Пакистандики ака - ука уйғур паалийәтчиләр хәлқара җамаәттин ярдәм тәләп қилмақта

Өткән һәптә пакистан сақчилири пакистандики бир қисим уйғурларға қарита өй ахтуруш вә тутқун қилиш һәрикити елип барған иди. Сақчиларниң тутқун қилишидин өзини далдиға алған икки нәпәр уйғур бүгүн радиомизниң зияритини қобул қилип, пакистандики уйғурларниң бихәтәрлики үчүн хәлқара җамаәттин ярдәм тәләп қилди.
Мухбиримиз шоһрәт һошур
2010-04-05
Share
Pakistan-Ana-Til-Mektep-Omer-Wexpi-ezaliri-305.jpg Сүрәттә, өмәр вәхпи башлиғи өмәр башчилиқидики вәхип әзалири вә уйғур анатил мәктәп оқуғучилири.
RFA Photo / Shohret Hoshur

Бүгүн пакистандики уйғурлардин абдухалиқниң тутқун қилинғиниға 13 күн, инәйитуллаһниң тутқун қилинғиниға 9 күн болди. Әмма уларниң нәдилики вә немә сәвәбтин тутқун қилинғанлиқи һәққидә аилилири һазирғичә хәвәрсиз. Йәнә ака - ука уйғур паалийәтчилиридин өмәрҗан билән әкбәрҗанниң әнсизчилик ичидә өйгә қайталмай мөкүнүп йүрүватқиниға 5 күн болди.

Улар радиомизға қилған сөзидә өзлириниң пакистан дөлити яки хәлқи үстидин һичқандақ шикайити йоқлуқини, пәқәт һөкүмәт оргинидики айрим тармақлириниң хитай хәлқ җумһурийити билән ғәйрий әхлақий достлуқ вә һәмкарлиқ орнитип, пакистан вәтәндеши уйғурларға зулум селиватқанлиқини, шуңа хәлқара җамаәтниң пакистан һөкүмитини бу җәһәттә агаһландуруши керәкликини билдүрди.

Мәлум болушичә, пакистан сақчилири алдинқи айларда, өмәр уйғур вәхпи үстидин тәкшүрүш елип барған. Тәкшүрүшниң арқисидин уларниң чәтәлдики уйғур тәшкилатлири билән алақилашмаслиқини тәвсийә қилған вә бундақ болмиғанда қошниси хитай хәлқ җумһурийитиниң биарам болидиғанлиқини, буниң пакистан үчүн бир баш ағриқи болидиғанлиқини баян қилған.

Пакистандики уйғурлар болса, пакистан қануниға тамамән бойсунидиғанлиқини, әмма чәтәлләрдики қанунлуқ уйғур тәшкилатлири билән мунасивәт қилиштин һечқачан ваз кәчмәйдиғанлиқини билдүрмәктә.

Өткән айда пакистандики бир нәпәр уйғур радиомизда сөз қилип, өзиниң уйғур елида хитай сақчилириниң аваричилиқиға йолуққанлиқи һәққидә мәлумат бәргән иди. У шуниңдин кейин, пакистандики намәлум кишиләрниң тәһдитигә учриған. Ахири у пакистандин айрилип, 3 - бир дөләттики б д т панаһланғучилар ишханисидин панаһлиқ тилигән. Нөвәттә б д т ниң һимайиси астида панаһлиқ илтиҗасиниң нәтиҗисини күтмәктә.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт