Хәлқаралиқ пәләстин аммивий һәмкарлиқ йиғиниға уйғурларму қатнашти

2009 ‏ - Йили 5 ‏ - айниң 22 вә 23 ‏ - күнлири истанбул шәһириниң бәйликдүзү районидики кая рамада меһманханисида хәлқаралиқ пәләстин аммивий һәмкарлиқ йиғини ечилди.
Мухбиримиз арслан
2009.05.27
Pelestinni-qollash-yighini-305 2009 ‏ - Йили 5 ‏ - айниң 22 вә 23 ‏ - күнлири истанбул шәһириниң бәйликдүзү районидики кайа рамада меһманханисида ечилған хәлқаралиқ пәләстин аммивий һәмкарлиқ йиғинидин бир көрүнүш.
RFA Photo / Arslan

Йиғинни түркийиниң инсаний ярдәм вәхпи, дуня ислам өлималар җәмийити, әрәб иттипақи бирләшмиси, хәлқара қуддус муәссәсәси, әрәб докторлар бирләшмиси қатарлиқ тәшкилатлар бирликтә уюштурди.

 Йиғинда түркийиниң парламент әзаси вә түркийә ‏ - пәләстин парламент әзалири достлуқ гурупписиниң рәиси зәйд аслан, суданниң сабиқ дөләт рәиси мушир сирвар әззаһаб, дуня ислам өлималар җәмийитиниң рәиси доктур йүсүп қәрадави, шветсийилик сиясий паалийәтчи профессор доктур маттес гардел, түркийә инсаний ярдәм вәхпиниң рәиси буләнт йилдирим, малайшияниң сабиқ министири әнвәр ибраһим, пакистан ислам партийисиниң ташқи ишлар мәсули абдулғаффар әзиз қатарлиқ көплигән муһим шәхсләр сөз қилди.

Йиғинға 25 дөләттики сияси партийә, җәмийәт вә хәлқаралиқ иҗтимаий тәшкилатларниң вәкиллири қатнашти. Йиғинға түркийидә паалийәт қиливатқан шәрқий түркистан маарип вә һәмкарлиқ җәмийитиму тәклип қилинған болуп җәмийәт рәиси һидайәтулла оғузхан башчилиқидики бир һәйәт иштирак қилди.

Йиғинниң асаси мәқсити, пәләстин мәсилисини һәл қилиш йолини издәш, пүткүл ислам дунясини пәләстин хәлқигә ярдәм қилишқа чақириқ қилиш, ғәззә амбаргосини бикар қилиш қатарлиқ муһим нуқтилардин ибарәт икән.

Икки күн давам қилған бу йиғин җәрянида шәрқий түркистан маарип вә һәмкарлиқ җәмийитиниң рәиси һидайәтулла оғузхан башчилиқидики һәйәт әрәб дөләтлиридин кәлгән муһим шәхсләр алимлар вә тәтқиқатчилар билән айрим ‏ - айрим учришип уйғурлар вә шәрқий түркистан мәсилиси һәққидә сөһбәт елип барди.

Биз бу һәқтә шәрқий түркистан маарип вә һәмкарлиқ җәмийитиниң рәиси һидайәтулла оғузхандин мәлумат игилидуқ. Һидайәтулла оғузхан әпәндиниң билдүрүшичә, бу йиғин җәрянида әрәб дөләтлиридин кәлгән муһим шәхсләр билән айрим ‏ - айрим учришип шәрқий түркистан мәсилиси вә уйғурларниң тарихи вә һазирқи әһвали һәққидә сөһбәт елип барған вә уларни пәләстин мәсилисигә көңүл бөлгәнгә охшаш шәрқий түркистан мәсилисигиму көңүл бөлүшкә чақириқ қилған.

Биз йиғин җәрянида бу йиғинда сөз қилған,ислам дуняси алимлири җәмийитиниң рәиси доктур йүсүф қәрадавини зиярәт қилип уйғурлар вә шәрқий түркистан мәсилиси һәққидә сөһбәт елип бардуқ. Доктур йүсүп қәрдави уйғур мусулманларниң әһвали һәққидә немиләрни билисиз вә улар һәққидә қандақ ойлайсиз дегән соалимиз җаваб берип мундақ деди: "биз давамлиқ шәрқий түркистанлиқ қериндашлиримизни ойлаймиз, улар ислам үммитиниң бир қисми, у вәтән ислам дунясиниң бир парчиси, биз улардин, улар биздин болуп, биз улар билән әқидимиз охшаш қериндаш, бизниң қиблимиз бир, биз уларниң хитайлар тәрипидин зулумға учраватқанлиқини билимиз, уларниң әһвалини көзитип келиватимиз, биз уларни зиярәт қилишни халаймиз, уларниң динда мустәһкәм турушини, вәтән,хәлқини азад қилиш йолида имканийәтниң йетишичә тиришчанлиқ қилишини үмид қилимиз."

Биз бу һәқтә шәрқий түркистан маарип вә һәмкарлиқ җәмийитиниң рәиси һидайәтулла оғузхандин мәлумат игилидуқ.  Һидайәтулла оғузхан әпәндиниң билдүрүшичә, у йиғин җәрянида әрәб дөләтлиридин кәлгән муһим шәхсләр билән айрим ‏ - айрим учришип шәрқий түркистан мәсилиси, уйғурларниң тарихи вә һазирқи әһвали һәққидә сөһбәт елип барған вә уларни пәләстин мәсилисигә көңүл бөлгәнгә охшаш шәрқий түркистан мәсилисигиму көңүл бөлүшкә чақирған.

 

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.