14 يىللىق خىزمەت ئىستاژىمۇ، 10 يىللىق كومپارتىيە ئەزالىق سالاھىيىتىمۇ، ھەتتا «مىللەتلەر ئىتتىپاقلىقى ئۈلگىسى» دېگەن يالتىراق گۇۋاھنامىلىرىمۇ، ئۇنى ئىشتىن ھەيدىلىشتىن قوغداپ قالالمىدى. پولات زاۋۇتىنىڭ تۇنجى ئەۋلاد ئىشچىلىرىنىڭ پەرزەنتى بولغان گۈلجەننەت بارات ۋە ئۇنىڭ يولدىشى خالمۇرات نۆۋەتتە ئىشسىز؛ ئۇلار ھەر دەرىجىلىك خىتاي ھۆكۈمەت ئورگانلىرىغا ئۆزلىرىنىڭمۇ زاۋۇتتىكى خىتاي كۆچمەنلىرىگە ئوخشاشلا ئىشلەش ۋە ياشاش ھەققى بارلىقىنى بىلدۈرۈش ۋە تەلەپ قىلىش بىلەن ئاۋارە.
يۇقىرىدىكى ئاۋاز ئۇلىنىشىدىن گۈلجەننەتنىڭ بۇ قىسمىتىنى ئۇنىڭ ئۆز ئېغىزىدىن ئاڭلايسىلەر.
بىز بۇرۇنقى پروگراممىلىرىمىزدا، پولات زاۋۇت ئىشچىلىرىدىن گۆھەر مەمەت، ئايگۈزەل ۋە رەيھانگۈللەرنىڭ قىسمەتلىرىنى ئاڭلاتقان ئىدۇق. گۆھەر مەمەت ئۆزىنى ھاقارەت قىلغان خىتاي تىجارەتچىنىڭ دۇكىنىغا ئوت قويۇۋېتىشكە ئۇرۇنۇپ ، ساقچىلار تەرىپىدىن بېسىقتۇرۇلغان. رەيھانگۈل، شاڭخەيدە بېلىكىنى كېسىپ قان ئېقىتىش ئارقىلىق ئۆزىنىڭ زاۋۇت ۋە ھۆكۈمەت رەھبەرلىكىگە نارازىلىقىنى ئىپادىلىگەن.