Aghriqchan zumret hajimning yette ayliq bowiqi mejburiy chüshürüwétildi

Zumret hajim bu yil 33 yash, uning qarnidiki 7 ayliq bowaq mejburiy aldurulghandin kéyin salametliki éghir derijide ziyankeshlikke uchrighan.

Zumret hajimning salametliki eslidila yaxshi emes bolup, doxtur uninggha bala alduruwétishke bolmaydighanliqini, tughuttin mudapi'elinish tedbirlirini qollinishqa téximu bolmaydighanliqini, peqet tughut cheklesh opératsiyisi qildurushi kéreklikini eskertken. Emma zumret hajimning qan bésimi yuqiri bolghanliqtin opératsiyige élip kirish mumkin bolmighan. Zumret hajimning bayan qilishiche, pilanliq tughut xadimliri burunmu uninggha balini alduruwetmiseng, öyüngni tartiwalimiz, bolmisa türmide yatisen dep tehdit sélip, ikki qétimliq balisini mejburiy alduruwetken. U özining salametlikining yaxshi bolmasliqining ikki qétimliq bala alduruwétishtin kelgenlikini, hayatining xeterge uchrishigha qarimay üchinchi qétim yene bala aldurushqa mejburlan'ghanliqtin, salametlikining téximu nacharliship, bedenlirining ishship ketkenlikini bayan qilidu. Zumret hajimning salametlikining ziyankeshlikke uchrishigha sewebchi bolghan yerlik hökümet, uning dawalinish heqqidiki erzini anglashni ret qilipla qalmay, doxturxanida bala aldurushqa ketken chiqimlarnimu zumret hajimgha töletken. Zumret hajim doxturxanida balini chüshürüshke ketken chiqimlarni qerz élip töligen bolup, a'ilisi yersiz ishlemchi déhqan bolghanliqtin qerz tölesh üchün téximu qiyin ehwalda qalghan.

Zumret hajimning 3 qizi bar bolup 4-perzentige, xitay hökümitining Uyghur déhqanlar uchtin artuq perzent körmeslik qanunigha xilap halda éghir ayaq bolghanliqtin, balining hayatini saqlap qalalmasliqtin endishe qilip, yette ayghiche ikki qat bolghanliqini yoshurghan bolsimu, emma pilanliq tughut xadimliri öymu-öy tekshürüp, axiri uning ikki qat ikenlikini pash qilghan. Pilanliq tughut xadimliri her küni uning öyige kélip balini alduruwétishke mejburlap tehdit sélip bésim qilghan. Rohi bésimgha chidiyalmighan zumret hajimning qan bésimi örlep ketkenliktin doxturxanigha bérishqa mejbur bolghan. Netijide doxturlar uning bala aldursa salametlikining éghir ziyankeshlikke uchraydighanliqigha qarimay, balini okul arqiliq qiynap chüshürgen, bala tirik tughulghanliqtin, ular anining köz aldida balini qayta okul urup öltürgen.

Biz yene tepsiliy ehwalni igilesh üchün ghulja sheherlik ana, balilar doxturxanisining pilanliq tughut bölümige téléfon qilduq. Mes'ul xadim amérikidiki erkin asiya radi'osidin téléfon qiliwatqanliqimizni anglap ziyaritimizni qobul qilishqa amalsiz ikenlikini bildürdi.