Qirghizistan osh oblastida herbiy halet jakarlidi

Süret, 2010 - yili 11 - iyun, qirghiz amanliqni saqlash eskerliri osh shehiri kochilirini charlawatqan körünüsh.

Melumatlargha qarighanda, bu qétimqi toqunushta kam dégende 34 adem ölüp, 400 din artuq adem yarilan'ghan. Sehiye ministiri wezipisini ötewatqan damire xanimning muxbirlargha bergen jawabigha qarighanda, ölgenlerning köp qismi oq tégip ölgenler iken. U yene 40 ademning éghir ehwalda ikenlikini bayan qildi.

Nöwette, qirghizistan waqitliq hökümiti osh oblastining bir qisim rayonlirida 20 - iyun'gha qeder herbiy halet yolgha qoyulghanliqini jakarlidi. Melum bolushiche weqedin kéyin, osh shehirige kirip - chiqidighan barliq yollar qamal qilinip, bashqa jaylardin osh shehirige kélidighanlargha chek qoyulghan. Osh oblastining özbékistan bilen chégrilinidighan barliq qarawulxanilirida jiddiy halet yürgüzülgen.

Qirghizistan chégra qisimlirining mu'awin bash qomandani cholpanbék tursunbékuwning "azadliq" radi'osigha bergen melumatigha qarighanda, özbékistan terep chégra rayonlargha alahide qisimlarni orunlashturushqa bashlighan.

Melum bolushiche, hazirghiche osh shehiride bulap - talan'ghan we köydürüwétilgen soda sarayliri, ammiwi esliheler we shexsiylerning öyliri 100 din ashqan. Ot öchürüsh üchün körsitilgen tirishchanliqlar toqunushqan tereplerning tosqunluqliri sewebidin héchqandaq netije bermigen.

Nöwette, qirghizistan waqitliq hökümiti yüz bergen toqunushni tinjitish üchün zörür tedbirlerni qollanmaqta. Xewerlerdin melum bolushiche, waqitliq hökümet mu'awin bash ministirliri ömürbék tékibayiw, ezimbék béknazaruw we dölet mudapi'e ministiri isma'il isxaquw qatarliq rehberlerni osh oblastigha ewetken.

Hazir waqitliq hökümet tanka, bronéwiklar bilen qorallan'ghan armiye we alahide saqchi qisimlirini osh oblastining osh shehiri qatarliq jaylargha kirgüzüp, ammiwi tertipni eslige keltürüshke tirishiwatqan bolsimu, emma weziyetning yenila xeterlik halette turuwatqanliqi melum bolmaqta.

Tünügün yüz bergen toqunushta köpligen yerlerdiki ahalini gaz bilen teminligüchi néfit - gaz turubiliri zeximlen'genliki sewebidin, bügün osh sheherlik gaz bilen teminlesh tarmaqliri sheher ahalisige gaz bérishning waqitliq toxtitilghanliqini uqturdi. Kocha xewerliridin melum bolushiche, hazir yene xelq arisida ichimlik sugha zeher tashlan'ghanliqi heqqidimu gepler tarqalghan.

Rusiye terepning xewiridin melum bolushiche, qirghizistan waqitliq hökümitining mu'awin bash ministiri ömürbék tékibayiw rusiye axbarat agéntliqi muxbirining so'aligha jawab bérip, waqitliq hökümetning weziyetni kontrol qilishqa iqtidarining bar ikenlikini, chet'el qoshunlirining teklip qilinmaydighanliqini bildürgen.

Waqitliq hökümetning yene bir mu'awin bash ministiri ezimbék béknazaruw bolsa bu qétimqi toqunushni uyushturghan öktichi küchlerni eyiblidi. Ezimbék béknazaruw sözide, waqitliq hökümetke qarshi öktichi küchlerning meqsiti, 27 - iyun ötküzülidighan qirghizistan asasiy qanunigha awaz bérish pa'aliyitige tosqunluq qilish ikenlikini ilgiri sürüp, bu küchlerning shangxey hemkarliq teshkilati bashliqlar yighinining tashkentte ötküzülüwatqan peytini tallap turup, waqitliq hökümetning abruyini chüshürüsh meqsitide bu toqunushni pilanlighanliqini eyiblidi.

Bügün qirghizistanning béshkek shehiride 600 oshuq adem parlamént binasi aldigha topliship Waqitliq hökümettin mashina qatarliq qatnash qorallirini ajritip özlirini osh shehirige yetküzüp qoyushni telep qildi. Kech sa'et 9 lar chamisida minggha yéqin adem döletlik téléwiziye istansisi aldigha toplishiwélip, waqitliq hökümetning osh oblastida yüz bergen weqelerni eynen körsitishke tosqunluq qilghanliqigha naraziliq bildürdi.

Nöwette, osh oblastida yüz bergen bu qétimqi milliy toqunushqa qarita amérika, rusiye qatarliq döletler öz endishilirini bildürmekte. Rusiye prézidéntining qirghizistandiki alahide wekili we amérikining qirghizistandiki bash elchisi tatiyana xanim muxbirlarning ziyaritini qobul qilip, waqitliq hökümetning tedbirlirini qollaydighanliqlirini bildürdi. Rusiye terep toqunushuwatqan tereplerni ziddiyetlerni tinchliq yoli bilen hel qilishqa chaqirmaqta.

Yuqiridiki awaz ulinishidin, bu heqtiki melumatimizning tepsilatini anglaysiler.