Пакистандики уйғурлар қурбан һейтни мәнилик паалийәтләр билән күтүвалди

Дуняниң һәммә җайлирида яшаватқан уйғурларға охшаш пакистандики уйғурларму өмәр уйғур вәхпиниң орунлаштуруши астида бир йәргә җәм болуп, қурбан һейтни бирликтә тәбриклигән.
Мухбиримиз ирадә
2010-11-19
Share
pakistanda-qurban-heyt-2010-305 Сүрәт, пакистандики уйғурлар өмәр уйғур вәхпиниң орунлаштурушида бир йәргә җәм болуп, қурбан һейтни бирликтә тәбриклигән көрүнүшлиридин бири.
RFA Photo / Irade

Пакистанда турушлуқ хитай әлчиликиму бәзи кишиләрни ишқа селиш арқилиқ уйғур җамаитигә қурбанлиқ қой тарқатқан болуп, бу әһвал уйғурларда қаттиқ наразилиқ қозғап, қаршилиққа учриған.

Чәтәлләрдә истиқамәт қиливатқан уйғурлар гәрчә давамлиқ бир - бирини көрүп туруш пурситигә еришәлмисиму, мушундақ һейт - байрамларни пурсәт билип, бир йәргә җәм болуп, бир - бири билән учришип, һал әһвал соришиду.

Униң үстигә чәтәлләрдики уйғур нопусиниң артишиға әгишип бу хил күнләрдә мәнилик паалийәтләрни өткүзүп, чәтәлләрдә чоң болуватқан яш әвладларға өзиниң өрп - адитини тонутушму бу хил паалийәтләрниң муһим мәзмуни болуп қалди. Ушбу нийәт билән пакистанда турушлуқ уйғурларму пакистандики өмәр уйғур вәхпиниң йетәкчиликидә қурбан һейтни бирликтә күтүвелип, бирликтә қурбанлиқ қилишқан. Биз пакистандики һейт әһвалини игиләш үчүн телефон қилғинимизда өмәр уйғур вәхпиниң башлиқи өмәр әпәнди зияритимизни қобул қилип алди билән дуняниң һәрқайси җайлиридики барлиқ уйғурларға һейтлиқ салам йоллиди.
pakistanda-qurban-heyt-2010-1-305
Сүрәттә, пакистандики өмәр уйғур вәхпиниң мәсуллири.
RFA Photo / Arslan

Кейин, өмәр уйғур вәхпиниң мәсуллиридин абдуқейим әпәнди бизгә бу йил пакистандики уйғурларниң қурбан һейтлиқ паалийитидин мәлумат бәрди.

Униң ейтишичә, уйғурлар пакистанға йәрләшкили йерим әсирдин артуқ вақит болған болуп, бу йәрдә чоң болған иккинчи әвлад уйғурлар асасән уйғур тили вә мәдәнийитини анчә билип кәтмәйдикән. Шуңа өмәр уйғур вәхпи бу нуқтини чиқиш нуқтиси қилип туруп, яшларға уйғурларниң өрп - адитини тонутуш үчүн бу паалийәтни уюштурған.

Пакистанда турушлуқ хитай әлчиханиси бу йиллиқ қурбан һейтта пакистандики уйғурларға қурбанлиқ қой тарқатқан. Әмма, пакистандики аз сандики кишиләрниң сиртида нурғун кишиләр хитай әлчилики тәрипидин тарқитилған қойни алмай уни қайтурувәткән. Өмәр уйғур вәхпиниң мәсуллиридин әкпәрҗанниң бизгә ейтип беришичә, хитай әлчилики бултурму охшаш һәрикәт елип барған болуп, бу әһвал пакистандики уйғурларда қаттиқ наразилиқ пәйда қилған икән.

Әкпәрҗан пакистандики яшларниң һазир өзиниң ана тилини, уйғур мәдәнийитини өгиниш қизғинлиқиниң интайин юқири икәнликини ейитти.

Мәлум болушичә, пакистанда болупму, мушу бир қанчә йилдин бери уйғурларниң болупму, уйғур яшлириниң өз тили вә мәдәнийитини өгиниш қизғинлиқи юқири өрлигән болуп, улар давамлиқ һалда бир йәргә җәм болуп, ортақ паалийәт елип беришқа күч чиқириватқан. Шуңа бу хил паалийәтләрниң пакистандики уйғур яшлирини тоғра йетәкләш, уларни өз ана тилини, мәдәнийитини өгитиш үчүн әһмийити интайин юқири икән.

Абдуқйием әпәнди сөзиниң ахирида дунядики барлиқ уйғурларға вә уйғур тәшкилатлириға пакистандики уйғур яшлириниң мәдәнийити билән тонушуши үчүн көпрәк матириял билән тәминлишни мураҗәт қилди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт