Xitay da'iriliri qeyser ana patigül ghulamgha emdi aldash tedbirini qollanmaqta

Xitay da'iriliri qeyser ana patigül ghulamni ghayib oghli imammemet élini izdeshtin waz kechtürüsh üchün, 2010-yili uninggha 10 künlük qamaq jazasi bergen.
Muxbirimiz shöhret hoshur
2013.01.09
Share on WhatsApp
Share on WhatsApp
patigul-ghulam-305.jpg Ghayiblardin imammemet élining anisi patigül ghulam.
RFA/Shohret Hoshur

Patigül gholam ürümchi ayallar türmiside jaza mudditini tügetken küni öyige qaytishtin awwal udul saqchi orginigha bérip özini qamaqqa buyrughan saqchi xadimigha til yaghdurghan idi. Bultur yermenke mezgilide xitay saqchiliri uni kochida tartip-sörep yene bir qétim éghir tehdit salghan. Zorawanliq tedbirliri bilen patigül ghulamni yolidin yanduralmighan we peylini yumshitalmighan xitay da'iriliri emdilikte uninggha aldash tedbirini qollanmaqta.

5-Iyuldin kéyin iz-déreksiz ghayib bolghan yash imammemet éli we uning qiz dosti.
5-Iyuldin kéyin iz-déreksiz ghayib bolghan yash imammemet éli we uning qiz dosti.
RFA/Shohret

Melum bolushiche, ürümchi shehirining döngköwrük etrapidiki bir ahaliler komitétining rehber we xadimliridin teshkillen'gen 5 kishilik bir guruppa, tünügün patigül gholamning öyige kélip uni “Yoqlighan” we “Hal sorighan”. Téxi birqanche ayning aldida özini kochida düshkelep tartip-sörep yürgen xitay sékrétarning bu hal sorishidin ejeblen'gen patigül ularning bu ishtiki meqset-muddi'asini sorighan. Da'iriler, özlirining peqet hal sorap kelgenlikini we buningdin kéyinmu yardemge teyyar ikenlikini bildürgen hem özliri élip kelgen bir xalta gürüch, 4 kilo may we birqanche on tuxumni otturigha qoyghan. Patigül özige héchqandaq yardemning kérek emeslikini, peqet ghayib oghlining uchurini élishtin bashqa derd we éhtiyajining yoqluqini éytqan. Da'iriler ghayib oghulning iz-dériki mesiliside özlirining charisiz ikenlikini, bu mesilini yuqiri organlarning asta-asta hel qilip béridighanliqini éytqan. Patigül buninggha “Men manga jay sélip béringlar démidim, ishqa orunlashturup qoyunglar démidim, peqet siler tutup eketken balamning uchurini béringlar, ölük yaki tiriklikini dep béringlar dewatimen, bu yerde asta-asta hel qilidighan bir mesile yoq” dep qaqshighan. Da'iriler bu so'algha jawab bérishtin özini qachurup patigülning qelbini chüshinidighanliqini éytqan hem özlirining yardem bérishke teyyar ikenlikini bildürgen. Buninggha patigül mundaq jawab qayturghan:
-Silerning küchünglar méni qamap qoyushqa, nezerbend qilip öydin talagha chiqarmasliqqa yetti. Bir balini qaraqchi tutup ketsimu, puqra dégen hökümetning aldigha baridu, men hökümet tutup ketken balamni sürüshte qilip balamning aldigha bardim, emma manga jinayetchige oxshash mu'amile qildinglar, méni xarlidinglar, bozek qildinglar, men sen xeqning yardimini qobul qilmaymen, sowghisinimu almaymen, öyümdin yoqilinglar, közümdin yoqilinglar....

5-Iyuldin kéyin iz-déreksiz ghayib bolghan yash imammemet élining unwan kinishkisi.
5-Iyuldin kéyin iz-déreksiz ghayib bolghan yash imammemet élining unwan kinishkisi.
RFA/Shohret

Bu arida eyni chaghda patigülni kochida düshkelep tartip sörigen xitay partkom sékrétari, shu chaghdiki zorawanliqi üchün patigüldin kechürüm sorighan. Uning aldamchiliqini bilip turghan patigül, balisini izdesh dawamida yoluqqan heqsizliklerning héchbirini untumaydighanliqini bildürüp ularni öyidin heydigen.

Patigülning bayan qilishiche, uni yoqlighan bu 5 kishining ikki nepiri xitay we emeldar, qalghan ikki nepiri özige nezerbend üchün qoyulghan Uyghur xizmetchi bolup, bu “Hal sorash” ziyariti dawamida ikki Uyghur xizmetchi ongushsizliq we bi'aramchiliq keypiyatida olturghan, hetta biri patigül bilen teng köz yéshi qilghan؛ emma ikki xitay emeldar bolsa, birdem échin'ghan qiyapette gep qilsa, birdem öz'ara kusurliship külüshkimu purset tapqan.

Patigül gholamning bildürüshiche da'iriler axiri élip kelgen sowghatlirini kötürüshüp patigülning öyidin xapa halda ayrilghan. Patigül gholam mu'ellip bilen söhbitining axirida mundaq dédi:
-15 Kün boldi, sizdin téléfon kelmidi, téléfoningiz besh kün'giche kelmise jiddiylishimen, tang atqiche-tang atqiche sizge deydighan söz teyyarlaymen. Bu geplirimni sizge dewalmisam yürikim sésip kétidu.

Yuqirida xitay da'irilirining qeyser ana patigül ghulamgha emdi aldash tedbiri qolliniwatqanliqi heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.