Shangxeydiki yer asti poyizi hadisisidin kéyin, puqralarda ensiresh tuyghuliri kücheymekte

Bu yil 27-séntebir shangxeyde yüz bergen yer asti poyizi soqulup kétish hadisisidin kéyin, shangxey puqralirida yer asti poyizining bixeterlikidin ensiresh tuyghusi kücheygen.
Muxbirimiz méhriban
2011-10-21
Share
shanghey-poyiz-hadisi-305.jpg Shangxeydiki yer asti poyizi hadisisidin kéyin, yoluchilarni poyizdin yötkewatqan körünüsh. 2011-Yili 27-séntebir, shangxey.
AFP

Radi'omiz ziyaritini qobul qilghan xitay puqraliri, yéqindin buyan yer asti poyiz yolida da'im körülidighan türlük kashililar sewebidin poyiz toxtap qélish hadisisining köpiyiwatqanliqini, öz bixeterlikidin ensireshtin bashqa hökümet da'irilirining mesilini bir terep qilmighanliqigha narazi ikenlikini bildürdi.

Bu yil 9-ayda shangxeyde yer asti poyizi soqulup kétish hadisisi yüz bérip, 300 din artuq adem yarilan'ghandin kéyin, xitay da'iriliri weqening bu yil 7-ayda 40 ademning ölüshini keltürüp chiqarghan wénju poyiz weqesige oxshashla, poyiz signal sistémisidiki kashila sewebidin kélip chiqqanliqini ilgiri sürgen idi.

Gerche weqe yüz bergili bir ay bolghan bolsimu, emma puqralarning shangxey yer asti poyizining bixeterlikidin ensiresh tuyghusi barghanche kücheygen. 20-Öktebir küni radi'omiz gu'angdung bölümining ziyaritini qobul qilghan shangxeylik jin xanim ötken ayda yüz bergen yer asti poyizi soqulup kétish hadisisidin kéyin, yer asti poyizida türlük kashililarning köpiyishi yoluchilardiki wehimini kücheytiwatqanliqini bildürdi.

Jin xanim: yer asti poyizi wogzaldin ayrilip ikki béket yürgendin kéyin, poyiz tuyuqsiz toxtap qaldi. Eyni chaghda poyizda yene nurghun yoluchilar bar idi. Poyiz mana mushundaq ikki béket otturisida toxtap qalghandin kéyin, poyiz ishiki échilmidi. Radi'odin poyiz yolida kashila chiqqanliqi uqturulup, yoluchilarning sewrchanliq bilen kashilining ongshilishini saqlishi telep qilindi. Yer asti poyizida kashila körülüshi bir ikki qétimliq ehwal emes, hazir bundaq kashililar barghanche köpeymekte.

Radi'omiz muxbiri shangxey yer asti poyiz shirkitining qiziq liniyilik téléfonigha téléfon qilip ehwal igiliginide, téléfonni alghan xizmetchi xadim muxbirgha poyiz yolidiki kashililarning téxi ongshalmighanliqini bildürdi.

Xizmetchi xadim: shirkitimiz yéqindin buyan köp kashila chiqiwatqan 3- nomurluq poyiz liniyiside poyizlarning méngish süritige cheklime qoydi. Poyiz yolidiki kashililar yenila yüz bérip turuwatidu. Hazir shirkitimiz bu kashililarni tüzitishke tirishiwatidu.

Radi'omiz ziyaritini qobul qilghan jaw ependimu charshenbe küni 4-nomurluq poyiz yoli liniyisidimu, kashila chiqqanliqini bildürüp mundaq dédi: charshenbe küni 4-nomurluq liniyidiki yer asti poyizi jinshajang yoli békitige kelginide, tuyuqsiz poyiz ichide köyük puriqi keldi. Shu zaman poyiz ichide patiparaqchiliq yüz berdi. Da'iriler puqralardiki qorqunchini bésish üchün, weqedin kéyin bu hadisini chüshendürüp, bu xil köyük puriqining poyiz chaqi bilen rélisning sürkilishidin kélip chiqqan normal ehwal ikenlikini ispatlashqa tirishqan bolsimu, emma hazir puqralar hökümet da'irilirining sözlirige ishenmes bolup qaldi.

Xewerlerdin melum bolushiche, shangxey yer asti poyiz yoli shirkiti 18-öktebir seyshenbe küni uqturush chiqirip, yéngidin yasiliwatqan shangxey yer asti yoli 12-liniyisining bir bölek qismidiki rélisqa yatquzulghan polat baldaqlar az bolup qalghanliqi sézilgendin kéyin, süpet tekshürgüchiler teripidin qurulush toxtitilip weqege munasiwetlik dep qaralghan 12 neper xizmetchige jaza bérilgenlikini uqturghan.

Jin xanim nöwette shangxey yer asti poyiz yoli liniyiside körülüwatqan kashililarning shangxey puqralirining hökümet da'irilirige bolghan naraziliqini kücheytiwatqanliqini bildürüp mundaq dédi: puqralar nöwette hökümet da'irilirining yüz bergen barliq hadisilerni bu jayda ishlewatqan ishchilargha yaki bir qisim xizmetchilirining xizmettiki bixesteliki sewebidin yüz bergen hadisiler dep, hökümetning weqede üstige élishqa tégishlik mes'uliyitidin özini qachurmaqta. Ejeba bu ishta munasiwetlik tarmaqlarning héchqandaq mes'uliyiti yoqmu? emma hazirghiche da'iriler shangxey yer asti poyiz yolida yüz bergen poyiz soqulup kétish weqesi hem undin kéyin üzlüksiz yüz bériwatqan kashililar heqqide héchqachan özlirining mes'uliyiti barliqini étirap qilghini yoq.

Xitay tor béketliride yézilghan bu heqtiki inkaslarda, nöwette xitaydiki parixorluq, xiyanetchilik illetlirining xitay tömüryol sistémisida ewj alghanliqi, hökümet da'irilirining tömüryol qurulushidiki matériyallardinmu xiyanet qilip xelqning hayati bilen kari bolmaywatqanliqi tenqidlenmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet