wexpi hazirlighan téléfun yighinida jama'etning hergiz ümidsizlenmeslikini, toghra yolda méngip, toghra ish qilishni tewsiye qilghan.

Rabiye qadir xanim sözide yene, meyli pakistanda bolsun yaki misirda bolsun we yaki ottura asiya döletliride bolsun, dunyaning hemme jaylirida yashawatqan Uyghur xelqining ümidsizlinip baqmighanliqini,lékin xitay hökümitining, weten ichide yashawatqan Uyghurlargha zulum sélish bilenla cheklinip qalmastin, namrat döletlerning menpe'et toqunushidin paydilinip turup, shu döletlerde turuwatqan Uyghurlargha, hetta dunyaning hemme yerliride yashawatqan Uyghurlargha, türlük shekilde zor bésim ishlitishke uriniwatqanliqini bildürdi.

Rabiye qadir xanimning sözidin kéyin, özliride yéngi bir irade we ümid turghuzulghanliqini éytqan ömer Uyghur wexpining mu'awin re'isi ekberjan, Uyghur yashlirining xuddi rabiye qadir xanimning özini körgendek nahayiti xursen bolghanliqini éytti.

Jama'et erbabliridin saxirdin ependi, rabiye qadir xanimning sözidin kéyinki tesiratini ipadilidi.

Téléfun yighini axirlashqandin kéyin, Uyghur jama'iti rabiye qadir xanim we Uyghurlarning pa'aliyiti üchün du'a tilawet qildi.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.