Derdmen ana patigül ghulamning türkiye bash ministiri rejep tayyip erdoghan'gha déyelmey qalghan gepliri

Ghayib oghlini izdigenliki üchün izchil halda nazaret qilinip kéliwatqan patigül ghulam, bu yil 4-ayning 8‏-küni türkiye bash ministiri rejep tayyip erdoghanning ürümchige ziyaretke kélidighanliq xewirini uqup, pursetni qachurup qoymasliq üchün öyidin etigendila chiqip kétidu we özi anglighan uchurlargha asasen noghay meschitning aldida rejep tayyip erdoghanni kütidu. Emma anche uzun ötmeyla uni nazaret qilishqa békitilgen saqchilar sanliri köpeygen halda uning etrapida peyda bolidu we uni tar kochigha qistap apirip, chong yolda turushigha ruxset qilmaydu. Patigül ghulam gerche saqchilar bilen köp takallashqan we tirkeshken bolsimu, shu küni rejep tayyip erdoghan bilen sözlishish emes, uni körüsh pursitigimu érishelmeydu. Patigül ghulam muxbirimizning bu qétimqi ziyaritide shu künki saqchilar bilen bolghan jédili we rejep tayyip erdoghan'gha déyelmey qalghan sözliri heqqide melumat berdi.

Ana: erdoghanning kelginini anglap barsam, bu itlar yene keynimge kiriwaldi.....
Muxbir: türkiye bash ministiri rejep tayyip erdoghan ürümchige kelgendimu?
Ana: shundaq.
Muxbir: erdoghanning kelginidin siz qandaq xewer tapqantingiz?
Ana: etigende seyge chiqqan idim, bu itlar(saqchilar démekchi) seyxanining ichigiche manga egiship kirdi, adette talada turup közitetti. Néme ish bolghandu dep sorisam, xeqler türkiyining bashliqi erdoghan kélidiken dédi. Shunga seyni öyge ekirip qoyupla sirtqa chiqtim. Dabazaning aldigha barsam, bazar taqaq, hemme yerni saqchilar tosuwétiptu. Anglisam erdoghan namaz oqughili noghay meschitige kélidiken. Shunga noghay meschitning aldigha kélip olturdum. Saqchilar kélip bizni chong yoldin heydep tar kochigha solap qoydi.
Muxbir: xeq narazi bolmidimu?
Ana : boldi؛ biri, némanche qilidighandu bular dégenti, yene bireylen 5-iyul weqeside yoqap ketkenler bar, shularning a'ilisini erdoghan bilen körüshüp qalamdikin dep qorqidu herqachan, dédi. Buni anglap men shu balisini yoqitip qoyghanlardin biri, méning balamni hökümet yep ketti dédim, birdemdin kéyin biri keptu baya néme dédingiz? deydu؛ balamni hökümet yep ketti dédim, xata deptimenmu? dédim, yene deymen, qandaq qilisen dédim, bolsa mushu gépimni soraydighan, sürüshte qilidighan bashliqingning yénigha apar méni, 2 yérim yildin buyan shundaq bashliqni tapalmaywatimen dédim....
Muxbir: shundaq qilip, erdoghanni körelidingizmu?
Ana: körelmidim, körgili qoymidi.
Muxbir: sizge oxshash körelmigenler jiqmu?
Ana: jiq-jiq.
Muxbir : körüshken bolsingiz néme deyttingiz?
Ana: shinjang xelqining éziliwatqanliqini deyttim, bizning bozek qiliniwatqanliqimizni deyttim.
Muxbir: konkrét bir mesilini otturigha qoyamtingiz?
Ana: deyttim, héchqandaq sewebsiz balisini tutup ekétidighan, tutup ekétip yoqitiwétidighan ish silerdimu barmu? bashqa döletlerdimu barmu? yaki yalghuzla mushu junggoda barmu? deyttim. Méning balamni yoqitiwetti, sen bir musulman döletning bashliqikensen, sen buninggha qandaq qaraysen dep sorayttim.
Muxbir: belkim erdoghan biz uqmay qaptuq, junggo hökümiti bizge bu yerde milletler ittipaq, mesile yoq dégenti dep qélishi mumkinti.
Ana: u chaghda biz mana mushundaq ittipaq dep méni nazaret qiliwatqan saqchilarni körsitettim.
Muxbir: eger telipingiz néme dep qalsa, néme deyttingiz?
Ana: bular ichki ishimizgha héchkimni arilashturmaymiz dewatidu radi'o -téléwizorlarda. Bular bek yaman bop ketti, sizningmu küchingiz yetmesliki mumkin, anglisam, dunyada kishilik hoquq deydighan bir yer barken, shu yerge dep qoyung dep derdimni, shulargha yetküzüp qoyung yighimizni, bu yerde héchkim bizning gépimizni anglimidi, qanxor, yirtquch saqchilar héchkimge gépimizni anglatqili qoymidi, deyttim. Mushu geplirimni erdoghan'gha dewalalighan bolsam, béshimgha néme kün kelse razitim....

Yuqirida ürümchidiki bir derdmen anining türkiye bash ministiri rejep tayyip erdoghan'gha déyelmey qalghan sözliri heqqide melumat berduq.