Ghayip anisi patigül ghulam par pulini toliyelmigenliki üchün sotqa chaqirilghan

Sot chaqiriqida uninggha pulni tapshurush üchün bir ayliq möhlet bérilgen. Patigül ghulam da'irilerge oghlining iz - dériki bilen bolup 4 yildin béri ishliyelmigenlikini seweb körsitip, par pulining bir qismini töleydighanliqini, qalghan qismi üchün par shirkitining par qazinigha ot qalap bérishni oylishiwatqanliqini éytqan.

Töwende muxbirimiz shöhret hoshurning bu heqte patigül ghulam bilen ötküzgen söhbet xatirisini anglaysiler.

Patigul ghulam sot chaqiriqini élip kelgen saqchi xadimlirigha özining nöwette pulni toluq töleshke qurbi yetmeydighanliqini, chünki 4 yildin béri oghlining iz - dérikini élish bilen bolup ishsiz qalghanliqini, hetta uyaq - buyaqqa yol méngip köp chiqimdar bolghanliqini éytqan. Saqchilar bolsa, bu awarichliqlargha patigülning özining sewebchi ikenlikini, shunga par pulini töleshtin özini qachurmasliqini éytqan. Mana bu chaghda patigül “Méni baqidighan, méning par pulumni töleydighan, oghlumni hökümet yep ketti, bu ishta men sewebkar emes” dep jawab bergen. U yene oghli ghayip bolushning aldida turmushining normal kétiwatqanliqini, hetta 4 balisini tikkuchilik bilen tapqan puli bilen oqutup chiqqanliqini, hökümetke qilchimu tayanmighanliqini, bolupmu tapqan - tukkinining hemmisini chong oghlini oqutushqa serp qilip, chong oghlini dangliq bir uniwirsi'itéta énjinir qilip yétishtürüp chiqqanliqini, oghli emdila xizmetke chiqqanda uni hökümetning yep ketkenlikini éytqan.

Melum bolushiche, ghayip imammemet eli tutqun qilin'ghan mezgilide banka hésabida 5ming yüen pul bar bolup, bu pul imammemet bilen teng yoq qiliwétilgen. Patigul ghulam bu pulni qayturiwélish üchün köp qétim da'irilerge iltimas sun'ghan bolsimu, ta hazirghiche qayturup bérilmigen. Shunga patigül ghulam özidin hal sorap kelgen mehelle sékritarigha sotning chaqiriqini körsitip,, hökümetning oghli bilen teng yoqitiwetken shu 5 ming yu'enni qayturup bérishini yene bir qétim telep qilghan we pulni par shirkitige tapshuridighanliqini, qalghan qismi üchün par shirkitining par qazinigha ot qalap bérishni xalaydighanliqini éytqan. Yerlik emeldarlar we saqchilarning beziliri patigülni mezkur pulni töleshke zorlsa, beziliri patigulge bu jehette yardem qilidighanliqini bildürüshken. Patigul bolsa yardem qobul qilmaydighanliqini, peqet oghlining iz - dérikini telep qilidighanliqini, chünki oghli téplmay turup uning maddiy we meniwiy dert - elemlirining tüp yiltizidin tügimeydighanliqini éytqan.