Қазақистан қирғизистанға иқтисадий ярдәм көрсәтмәктә

Йеқинда қазақистан президенти нурсултан назарбайеф қошна қирғизистанда зиярәттә болуп қайтти.
Ихтиярий мухбиримиз ойған
2012.08.23
Share on WhatsApp
Share on WhatsApp
nursultan-nazarbayef-almasbek-atambayef-305.jpg Қазақистан президенти нурсултан назарбайәф қирғизистан президенти алмасбәк атамбайәф билән көрүшти. 2012-Йили 22-авғуст, қирғизистан.
AFP

Аммиви ахбарат васитилиридә бу зиярәтниң немини көзлигәнлики һәм униң һәр икки мәмликәт үчүн қандақ пайда елип келидиғанлиқи һәмдә бу вақитта қирғизистанда қандақ вәзийәтниң шәкилләнгәнлики һәққидә қарашлар елан қилинмақта. Русийиниң “независимая газета” торида елан қилинған григорий михайлофниң “қирғиз бирлики парчиланди. Йәрлик һакимийәтни нөвәттики қетим силкигәндә назарбайеф бишкәккә кәлди” намлиқ мақалисидә назарбайефниң қирғизистанға 20 йил ичидә дәсләпки қетим дөләт зиярити билән кәлгәнлики һәм икки дөләт ара музакириниң қирғизистан һөкүмити үчүн хатирҗәм болмиған бир пәйттә өтүватқанлиқи оттуриға қоюлған иди.

Мақалидә буниңдин сәккиз ай муқәддәм, йәни өткәнки йилниң 16-декабир күни барлиққа кәлгән “биримдик” йәни бирлик парламент иттипақиниң 22-авғуст күни тарқитилғанлиқи һәм омурбек бабаноф рәһбәрликидики қирғиз һөкүмитиниң истепаға кетиш хәвпи алдида турғанлиқи ейтилған болуп, мәмликәттә турақсизлиқниң пәйда болушида әйнә шу бабаноф әйибләнмәктә. Униңда мундақ дейилгән:
“биринчи витсе-премийер, андин премийер-министир лавазимлирини игилигән икки йил мабәйнидә риқабәтчилири уни лавазимидин мәһрум қилишқа урунди. Шәхсини булғайдиған материяллар, йошурун аздурушлар, попоза, барлиқ әҗәллик гунаһларда, шу җүмлидин вәтинини сатқанлиқида һәм қирғиз инқилабчилири земиндики яманлиқниң гәвдилиниши вә мәмликәттики барлиқ дегүдәк апәтләрниң гунаһкари һесаблиған илгирики мәмликәт президенти қурбанбек бақийеф билән алақә бағлиғанлиқида әйиблинишләр қоллинилмақта. Бабаноф пәқәт зәрбиләрни қайтурупла қалмай, бәлки тәсир даирисини кеңәйтти. Арилап бу шәхсий сүпәтлири, арилап малийәвий мумкинчиликлири арқисида йүз бәргән иди. Мәлум ролни йәнә шундақ бир сәвәбму ойнидики, мундақ премийер мәмликәт президенти алмазбек атамбайеф үчүн пайдилиқ болған. Шу нәрсидә пайдилиқ болғанки, нәқ бабаноф президентниң иттипақдиши, амма шуниң билән бир вақитта, аһалә наразилиқини өзигә топлиған тәнқидниң чақмақ қайтурғучиси болған”. Мақалә аптори бабанофниң кейинки вақитларда һәқиқәтәнму бир қатар мувәппәқийәтсиз һәрикәтләрни әмәлгә ашурғанлиқини илгири сүргән.

Әмди “екиспресс-к” тор гезитидә бесилған “әркинликкә айланған достлуқ. Н.Назарбайеф бишкәктә немә һәққидә келишти?” дегән мақалидә ейтилишичә, қирғизистан президенти а. Атамбайеф өз мәмликитиниң даим қазақистан дөлити вә униң президенти тәрипидин қоллап-қуввәтлинип кәлгәнликини, қазақистанниң мустәқиллиқ йиллирида чоң нәтиҗиләрни қолға кәлтүргәнликини, икки дөләт оттурисида асман вә йәрдәк пәрқ барлиқини, пәқәтла иқтисадта әмәс, бәлки қазақистан тәнһәрикәтчилириниң олимпик оюнлиридиму өз елиниң күчини намайиш қилалиғанлиқини алаһидә тәкитләп өткән.

Мақалидә көрситилгән мәлуматларға қариғанда, қирғизистан қазақистандин 100 миң тонна ашлиқ сориған, амма қазақистан икки һәссә көп ашлиқ беришни вәдә қилған. Буниңдин ташқири қирғизистанға 100 милйон кубметр газ йәткүзүш, алмата-кемин електр линийиси, шундақла бирләшкән електр истансилирини селиш һәққидә келишим имзаланған. Қазақистан қошна мәмликәткә йәнә икки мәктәп селишқа мәбләғ аҗратқан.

Мақалидә шундақла қазақистанниңму суғурулидиған суға моһтаҗ икәнлики һәм бу мәсилиниң икки мәмликәт оттурисидики өз-ара достлуқ вә яхши қошнидарчилиқ мунасивәтләрдә һәл қилиниш һаҗәтлики ейтилған. Мәлуматларға қариғанда, бишкәктә түркий тиллиқ мәмликәтләр президентлириниң нөвәттики учришиши һәмдә қирғизистанда қазақистан мәдәнийити күнлириниң мувәппәқийәтлик өтүватқанлиқи илгири сүрүлгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.