Peyziwattiki 27 ‏ - awghust qizil boyi weqesi heqqide yéngi uchurlar (2)

Uyghur élidiki tekshürüsh ponkitlirining biride, xitay saqchi bir Uyghur qizning salahiyitini tekshürüp soraq qilmaqta. (Orni we waqti éniq emes)

 Peyziwat saqchi idarisining bildürüshiche, qizil boyi weqesidiki hujumchilarning yaman yar weqesini peyda qilghuchilar ikenlikige hazirche maddiy pakit yoq, emma ular perizining toghriliqigha %90 ishench bilen qarimaqta.

Yaman yar weqesi yüz berginige bügün 17 kün boldi, qizil boyi weqesi yüz berginige3 kün boldi. Emma gumandarlar hazirghiche tutulmighan. Nöwette qeshqer wilayiti mezkur gumandarlarni tutush üchün omumi yüzlük seperwerlikke keltürülgen. Qeshqer walisi ekber ghopurmu sepning aldida. Qeshqer partkom sékritari shi dagang saqchilarni, tutush jeryanida xatalishishtin qorqmasliqqa chaqirghan.

Xitay tashqi ishlar bayanatchisi chin gang tünügünki bayanatida, mezkur weqe gumandarlirini bir ochum kishiler dep atighan we Uyghur rayonida milletler munasiwiti weziyitining chong jehettin yaxshi ikenlikini bildürgen. Emma qeshqer xelqining weqe gumandarlirini bügün'ge qeder baghrida yoshurup kélishi chin'gangning sözlirini inkar qilmaqta.

Nöwette qizil boyi weqesidiki yaridar saqchilardin bir nepirining xeterlik basquchtin ötkenliki melum boldi, emma yaridarlardin bir nepirining ikki barmiqi késiwétilgen bolup, uning ehwali éniq emes.

Yerlik saqchi ponkitining bir xadimi bügün weqe gumandarliri heqqide we qizil boyi weqesi heqqide yene bir qatar yéngi uchurlar berdi. Melum bolushiche gumandarlar sani 7 din 9 gha köpeygen, ulardin biri anargül mutellip isimlik ayaldur.

Diniy étiqad jehettiki mustehkemliki bilen xitay saqchilirining diqqet merkizige aylan'ghan anargül, deslepte yaman yar weqesining gumandarlirigha yardemleshken dep qarilip teqip qilin'ghan bolsa, emdilikte qizil boyi weqesining biwaste ishtirakchisi süpitide izi qoghlanmaqta.

Anargül mutellip eslide peyziwatning misha yézisidin bolup, u bir mezgil ürümchi qatarliq jaylarda diniy telim élish yaki diniy terghibat bilen shughullan'ghan, kéyin qizil boyi yézisigha toy qilip kelgen.

Tünügünki igilishimizde peyziwat saqchi bashlighi anargül mutellipning anisi aman'gulni misha saqchi ponkitida tutup turiwatqanliqini bildürgen idi. Bügünki melumatta uning 8 yashliq oghlining tutup turuliwatqanliqi melum boldi.

Mezkur saqchi xadimi yene gumandarlarning alahide chéniqqan , bestlik küchlük kishiler ikenlikini bildürdi.

Bu, peyziwat nahiyiside yüz bergen 27 - awghust qizil buya weqesi heqqidiki eng yéngi melumatlardur.