Qahire shehirining azadliq meydani “Tazilash küni” dep atalghan jümening ghelibisige shahit boldi

Hemmige melumki, tunistin tutashqan ot yalquni bashqa ereb döletlirige tesirini körsetken we misir, yemen, behreyn, oman, léwiye qatarliq döletlerde ewjige chiqqan idi.
Ixtiyariy muxbirimiz ömerjan
2011.03.04
misir-namayish-2011-yili-305.jpg Misir xelqi tahrir merkizide dölet bayriqini kötürüp hökümitige qarshi namayish qildi. 2011-Yili 4-féwral.
AFP

Bu namayishlarning eng zor ghelibige érishken adrési misir idi. Misir xelqi 30 yildin biri hakimiyet yürgüzüp kelgen hösni mubarekni texttin chüshürgen bolsimu, misir hakimiyitini uning yandashliridin tazilap bolalmighan idi. Tebi'iyki, namayishchilarning telipi mubarekni texttin chüshürüshla bolmastin, belki mubarek bashchiliqidiki chirikleshken hökümet apparatini pütünley örüp tashlap, misirda heqiqiy démokratiyini emelge ashurush idi.

Ular bu muddi'a bilen yolgha chiqip, namayishni dawam qildurghan we ötken her bir jüme künini birerdin chong ghelibe bilen axirlashturghan idi. Mesilen: misirda namayish bashlinip birinchi jüme küni mubarek özining partiyisi-milliy démokrat partiyisini hakimiyet béshidin chüshürüp, ehmed shefiqni yéngi hökümetke re'is qilip chiqarghan we misir dölet mexpiyetlik idarisining bashliqi ömer sulaymanni 30 yildin biri tunji qétim özige mu'awin re'is qilip teyinligen idi.

Xelq buninggha kupaye qilmighan we namayish yenila dawam qilghandin kéyin, ikkinchi jüme küni misir re'isi hösni mubarek özining bu yil 7-ayda élip bérilidighan re'islik saylimigha namzat bolmaydighanliqini, hazirqi re'islik waqti tügigen'ge qeder xelqning özini re'is dep qobul qilishini, oghli jamalningmu re'islik saylimigha kirmeydighanliqini élan qilghan boldi. Emma, u yenila xelqni razi qilalmidi. Üchinchi jüme küni namayishning kölimi birdin chongiyip ketti.

Bu jüme mubarek özining re'isliktin istépa sorighanliqini resmiy élan qildi. Emma, misirliqlarning meqsiti mubareknila texttin chüshürüsh bolmastin, chirikleshken hakimiyet organliridikilerning hemmisini texttin chüshürüsh bolghanliqtin namayish hazirgha qeder dawam qilip keldi. Bügün 2011-yili 4-mart künidiki jümeni misir xelqi “Tazilash küni ” dep atidi. Misirliq namayishchilarning bügünki ghelibisi isam sheref dégen kishini özliri teripidin tallap misir waqitliq hökümitining bash ministiri qilip saylap chiqqanliqi boldi.

El jezire téléwiziye qanilining xewiri

Qatarning el jezire téléwiziye qanilining qahirediki muxbiri eyyash deraji 4-mart jüme küni misirliqlarning azadliq meydanidiki ghelibisidin xewer bérip mundaq dédi: misirliq namayishchilar ötken her bir jüme künide ghelibe qazinip keldi. Bügünki jümeni“Tazilash küni”dep atidi. Bu misirni mubarek hakimiyitidiki hökümetning chirikleshken mes'ulliridin tazilash, shundaqla misirni diktatordin tazilash küni boldi. Yene nöwettiki namayish jeryanida namayishchilargha oq chiqarghan we ularni urup, tutup türmilerge atqan ichki islar ministiri hebib adilni tézrek sotlashni telep qilish boldi. Xelqning ilgiriki hakimiyetning ademlirige bolghan ghezep-nepriti nahayiti yuqiri bolup, ular mubarekning qalduqlirining hemmisini bir-birlep tazilap bolmighuche namayishni dawam qilduridighanliqini tekitleshti.

El jezire téléwiziye qanilining xewirige qarighanda, misir yéngi hökümitining bash ministiri isam sheref 2004-2005-yilliri arisida misir qatnash ishlirining ministiri bolghan kishi bolup, mubarek hakimiyitige naraziliqi bilen tonulghan shexs. 4-Mart jüme küni yéngi bash ministir isam sheref qahirening azadliq meydanigha kélip, xelqning yolluq namayishini qollighan we ularni yene barliq telepliri orundilip bolmighuche namayishni dawam qilishqa ündep nutuq sözligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.