Қирғизистанда мустәқиллиқниң 19 йиллиқи хатириләнди

31 - Авғуст күни қирғизистан пайтәхти бишкәк шәһиридә қирғизистан мустәқиллиқиниң 19 йиллиқини хатириләш паалийити өткүзүлди.
Мухбиримиз азат
2010.09.02
Qirghiz-prezidenti-Roza-Otunbayewa-xanim-08312010-305 Сүрәт, қирғизистан президенти роза отунбайева 31 - авғуст күни қирғизистан пайтәхти бишкәк шәһиридә өткүзүлгән қирғизистан мустәқиллиқиниң 19 йиллиқини хатириләш марасимида.
AFP Photo

Әтигән саәт 9 йеримда қирғизистан президенти роза отунбайева башлиқ һөкүмәт рәһбәрлири вә һәр қайси дөләтләрниң қирғизистандики дипломатик органлириниң вәкиллири "алатав" мәйданидики 7 - апрел вәқәсидә қурбан болғанларни әсләш үчүн қоюлған хатирә таш алдиға гүл чәмбирәкләрни қойди.

Андин, роза отунбайева, һөкүмәт бинаси алдидики төмүр решаткиға орнитилған 7 - апрел вәқәсидә қаза қилған 86 нәпәр кишиниң исим - фамилиси оюлған дат басмас полат тахтиниң йопуқини ачти. Бу чағда пүтүн мәйданға йиғилған 5000 дин артуқ киши сүкүткә чөмди. Қирғизистан мусулманлириниң баш муптиси қуран тилавәт қилди.
 
Хатириләш паалийити дөләт гемини билән башланди. Қирғизистан мустәқиллиқиниң 19 йиллиқи билән барлиқ қирғизистанлиқларни тәбриклигән роза отунбайева мундақ деди: "һөрмәтлик вәтәндашлар вә меһманлар, алди билән һәммиңларни қирғизистан җумһурийити қурулғанлиқиниң 19 йиллиқи мунасивити билән чин йүрәктин тәбрикләймән һәмдә елимизгә тинчлиқ, бирлик вә иттипақлиқ тиләймән."

У йәнә 7 - апрелда қурбан болғанларни хатириләш йүзисидин қирғизистан һөкүмитиниң қарари билән "апрел хәлқ инқилабиниң батури" намида ордин тәсис қилинғанлиқини җакарлиди.
 
Қирғизистанниң нөвәттики иқтисади әһвали һәққидә тохталған роза отунбайева йилиға бир милярд киловат саәт ток ишләпчиқириш иқтидариға игә болған " қәмбәр ата - 2" су електир истансиси биринчи генераториниң қирғизистан мустәқиллиқиниң 19 йиллиқиға сунулған совға сүпитидә 30 - авғуст күни ишқа кириштүрүлгәнликини, йеқин кәлгүсидә пүттүрүш пиланланған " қәмбәр ата - 1 ", "қәмбәр ата - 2" су еликтир истансилири толуқ ишқа кириштүрүлгәндә, қирғизистанниң оттура асиядила әмәс, бәлки асия қитәсидиму електир енергийисини експорт қилиштики алдинқи қатардики дөләтләрниң бири болуп қалидиғанлиқини билдүрди.
 
Май, июн айлирида қирғизистанниң җәнубида йүз бәргән қанлиқ тоқунушлар һәққидә тохталған роза отунбайева бу тоқунушни пәйда қилғанларниң һәргизму қирғиз, өзбек милләтлиригә вәкиллик қилалмайдиғанлиқини, тоқунушни пиланлиғучиларниң қирғизистандин ибарәт бу көп милләтлик дөләттә милләтләр ара иттипақлиққа бузғунчилиқ қилиш арқилиқ қирғизистанни парчилаш һәмдә оттура асияни йәнә бир оттура шәрққә айландуруш қәстидә болуватқан күчләр икәнликини, шуниң үчүн милләтләр ара иттипақлиқниң қирғизистанниң кәлгүси тәрәққияти шундақла оттура асияниң муқимлиқи үчүн наһайити муһим икәнликини алаһидә тәкитлиди.

Йеқин арида өткүзүлидиған парламент сайлиминиң қирғизистанниң иҗтимаий турмушидики дәвр бөлгүч әһмийәткә игә тарихи бурулуш пәйда қилидиған зор сиясий қәдәм икәнликини оттуриға қойған роза отунбайева, бу сайламниң очуқ - ашкара вә адиллиқ билән өткүзүлүшигә капаләтлик қилиш үчүн, һәр қайси партийиләрдин сиясий рәңвазлиқларға бармаслиқни, өз мәнпәәтини дәп хәлқни парчилайдиған қилмишлардин нери болушни һәмдә қирғизистанниң дөләт мәнпәәтини һәммидин әла билгән асаста кәлгүсидики сиясий ислаһатларниң йетәкчилиридин болушни тәләп қилди.

Хатириләш мурасими аяғлашқандин кейин, роза отунбайева башлиқ һөкүмәт рәһбәрлири 7 - апрел қурбанлириниң уруқ - туғқанлири вә амма вәкиллири билән көрүшүп, улардин сәмими һал сориди.

Мустәқиллиқ күни мунасивити билән бүгүн бишкәк шәһиридики һәр қайси саяһәт нуқтилири вә бағчиларда һәр хил мәзмундики көңүл ечиш паалийәтлири уюштурулди. Йеқинда қирғизистан хәлқ ансамбили намиға еришкән қирғизистан уйғурлири иттипақ җәмийити қармиқидики "интизар" ансамбилиму өзиниң рәңдар сәнәт номурлири билән көңүл ечиш паалийәтлиригә қатнашти.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.