Қағилиқта пичақ билән һуҗум қилиш вәқәси йүзбәрди

28-Феврал күни, қәшқәр қағилиқ наһийисиниң бәхт йоли базар кочисида пичақлиқ һуҗум қилиш вәқәси йүз бәргән.
Мухбиримиз гүлчеһрә
2012.02.28
Share on WhatsApp
Share on WhatsApp
qeshqer-saqchi-ismina-almishish Қәшқәрдики бир мәһәллидә сақчилар исмена алмаштурмақта. 2011-Йили авғуст.
Muxbir Qiao Long

Учурларда вәқәдә нурғун кишиниң өлгән һәм яриланғанлиқи, икки һуҗум қилғучиниң хитай аманлиқ күчлири тәрипидин өлтүрүлгәнлики илгири сүрүлмәктә. Биз игилигән мәлуматларға қариғанда даириләр нөвәттә қағилиқта җиддий муқимлиқ тәдбирлирини алған болуп қағилиққа туташ йоллар қамал қилинған, вәқә йүз бәргән мәйдан вә яридарлар апирилған наһийилик хәлқ дохтурханиси қатарлиқ җайлар қоршалған, хитай аманлиқ күчлири чарлаш, ахтуруп тутқун қилишни давам қилмақта икән.

Нам шәрипини ашкарилимиған мәлум аңлиғучимизниң уйғур елидин әвәткән учуридин ашкарилинишиға қариғанда, қәшқәр вилайитиниң қағилиқ наһийисидә 28-феврал шу йәр вақти саәт 4 әтрапида йәрлик бир қисим уйғур яшлири билән хитай көчмәнлири арисида тоқунуш йүз берип 12 адәм өлгән йәнә бир қисим кишиләр яриланған.

Хитай ққ торидиму бу һәқтә тез учурлар таралди, униңдиму асасән қағилиқ базирида пичақ билән һуҗум қилиш вәқәси йүз берип вәқәдә 10 ларчә адәмниң өлгәнлики йәнә көп кишиләрниң яриланғанлиқи, икки нәпәр һуҗум қилғучиниң сақчилар тәрипидин етип өлтүрүлгәнлики, сақчиларниң тутқун қилишни башлиғанлиқи илгири сүрүлгән.

Бу толуқ болмиған учурни дәлилләш үчүн қағилиқ наһийисидики мунасивәтлик тармақ вә аһалиләр билән алақилишип көрдуқ.

Қағилиқ наһийилик сақчи идарисигә телефон қилдуқ, улар пичақ билән һуҗум қилиш вәқәсиниң йүз бәргәнликини инкар қилмиған болсиму, бирақ бу һәқтики учурларни ашкарилашни рәт қилди.

Қағилиқ наһийилик хәлқ дохтурханисиға телефон қилған болсақму, телефон линийиси давамлиқ алдирашлиқтин уланмиди.

Бәзи аммидин игилигән учурларға қариғанда қағилиқ наһийисиниң ичи җиддий һаләттә болуп, сақчиларниң чарлаш вә тутқун қилиши давам қиливатмақта, дохтурхана вә вәқә йүз бәргән бәхт йоли базириму сақчилар тәрипидин қамал қилинған икән.

Қәшқәр шәһәр ичидә сода қиливатқан қағилиқлиқ бир тиҗарәтчи қағилиқ билән қәшқәр вә башқа наһийиләргә тутишидиған қатнаш еғизлириниң қамал қилинғанлиқи үчүн өзиниң бу кечә қағилиққа қайталмиғанлиқини билдүрди.

Қағилиқ наһийисиниң аммиви қатнаш идарисиниң бир яш шопури, бүгүн узун йоллуқ қатнашниң тохтитилғанлиқи, шәһәр ичидә қаттиқ муқимлиқ тәдбирлири елип берилип, хитай қораллиқ күчлириниң чарлаш елип бериватқанлиқини ейтти.

Қағилиқта пичақлиқ һуҗум қилиш вәқәси йүз берип үч саәттин кейин, шинхуа агентлиқиниң үрүмчидин тарқатқан хәвиридә, 28-феврал қағилиқ наһийисиниң бәхт йоли базирида аз сандики җинайәтчиләр пичақ билән аммиға һуҗум қилип ондәк кишиниң өлүшини һәмдә бәзиләрниң ярилинишини кәлтүрүп чиқарди, аз дегәндә икки адәм сақчилар тәрипидин оққа тутулди, даириләрниң ахтуруп тутуши давамлашмақта, дәп көрситилгән.

Вашингтон почти, б б с қатарлиқ бәзи хәлқаралиқ ахбаратларму бу һәқтә чәклик болған учурларға асасән тарқатқан хәвәрлиридә қағилиқта йүз бәргән пичақ билән һуҗум қилиш вәқәсидә аз дегәндә 12 адәмниң өлгәнликини, буларниң ичидә иккисиниң сақчилар тәрипидин етип өлтүрүлгәнләр икәнликини илгири сүргән.

Қағилиқта вәқә йүз бәргәнлики һәққидә йәниму толуқ учурларға игә болғанлиқини билдүргән дуня уйғур қурултийиниң баянатчиси дилшат ришитниң билдүрүшичә, өлгәнләрниң сани 15, яриланғанлар униңдинму көп бөлиши мумкин икән.

Қағилиқ наһийилик партком тәшвиқат бөлүминиң кадири 29-феврал шу җай вақти 2 дә зияритимизни қобул қилип, вәқәдики өлгәнләр вә яриланғанлар һәққидики учурларниң һәммисини инкар қилди вә вәқәниң тәпсилати һәққидә бүгүн әтигән хизмәт вақтида ахбарат елан қилидиғанлиқини билдүрди.

Қағилиқта сәйшәнбә күни чүштин кейин йүз бәргән вәқәниң җәряни вә тәпсилий әһваллири һазирғичә йәнила намәлум, әмма дуня уйғур қурултийиниң баянатчиси дилшат ришитниң билдүрүшичә, хитай қораллиқ күчлириниң вәқә йүз берип бир саәттин кейин башлиған өйму-өй ахтуруп тутқун қилиши давам қиливатқан болуп, һазирғичә тутқун қилинған уйғур яшлири аз дегәндиму 25 кә йетидикән.

Қағилиқтики пичақ билән һуҗум қилиш вәқәси һәққидә йәнә давамлиқ йеңи учурлар елишқа тиришмақтимиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.