Хәлқара пикир әркинлики муһакимә йиғинида уйғур вәкиллири

Д у қ баш катипи долқун әйса әпәнди 12-айниң 8-вә 9-күнлири чех җумһурийитиниң пайтәхти прага шәһиридә ечилған хәлқаралиқ пикир әркинлики муһакимә йиғинға тәклип билән қатнишип, уйғур мәсилисини оттуриға қойди.
Ихтиярий мухбиримиз әкрәм
2011.12.12
UNPO-yighinida-Dolqun-Eysa-305.jpg Сүрәттә, дунйа уйғур қурултийиниң баш катипи долқун әйса әпәнди бу қетимқи вакаләтсиз милләтләр тәшкилатиниң италийидә өткүзүлүватқан қурултийида.
RFA Photo / Eqide

Хәлқара кишилик һоқуқ күни мунасивити билән өткүзүлгән бу қетимқи йиғинға чех җумһурийитиниң һөкүмәт рәһбәрлири, америка, явропа, асия, африқа әллиридин кәлгән кишилик һоқуқ паалийәтчилири, кишилик һоқуқ мутәхәссислири, мәшһур сиясийонлар, дөләт әрбаблири, дуняниң һәрқайси җайлиридин кәлгән инсан һәқлири тәшкилатлириниң вәкиллири, демократик партийә-гуруһларниң вәкиллири, чех дөлитидики чәтәл әлчихана хадимлиридин болуп 400 дин артуқ киши қатнашқан.

Чех җумһурийитиниң сабиқ рәиси васлав хавел әпәнди намида өткүзүлгән бу қетимқи хәлқаралиқ пикир әркинлики муһакимә йиғиниға васлав хавел кутупханиси саһипхан болған. 8-Өктәбир кәчтә васлав хавел кутупханиси меһманлар шәрипигә зияпәт берип, дуняда пикир әркинликини әмәлгә ашурушниң муһимлиқи вә мустәбит әлләрдики пикир әркинлики таҗавузиға ортақ қарши турушниң әһмийити тоғрисида сөз қилған. Мәлумки, васлав хавел әпәнди сабиқ чехсловакийә җумһурийитиниң рәиси болған, чех вә словакийә җумһурийәтлири тинчлиқ билән айрилип чиққандин кейин, чех җумһурийитигә рәис болған мәшһур кишилик һоқуқ паалийәтчиси вә дөләт әрбабидур. Униң тәрҗимиһали вә тинчлиқ күрәшлири йолида елип барған паалийәтлири хәлқарадики демократик һәрикәтләрниң үлгисигә айланған. Васлав хавел көп қетим хәлқаралиқ тинчлиқ мукапатлириға еришкән киши.

9-Декабир күни хәлқаралиқ пикир әркинлики муһакимә йиғини рәсмий башланған. Йиғинда дуняниң һәрқайси җайлиридин кәлгән вәкилләр нутуқ сөзлигән.

Д у қ баш катипи долқун әйса әпәнди өз нутқида, болупму 2009-йили йүз бәргән 5-июл вәқәсидин кейинки омумий вәзийәт тоғрисида тохталған.

Долқун әйса әпәнди йәнә уйғурларниң пикир әркинликиниң еғир дәриҗидә дәпсәндә қилишларға учраватқанлиқини оттуриға қойған. Йиғин җәрянида шәрқий түркистандики кишилик һоқуқ дәпсәндичиликигә аит д у қ тәрипидин нәшр қилинған китабчини йиғин әһлигә тарқатқан.

Долқун әйса әпәнди сөзиниң ахирида, бу қетимқи йиғинниң уйғурлар мәсилисини ғәрб сиясий сәһнисидә йәнә бир қетим күнтәртипкә қоюшқа шараит һазирлап бәргәнликини тәкитлиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.