Qirghizistandiki prézidént saylimida almasbék atambayif yuqiri awazgha érishti

30-Öktebir küni qirghizistanda yéngi bir nöwetlik prézidént saylimi bolup ötti. Bu qirghizistan musteqil bolghandin kéyinki hakimiyetning tunji qétim tinch shekilde ötküzüp bérilishi bolup hésablinidu.
Ixtiyariy muxbirimiz azad qasim
2011-10-31
Share
almasbek-atambayef-305.jpg Almasbék atambayef saylam mezgilide bishkektiki bir kentte soz qilmaqta. 2011-Yili 27-öktebir.
AFP

Merkizi saylam komissiyisining bügünki eng yéngi melumatigha qarighanda, saylamgha qirghizistandiki saylighuchilarning 61% i qatnashqan. Hazirqi bash ministir, "Qirghizistan sotsiyal-dimokratlar partiyisi" ning rehbiri almasbék atambayif saylighuchilarning 63.19% Awazigha érishken. "Pütün qirghizistan"partiyisining rehbiri adaxan madimaruf we "Ata yurt" partiyisining prézidént namzati qamchibék tashiyéflar bolsa omumi saylighuchilarning 14.3% Hemde 14.7 % Awazigha ériship ikkinchi we üchinchi orun'gha chiqqan.

Bu qétimqi saylamda birleshken döletler teshkilati, yawropa ittipaqi, yawropa xewpsizlik we hemkarliq teshkilati qatarliq xelq'aradiki90 din artuq dölet,rayon we ammiwi teshkilatlardin kelgen 800 neper közetküchi saylamning ötküzülüshige nazaretchilik qilghan. Bügün ötküzülgen köp qétimliq axbarat élan qilish yighinlirida muxbirlarning so'allirigha jawab bergen közetküchiler, saylamning ochuq-ashkara, hökümet organlirining kontrolluqigha uchrimighan halda ötküzülgenlikini, gerche 500 din artuq saylighuchining tizimliktin özlirining isim-familisini tapalmasliq sewebidin saylamgha qatnishalmasliqtek sewenlikler yüz bergen bolsimu, bundaq yétersizliklerning saylamning omumi netijisige tesir yetküzelmeydighanliqini, saylamning xelq'arada étirap qilin'ghan démokratik prinsiplargha uyghun halda bolghanliqini mu'eyyenleshtürdi.

Epsuski, "Yéngilgen chilishqa toymaptu" dégendek, bu qétimqi saylamda ikkinchi we üchinchi orunda bolup qalghan adaxan madimaruf bilen qamchibék tashiyéf bu qétimqi saylamni inawetsiz dep qaraydighanliqini, saylamda hökümet organlirining arilishishi bilen köpligen qanun'gha xilap qilmishlarning sadir bolghanliqlirini bügünki muxbirlar bilen bolghan uchrishishlirida otturigha qoyushti. Ular musteqil bir komissiye tüzüp saylam béletlirini qayta tekshürüp chiqishni hemde merkizi saylam komissiyisini tarqitiwétishni telep qilishti.

Qalghan namzatlar bolsa, saylamning netijisini étirap qilidighanliqlirini ipadilep, almasbék atambayéfni tebriklidi hemde memliketning démokratik prinsiplar asasida tereqqiyat yoligha chüshüshige ümid bilen qaraydighanliqlirini tekitleshti.

Bügün jalal'abad oblastida qamchibék tashiyéfning qollighuchiliri kochilargha chiqip qayta saylam ötküzüshni telep qilip namayish qilishti hemde osh-özgen yolini tosup, eger özlirining telepliri orundalmisa namayish qilip bishkekkiche baridighanliqlirini bildürüshti. Osh shehiride bolsa saylamda tizimlikte öz isim-familisi bolmighanliq sewebidin saylamgha qatnishalmay qalghan 200 din köprek adem, özlirining qanuni hoquqlirining depsende qilin'ghanliqigha naraziliq bildürüp kochigha chiqishti.

Ichki xewpsizlik tarmaqlirining xadimliri gerche saylamdin kéyinki jem'iyet tertipining qanun organlirining kontrolluqida ikenlikini, xelqning tinch turmushigha tesir qilishi mumkin bolghan zor kölemlik qalaymiqanchiliqlarning yüz bérishige yol qoyulmaydighanliqini qayta-qayta tekitlewatqan bolsimu, tehlilchiler nöwettiki weziyetning kontrolluqtin chiqip kétish xewpide turuwatqanliqini bildürüshmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet