Пакистандики уйғурлар ана тил вә миллий кимликини қоғдимақта

Нөвәттә һәр хил сәвәбләр түпәйлидин өз вәтинидин айрилип чәтәлләрдә муһаҗирәттә туруватқан уйғурлар арисида, чәтәл туприқида өсүп йетилгән пәрзәнтлиригә ана тили болған уйғур тилини өгитиш һәм уйғурларниң миллий кимлик тәрбийиси бериш хаһиши барғанчә күчәймәктә.
Мухбиримиз меһрибан
2010.03.08
Share on WhatsApp
Share on WhatsApp
Пакистандики оқуғучилар 305 Пакистандики оқуғучилар
AFP Photo

 Пакистанда өткән йили қурулған, "өмәр уйғур вәхпи"ниң мәсуллиридин өмәр әпәнди һәм әкбәр әпәнди қатарлиқ ака - иниләр радиомиз уйғур бөлүминиң зияритини қобул қилип, "өмәр уйғур вәхпи" қармиқидики" уйғур ана тили мәктипи"ниң бир йиллиқ нәтиҗилирини хуласилиди.

Әкбәр әпәнди бизгә вәхпә қурулған, бу бир йил җәрянида, балиларниң уйғур тили өгиниш қизғинлиқиниң ешип барғанлиқини, мана һазир оқуғучиларниң мәктәп қурулған дәсләпки мәзгилдики 15 нәпәрдин 50 нәпәргә йәткәнликини, мәктәптики оқуғучиларниң уйғурчә ана тили сәвийисиниң хели яхшиланғанлиқини, һазир балиларниң уйғур тилини раван сөзләйдиған һаләткә йәткәнликини, һәтта бәзи ата - аниларниңму балилири билән бирликтә бу мәктәптә уйғур тили дәрси аңлаватқанлиқини, шундақла шутапниң өзидила өзлириниң мәктәпниң бир йиллиқ оқутушини хуласиләп, яхши оқуған балиларға мукапат тарқитиш мурасими өткүзүватқанлиқини баян қилди.

 "Өмәр уйғур вәхпи"ниң бу йиллиқ " уйғур тилини яхши өгәнгән оқуғучи" мукапатиға еришкән оқуғучилардин мәрйәм, сийит әкбәр,мамутҗан, қатарлиқ балилар вә уларниң ата - анилиридин мәрйәмниң аниси зияритимизни қобул қилип, раван уйғур тили арқилиқ өзлириниң ана тили болған уйғур тилиға һәм вәтинигә болған сөйгүси вә арзу тиләклирини ипадилиди.

"Өмәр уйғур вәхпи"ниң қурғучиси өмәр әпәнди һәм әкбәр әпәндиләр өзлириниң өмәр уйғур вәхпини қуруш вә балиларға уйғур тили үгүтүшни муһим нуқта қилиштики сәвәбләрни баян қилип, һазир пакистанда пакистан пуқралиқиға өткән уйғурлардин тәхминән 2000 дин артуқ уйғур барлиқини, бу уйғурларниң көпчилики пакистанға 50 - 60 - йилларда келип йәрләшкән уйғурлар вә уларниң әвладлири болғини үчүн, шу йәрниң йәрлик тили болған орду тилида мәктәп тәрбийиси алғини сәвәблик, уйғур тилини унтуш хәвпигә йолуқуватқанлиқини, шуңа өзлириниң, ислам абад йенидики 1000 дәк уйғур аһалиси болған равилбинди шәһиридә, " өмәр уйғур вәхпи" қармиқидики" уйғур ана тили мәктипи"ни қуруш арқилиқ, оқуғучиларға уйғур ана тили вә миллий кимлик тәрбийиси елип беришни мәқсәт қилғанлиқини оттуриға қойди.

Улар йәнә "өмәр уйғур вәхпи"ниң бу бир йил җәрянида хитай һөкүмитиниң пакистанда турушлуқ бихәтәрлик хадимлириниң бесимиға учриғанлиқини, лекин шундақ болсиму өзлириниң бу вәхпә қармиқидики " уйғур анна тили" мәктипини давамлаштуруш ирадисиниң күчлүклүкини, һазир өзлириниң йәнә 20 яштин юқири болған яшларни һәр хил һүнәр кәсипләр билән тәрбийиләп, уларни түркийә явропа қатарлиқ дөләтләргә техиму юқири билим елишқа әвәтип, пакистандики уйғурларниң бундин кейинки турмушиниң яхшилиниши шараит яритишқа тиришидиғанлиқини ипадилиди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.