Pakistanda ömer muxter isimlik bir Uyghur ghayip boldi

Pakistanning islamabat shehride yashawatqan uyghurlarmu 4 ‏- ayning 5 ‏- küni ömer uyghur weqpining uyushturishida, barin weqesining 19 yilliqi munasiwiti bilen barin shéhitlirini xatirilesh paaliyiti ötküzgen.

Ötken yilning otturilirida ömer muxter ushtumtut ghayip bolghan, xanimi ömer muxter heqqide hichqandaq uchur alalmighandin kéyin, ikki balisi bilen birlikte afghanistan'gha qaytishqa mejbur bolghan.

Ömer muxterning a'ilisi uni ta yéqin'gha qeder rawalpindidiki türmide dep perez qilip kelgen؛ chünki jem'iyette, uning ereb birleshme xelipilikidin afghanistan'gha kétiwatqan sepiri üstide islam'abad ayrodromida qolgha élin'ghanliqi heqqide söz tarqalghan. Ömer muxterning xanimi ötken hepte pakistan'gha yene bir qétim kélip, érining iz ‏- dérikini saqchilardin sürüshte qilghan؛ emma yenila netijige érishelmigen.

Pakistanda pa'aliyet élip bériwatqan ömer Uyghur wexpimu ömer muxterning iz - dérikini élish üchün alaqidar orunlar bilen körüshken؛ biraq uchur alalmighan.

Pakistandiki Uyghurlarning perez qilishiche, ömer muxterning paksitandiki qara jem'iyetler teripidin ziyankeshlikke uchrash éhtimalliqi nahayiti az, emma u pakistandiki Uyghur jama'iti ichide köz körün'gen we söyülgen bir kishi bolghini üchün xitay terepning ziyankeshlikige uchrighan bolushi mumkin ؛ yeni diplomatik wastilar bilen xitaygha qayturup eketken we yaki chet'el döletlirining bixeterlik tarmaqlirigha saxta melumat bérip, qolgha aldurghan we qamaqqa aldurghan bolushi mumkin.

Ötken yilning otturilirida ereb birleshme xelipilikide ikki neper Uyghur abudebidiki bir xitay malliri bazirigha ot qoyushni planlash jinayiti bilen eyiblinip qolgha élin'ghan؛ shu chaghda dubeyde yashawatqan bir qisim Uyghur yashliri mezkur döletning bixeterlik küchliri teripidin tutqun qilinip soraq qilin'ghan؛ bezi Uyghur yashliri awarichiliqtin qutulush üchün dubeydin kétishke mejbur bolghan.

Melum bolushiche, ömer muxter ene shu chaghda dubey bilen bilen afghanistan we pakistan arisida tijaret qiliwatqan bolup, uning ereb birleshme xelipilikidiki mezkur sirliq ot qoyush délosigha chétilip, tutqun qilin'ghanliqi texmin qilinmaqta. Ömer muxterning a'ilisi we yéqinliri Uyghur we xelq'ara teshkilatlarni ömer muxterning iz - dérikini élish üchün yardemge chaqirmaqta.

Yuqiridiki awaz ulinishidin, bu heqtiki melumatimizning tepsilatini anglaysiler.