Xitay saqchi we shérikliri siyasiy panahlan'ghuchi qemirdin abduraxmanni panahlan'ghuchiliq salahiyitidin waz kéchishke dawamliq türde qistimaqta
2011.12.13

Shuningdin étibaren xitayning dölet bixeterlik saqchiliri we ularning pakistandiki shérikliri qemirdin'ge arqa-arqidin téléfon qilip, uni panahlan'ghuchiliq salahiyitidin waz kéchishke ündimekte. Uning éytishiche, ötken hepte yene xitayning yekendiki dölet bixeterlik xadimliri, xitayning pakistandiki rizaxan we abduqéyim qatarliq shérikliri qemirdin'ge téléfon qilip, panahliqtin waz kéchishke yene bir qétim qistighan we waz kéchishni oylishishi üchün, 28-dékabirghiche möhlet bergen. Qemirdin xitay shériklirining bu teklipi we tehditlirini ret qilghan.
Qemirdin 2009-yili ana yurti yekenni körgini barghanda, xitay dölet bixeterlik xadimliri uni jem'iyet tertipini buzush jinayiti bilen eyiblep, 15 kün qamap qoyghan. Arqidin uni xitay döliti üchün jasusluq qilishqa ündigen. Qemirdin, awarichiliktin qutulush üchün, teklipni yalghandin qobul qilghan. U döliti pakistan'gha qaytip kelgendin kéyin, xitay terep bilen alaqisini üzgen we özining jasusluqqa zorlan'ghanliqini radi'omiz arqiliq dunyagha ashkarilighan. Shuningdin kéyin uninggha xitayning dölet ichi we pakistan tewelikidin tehdit téléfonliri kélishke bashlighan. Axiri u a'ilisi bilen afghanistan'gha kétip siyasiy panahliq tiligen. Qurban héytning aldida pakistandiki xitay shérikliridin riza xan dégen kishi uni panahlan'ghuchiliq salahiyitidin waz kéchishke ündigen, yene ikki neper namelum kishi afghanistan'gha yétip bérip, qemirdinni afghanistandiki xitay konsulxanisigha bérip özini melum qilishqa ündigen. Bu teklip-dewetlerning hemmisi qemirdin teripidin ret qilin'ghan idi. Ötken hepte xitay dölet bixeterlik idarisining yekendiki orgini qemirdin'ge téléfon qilip, rizaxan qatarliq kishilerning öz ademliri ikenlikini, afghanistan'gha barghan ikki namelum kishinimu özlirining ewetkenlikini ashkarilighan hem uni panahliqtin waz kéchishke yene bir qétim ündigen.
Qemirdin xitayning dölet bixeterlik saqchiliridin yuqiriqi sözlerni anglighandin kéyin, pakistan junggo muhajirlar jem'iyitining bashliqi rizaxan we anduqéyin qemirdinni yene izdigen hem uni xitay konsulxanisida ötküzülidighan yéngi yil kéchilikige dewet qilghan.
Aldinqi ziyaretlirimizde, pakistandiki junggoluqlar jem'iyitining re'isi riza xan we abduqéyim dégen kishi özlirining xitay elchixanisidin pul éliwatqanliqini we ular bilen hemkarlishiwatqanliqini ashkara bayan qilghan idi. Emma ular özlirining xitayning dölet bixeterlik tarmaqliri bilen hemkarliqi barliqini bildürmigen. Biz ular arisidiki bu munasiwetni bilip béqish üchün, aldi bilen rizaxan'gha téléfon qilduq. Rizaxan bu jehette özini aqlashni toghra körmidi bolghay, so'allirimizgha jawab bérishni ret qildi.
Yuqirida, xitay saqchi we shériklirining afghanistanda panahliq tilep turuwatqan qemirdin abduraxmanni siyasiy panahliqtin waz kéchishke dawamliq türde qistawatqanliqi heqqide tepsiliy melumat berduq.