Pakistandiki aka - uka Uyghur pa'aliyetchiler xelq'ara jama'ettin yardem telep qilmaqta

Ötken hepte pakistan saqchiliri pakistandiki bir qisim Uyghurlargha qarita öy axturush we tutqun qilish herikiti élip barghan idi. Saqchilarning tutqun qilishidin özini daldigha alghan ikki neper Uyghur bügün radi'omizning ziyaritini qobul qilip, pakistandiki Uyghurlarning bixeterliki üchün xelq'ara jama'ettin yardem telep qildi.
Muxbirimiz shohret hoshur
2010-04-05
Share
Pakistan-Ana-Til-Mektep-Omer-Wexpi-ezaliri-305.jpg Sürette, ömer wexpi bashlighi ömer bashchiliqidiki wexip ezaliri we uyghur anatil mektep oqughuchiliri.
RFA Photo / Shohret Hoshur

Bügün pakistandiki Uyghurlardin abduxaliqning tutqun qilin'ghinigha 13 kün, ineyitullahning tutqun qilin'ghinigha 9 kün boldi. Emma ularning nediliki we néme sewebtin tutqun qilin'ghanliqi heqqide a'ililiri hazirghiche xewersiz. Yene aka - uka Uyghur pa'aliyetchiliridin ömerjan bilen ekberjanning ensizchilik ichide öyge qaytalmay mökünüp yürüwatqinigha 5 kün boldi.

Ular radi'omizgha qilghan sözide özlirining pakistan döliti yaki xelqi üstidin hichqandaq shikayiti yoqluqini, peqet hökümet orginidiki ayrim tarmaqlirining xitay xelq jumhuriyiti bilen gheyriy exlaqiy dostluq we hemkarliq ornitip, pakistan wetendéshi Uyghurlargha zulum séliwatqanliqini, shunga xelqara jama'etning pakistan hökümitini bu jehette agahlandurushi kéreklikini bildürdi.

Melum bolushiche, pakistan saqchiliri aldinqi aylarda, ömer Uyghur wexpi üstidin tekshürüsh élip barghan. Tekshürüshning arqisidin ularning chet'eldiki Uyghur teshkilatliri bilen alaqilashmasliqini tewsiye qilghan we bundaq bolmighanda qoshnisi xitay xelq jumhuriyitining bi'aram bolidighanliqini, buning pakistan üchün bir bash aghriqi bolidighanliqini bayan qilghan.

Pakistandiki Uyghurlar bolsa, pakistan qanunigha tamamen boysunidighanliqini, emma chet'ellerdiki qanunluq Uyghur teshkilatliri bilen munasiwet qilishtin héchqachan waz kechmeydighanliqini bildürmekte.

Ötken ayda pakistandiki bir neper Uyghur radi'omizda söz qilip, özining Uyghur élida xitay saqchilirining awarichiliqigha yoluqqanliqi heqqide melumat bergen idi. U shuningdin kéyin, pakistandiki namelum kishilerning tehditige uchrighan. Axiri u pakistandin ayrilip, 3 - bir dölettiki b d t panahlan'ghuchilar ishxanisidin panahliq tiligen. Nöwette b d t ning himayisi astida panahliq iltijasining netijisini kütmekte.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet