Xitay, 4 - awghust semenyoli weqesining 2 hujumchisigha bergen ölüm jazasini ijra qildi

Radiomizgha iane qilinghan bu süret, xitay qoralliq saqchilirigha qilinghan hujum yüzbergen qeshqer shehirining ali méhmanxanisining partilitiwétilgen aldi ishikidin bir körünüsh.

Mezkur höküm tünügün 8 ‏ - april küni chüshtin burun sa'et 11 de ijra qilin'ghan. Höküm ijra qilinishning aldida, qeshqer shehiridiki döletbagh tenterbiye zalida jaza ijra qilish yighini échilghan.

Roytérs qatarliq chet'el axbarat agéntliqilirining shinxu'a agéntliqidin neqil élip bildürüshiche, bu qétimqi jaza ijra qilish yighinigha, qeshqer shehiridiki ishchi - xizmetchi we ahaliler bolup 4000 din artuq kishi qatnashqan. Emma qeshqer weziyitini, jümlidin abduraxman azat bilen qurbanjan hémitning ehwalini yéqindin közitip kéliwatqan muhajirettiki Uyghur közetküchilerdin abdurishit hajining bildürüshiche, yighin'gha ahaliler qatnashturulmighan, peqet ishchi - xizmetchiler qatnashturulghan we höküm küchlük bixeterlik tedbirliri astida ijra qilin'ghan.

Abdurxhman azat 34 yash, qurbanjan hémit 29 yash bolup, ular ötken yili 8 ‏ - ayning 4 - küni yeni olimpiktin 4 kün awwal, qeshqerdiki xitay qoralliq qisimlirigha hujum qilip 17 neper xitay eskirini öltürgen 16 nepirini yarilandurghan idi.

Hujumni xitay terep térrorluq herikiti dep eyibligen, muhajirettiki Uyghur teshkilatliri bolsa, erkinlik kürishi dep medhiyiligen idi.

Dunya kishilik hoquqni közitish teshkilatining mutexessisi nikolas bakolin qatarliq musteqil tetqiqatchilar hujumda héchqandaq bigunah xelq ziyan'gha uchrimighanliqi üchün, hujumni térrorluq herikiti emes, hökümetke qarshi herket dep bildürgen idi.

Musteqil tetqiqatchi ilham toxti ötken ayda radiyomizda bergen bayanatida, Uyghur rayonida yüz bériwatqan qoralliq qarshiliq heriketliri üstidimu alahide toxtalghan idi. U shu qétimqi sözide nöwette Uyghurlar arisida rastinla térrorluq tüsidiki qarshiliqlarning mewjutluqini, emma bu weqelerde mes'uliyetning weqe peyda qilghuchilarda emes, xitay hökümitide ikenlikini bildürgen idi.

Ilham toxti shu qétimqi sözide 4 ‏ - awghust semen yoli weqesi üstidimu toxtalghan؛ xitayning terepning mezkur déloni qanuniy tertip boyiche élip barmaywatqanliqi we mehkumlarning adwokat tutushigha yol qoymaywatqanliqi üchün, mezkur heriketning xaraktéri heqqide éniq bir néme déyelmeydighanliqini, emma bu heriketlerning kélip chiqishida, rayondiki tengsiz siyasetning sewebchi ikenlikidin gumanlanmaydighanliqini bildürgen idi.

Dunya Uyghur qurultiyining bayanatchisi dilshat rishit bügün roytérs agéntliqigha bergen bayanatida , xitayning bu qétim , mehkumlarning adwokat tutushigha yol qoymighanliqi, a'ilisi bilen körüshtürmigenliki, jesitini a'ilisige qayturmighanliqi qatarliq qilmishi bilen xelq'ara qanun - tertiplerni yene bir qétim depsende qilghanliqini bildürdi.

Xitay hökümiti özlirige qarshi herqandaq shekildiki qarshiliq heriketlirini térrorluq herikiti dep eyiblimekte, emma Uyghur xelqi xitaygha qarshi herqandaq shekildiki qarshiliq heriketlirini erkinlik kürishi dep qarap kelmekte we hujumchilargha her waqit hésdashliqini bildürmekte.

Hörmetlik oqurmenler, yuqirida biz silerge 4‏ - awghust semen yoli weqesining hujumchiliri abduraxman azat bilen qurbanjan hémit üstidin ölüm jazasi ijra qilin'ghanliqi we uninggha qarita inkaslar anglattuq.