Парихорлуқ вә униң шумлуқи

Өлималар парихорлуқниң әң яман иҗтимаий җинайәт икәнликини вә пара бәргән вә алған, униңға сайә қилған, васитә болған кишиләрниң һәммиси бу җинайәткә шерик икәнликини сөзлимәктә.
Ихтияри мухбиримиз өмәрҗан
2012-08-10
Share
xitay-chirik-emeldarlar-305.png Хтайдики чирик әмәлдардин тартивилинған мал-мүлүкләр көргәзмидә
AFP


Парихорлуқ - биравниң һәққини йәвелиш яки униң хизмәт орнини тартивелиш яки униңға кәлгән амәтни өзигә қаритивелиш яки гунаһсиз бирини қарилаш яки бирәр җинайәткарни ақлаш яки униң җинайитини йениклитиш яки қандақла бир дәва ишида қарши тәрәпниң һәққини өзигә қаритиштин ибарәт рәзил мәқсәтни әмәлгә ашуруш үчүн иш үстидикиләргә мәлум миқдарда пул яки пулға тохтайдиған бир нәрсә бериш дегәнлик болуп, парини бәргән вә алған һәр иккиси аллаһниң алдида қаттиқ гунаһкар, инсанийәт алдида әйибкар болиду.

Пара бериш яки елишниң гунаһи еғир, хәтири чоңдур

Өлималар парихорлуқниң башқиларниң һесабиға ишләнгән җинайәт болупла қалмастин, һәқ - һоқуқларни дәпсәндә қилишқа сәвәб болидиған хиянәт икәнликини баян қилип мундақ дәйду: парихорлуқ әң яман хиянәтчилик болуп, һәқ - һоқуқларниң дәпсәндә болушиға, адаләтсизлик вә тәңсизликкә, кишиләрниң мәнпәәтигә намәрдләрчә хирис қилишқа, уларниң һәқлиригә таҗавуз қилишқа, төһмәтләрни артип уларниң абруйини төкүшкә, җәмийәт тәртипини бузушқа, хатирҗәмлик, аманлиқ вә ишәнчниң йоқилишиға сәвәб болидиған интайин қәбиһ вә рәзил қилмиштур.

Пара бериш яки елиш ислам динидила әмәс, бәлки пүтүн динларда вә пүтүн қанунларда қәтий һарамдур. Пәйғәмбәр әләйһиссалам: "аллаһ пара бәргүчигә, уни алғучиға вә униңға сайә қилип васитә болғучиға ләнәт қилди" дейиш арқилиқ парихорлуқ җинайитиниң җазасини баян қилған. Аллаһниң ләнитигә учриғанлиқ ахирәтлик несивидин пүтүнләй қуруқ қалғанлиқтур.

Парихоқлуқниң шумлуқи көп

Сәуди әрәбистаниниң өлималиридин абдулла ибни салиһ әл қәсир "мусулманлар үчүн муһим вәзләр" намлиқ әсиридә мундақ дәп язған:

Парихорлуқ рәзил қилиқ болуп, униң шумлуқи наһайити көптур. Чүнки у һарам малдур, парихорлуқ қилип пул тапқан адәмниң қилған сәдиқиси қобул болмайду, дуаси иҗабәт болмайду, у қәлби қарийип, гунаһни қорқмай ишләйдиған болуп қалиду, тәқвалиқтин йирақлишиду, нәпсий шәйтанға бәкрәк әгишидиған, һарамдин қорқмайдиған, һалални илғимайдиған болуп қалиду. Парихорлуқниң мундин башқа шумлуқлири көптур. Пәйғәмбиримиз бир һәдистә"һарамдин озуқлинип өскән бәдән дозахқа һәқлиқтур" дегән. Қуран кәримдә"бир - бириңларниң пул - мелини наһәқ йәвалмаңлар" дейилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт