Milliy karxanilar "Parlan" din hararet tapqusi

Gerche Uyghurlar soda sana'etke kirishken tarixi uzun bir millet bolsimu, emma Uyghurlarning özliri teripidin qurulghan, peqet Uyghur tilida ders béridighan, zamaniwi soda téxnikilirini ögitidighan, kesipleshken mektipi yoq idi.
Muxbirimiz gülchéhre
2011-10-31
Share
Beyjingda-sergerdanliq-ichide-tijaret-qiliwatqan-Uyghurlar-305.jpg Süret, www.tudou.com Da bérilgen, uyghur tijaretchilerning béyjingdiki turmushi ekis ettürülgen filimdin körünüsh.
www.tudou.com Din élindi.

Mana bu boshluq, Uyghur élide qurulghan xelq ichi mektipi "Parlan kespiy karxana diréktorlirini terbiyilesh mektipi" arqiliq toldurulmaqta. Bu mektepning Uyghur élide milliy karxanilarni kéreklik uchur we bilim bilen teminlesh ishliridin melumat igiliduq, bu heqte muxbirimiz gülchéhrening parlan shirkiti diréktori muxter ependi we xadimliri bilen ötküzgen söhbiti diqqitinglarda bolsun.

Uyghur xelqi sodigha mahir xelq, qedimiy yipek yolidin tartip hazirqi döngköwrük xelq'ara soda baziri buninggha shahit. Halbuki, esirlep özining tewekkülchiliki, diyaniti we eqil‏-parasitige tayinip, ata miras sodisini dawamlashturup kéliwatqan nurghun Uyghur sodigerlerge, öz sodisini téximu yükseldürüsh, kéngeytip karxana qurush, igilik tiklesh we yaki zamaniwi karxanilar bilen riqabetke chüsheligüdek, soda uchuri bilim téxnikilirini igilesh üchün, döletlik aliy mekteplerge kirmey turupmu öz tilida kespiy bilimge ige bolalaydighan orun yaki mektep yoq idi, parlan meblegh sélish meslihetchilik shirkiti teripidin bu yil-7aydin bashlap échilghan parlan kespiy diréktorlarni terbiyilesh mektipining échilishi bilen Uyghurlarningmu öz tilida zamaniwilashqan soda téxnika bilim we uchurliri heqqide bilim alidighan bir kesipleshken mektipi boldi. Buni Uyghur iqtisadiy maliye ma'aripi sahesidiki bir yüksilish déyishke bolidu.

Bolupmu, bügünkidek Uyghur éli xelq'aralashqan chong bazargha ayliniwatqan, terep-tereptin menpe'et qazghuchilar Uyghur élige yighiliwatqan, her kesip, her soda sana'et türlirige meblegh chaqiriliwatqan riqabet meydanida Uyghurlarning mukemmel soda bilimi, zamaniwi uchur wasitiliridin paydilinish iqtidarigha ige bolmay turup, özlirining cheklik meblighige tayinipla ronaq tépish pursitige ige bolalishi esla mumkin emes elwette.
Buni tonup yetken bezi Uyghur sodiger we igilik tikligüchilermu parlan diréktorlarni yétishtürüsh kursi arqiliq, Uyghur élide pul tépish riqabitide künsayin köpiyiwatqan xitay we chet'el shirketliri bilen beygige chüshüshke teyyarlanmaqta. Parlan meblegh sélish meslihetchilik cheklik shirkiti-2007 qurulghan bolup, hazirghiche Uyghur élidiki milliy karxanichi we igilik tikligüchilerning tereqqiyat yolida yoluqqan türlük mesililirini hel qilishni asas mezmun qilip 25 qétimliq chong tiptiki mexsus léksiye teshkilligen. 30 Qarargha yéqin karxana xadimliri we diréktorliri kursi achqan. Parlan shirkiti Uyghur élining her qaysi jayliridiki Uyghur karxanichi, sodigerlerning küchlük telipige asasen 2011-yili yene mexsus kespiy diréktor terbiyilesh mektipini qurghan.

Parlan diréktorlarni terbiyilesh mektipining bir xadimi ziyaritimizni qobul qilip, mektepning ishlirini pexirlinip turup tonushturdi.

Parlan meblegh sélish we meslihetchilik shirkitining diréktori, kespiy diréktorlarni terbiyilesh mektipining qurghuchisi muxter ependi mektep qurushtiki meqsiti we hazirghiche bu saheside bayqighan boshluq we artuqchiliqlar heqqide özining tejribilirini bayan qildi.

Parlan kespiy diréktorlarni terbiyilesh mektipi karxana bashqurushta, shara'it, til, musape hem waqit cheklimiliri tüpeyli mukemmel sapaliq diréktor yaki igilik bashqurghuchi bolushta mukemmel iqtisad bashqurush bilimlirige ige bolalmay kéliwatqan Uyghur sodigerlirini netije qazinishta asas bolghan bilimler bilen teminlep Uyghur soda sahesining ilgirilishige quwwet ata qilmaqta iken. Uyghur sodigerler parlanning tarqatqan hararitidin küch élip rawaj tapqusi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet