Патент саһиби өмәрҗан аблаға ' террорчи' қалпиқи кәйдүрүлди

Өмәрҗан абла иҗад қилған әсвабини идарә башлиқлириға көрсәткән чеғида, идарисидикиләр хуш болушқан вә уни тәбриклигән. У пәқәт патент һоқуқи кинишкисини көрсәткән чағдила идарә башлиқлириниң қапақлири турулгән, шу саәттин буян, униң һаятидики трагедийә башланған.
Мухбиримиз шөһрәт һошур
2009-02-09
Share
Omerjan-abla-nefit-305 Али дәриҗилик гиологийә енгинери өмәрҗан абланиң йеқинқи сүрәтлиридин бири.
Boxun.com Дин елинди. Нәшир һоқуқи Boxun.com Ниң.

Дәсләп иштин бошитилған, арқидин мәзкур әсвапни ширкәтниң ишләтмәйдиғанлиқини билдүргән, әмәлийәттә алақидар завутлар билән созлишип, мәзкур әсвапни милйонлап ишләпчиқарған. Алақидар орун вә ширкәтләр мәсулийәтни бир - биригә дөңгәп, өмәрҗан абланиң һәққини бәрмигән.

Өмәрҗан абла шуниңдин кейинки 8 йилни асасән әрз ишлири билән өткүзгән. Үрүмчигә әрз қилип 100 қетимдин артуқ барған, бейҗиңға 20 қетимдин артуқ барған. У бултур 2 - айдин башлап, бейҗиңда мәхсус туруп дава қилмақта. У мәркизи интизам тәкшүрүш комитетиға барғинида, уни кәспий орунларға беришқа буйруған, кәсипий орунлар интизам тәкшүрүш комитетини көрсәткән. Мәркизи әрзийәт идариси болса, әрзни қобул қилған, әмма ениқ җаваб бәрмигән, мәсилини тәкшурүватқанлиқини изчил тәкитлигән вә өзлириниңму чарисиз қеливатқанлиқини билдүргән.

Өмәрҗан абла 8йилдин бери достлириниң вә ата - анисиниң иқтисади ярдими билән яшап кәлмәктә, ишсиз бир шәхсниң әрз сәпиридә немиләргә дуч келидиғанлиқини тәхмин қилиш тәс әмәс: иқтисади қийинчилиқтин башқа сиясий бесим вә тәһдит, у дуч кәлгән әң чоң қийинчилиқниң бири болған.

Олимпик мәзгилидә туридиған йәр тапалмаслиқ, униң учун адәттики бир мәсилигә айланған, чунки бу чағларда қарамай сақчи идариси вә дөләт бихәтәрлик идариси өмәрҗан аблани тутуп келиш учун, бейҗиңға хадим әвәткән, бейҗиңдики уйғур ашханилири вә уйғурлар яшаватқан җайларға рәсимлик тутуш еланини чаплап, көргүчиләрниң мәлум қилишини буйриған.

Тутуш буйруқида, өмәрҗан абла, "террор гумандари," " үч хил күч" ләрниң ғоллуқ әзаси дәп сүпәтләнгән. Буниң билән у әрзини аңлайдиған орун вә кишини издәштин башқа, сақчидин қутулушниңму йолини издигән. У сөһбитимиз арисида, өз әрзи һәққидә аптоном райондики рәһбәрләрниң һәммисиниң хәвири барлиқини, уларниң бәзилириниң бу әрзгә қиззиқмиғанлиқини, қизиққан вә һесдашлиқ қилғучиларниң болса қолидин иш кәлмигәнликини билдүриду; униң билдүрүшичә, мәркәздики уйғур рәһбәрләрдин исмаил әмәт вә томур давамәтләрму униң әрзидин хәвәр тапқан, мәлум йәргичә арилишип баққан вә гепини өткузәлмигән. .Һәтта сабиқ муавин баш министир ву йи 2001 - йили, алақидар орунларға хәт йезип, өмәрҗан абла' ниң әрзигә қарап чиқшни, униңға қилинған һәқсизлиқни тузитишни буйриған, әмма бу хәтму карға кәлмигән. Шуңа өмәрҗан абла нефит саһәси һәққидә мундақ дәйду: "нефит саһәси аптоном районға қаримайду, шуңа аптоном район рәһбәрлириниң сөзи өтмиди, нефит саһәсидики кичиккинә бир ишханиниң мудириму аптоном районниң рәисини козгә илмайду."

Нефит саһәси җуңгодики әң чоң куч, бу ширкәт айрим бир падишаһлиқ, нефит саһәси җуңгодики әң чоң парихорлар угиси, шуңа мениң әрзим һәл болмайватиду; әмди мән чәтәл мухбирилирини издәватимән, чәтәлдики патент һоқуқи җәмийәтлири арқилиқ мәсиләмни һәл қилай дәватимән.

Биз униңдин сақчиларниң униңға террорчи қалпиқи кәйгузуштә қандақ пакитқа асасланғанлиқини соридуқ, у биринчи уйғур болғанлиқим, иккинчи нефит ширкити устидин әрз қилғанлиқим дәп җаваб бәрди . У йәнә нефит саһәсиниң уйғурлар учун устидин гәп қилишқа, соал сорашқа болмайдиған назук бир тима икәнликини, нефит саһәсидики мәсилиләрни сүрүштә қилишниң уйғурлар учун болгунчилик санилидиғаниқини әскәртип отти.

Өмәрҗан абла, 8 йиллиқ әрздарлиқ тарихида, өз әрзидә һечқандақ утуқ қазиналмиған; униң еришкини пәқәт әрз қилиш йоллири, ишханиларниң адрислири, башлиқларниң телефон номурлири қатарлиқ әрздарларға керәклик учурлар болған.

Бу сәвәбтин у һазир өз әрзидин башқа, уруқ - туғқан, дост - бурадәрлириниңму һавалә әрзлирини тәң елип маңмақта. Униң қолида һазир, өзиниң патент һоқуқи әрзидин башқа, инисиниң һөкүмәт хизмитидә яридарлинип, беқишсиз қалғанлиқи, сиңлисиниң қанунсиз һалда хизмәттин һәйдәлгәнлики, қаримайда, 10 миң ишчиниң тәминатсиз қалғанлиқи вә үрүмчидики 1 - авғуст полат завутида 400 нәпәр уйғур техникниң тәңсиз муамилигә дуч кәлгәнлики қатарлиқ 10ға йеқин әрзниң архипи бар.

Мана булар у қобул қилип йол меңиватқан һавалә әрзләрниң бир қисми болуп, бу әризләрниң көпинчиси әриздин ваз кечиши тәвсийә қилинип қобул қилинмиған.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт