Қирғизистанниң җәнубидики тоқунуш пәсийишкә йүзләнди

Сүрәттә, 14 - ийун, ош шәһириниң айродром әтрапини сақлаватқан қирғиз әскәрлири.

Өз - ара етишишлар вә инсанпәрвәрлик ярдими илип кетиватқан аптомобилларға қол селиш вәқәлири анда - санда йүз берип туруватқан болсиму, вақитлиқ һөкүмәт җәнубқа әвәткән һәрбий қисимлар вә алаһидә сақчи қисимлириниң кәскин тәдбирлири нәтиҗисидә, ош, җалалабад шәһәрлиридә нисбий тинчлиқ вәзийити шәкилләнди.

Ош шәһиридә икки нан завути ишқа кириштүрүлүп, инсанпәрвәрлик ярдими сүпитидә кәлгән унлар билән нан, болка қатарлиқлар тәйярлинип ачарчилиқта қалған аммиға тарқитип берилишкә башлиди. Җалалабад шәһиридики базарлар, сода дуканлири ечилип, һөкүмәт органлири нормал тәртиптә ишләшкә башлиди.

Итар агентлиқиниң 15 - июндики мәлуматиға қариғанда, бу қетимқи тоқунушта өй - маканлирини ташлап кетишкә мәҗбур болған қачақларниң сани 275 миңдин ешип кәткән. яврупа иттипақи қачақларға инсанпәрвәрлик ярдими тәриқисидә алтә данә ил - 76 айропилан билән озуқ - түлүк вә дора - дәрмәкләрни әвәтишни қарар қилған болуп, бу айрупиланларниң биринчиси 16 - июн күни өзбекистанниң әнҗан шәһиригә кәлмәкчи.

Қирғизистан сәһийә министирлиқи тарқатқан мәлуматлар бойичә, тоқунушта өлгәнләрниң сани 178 гә, яриланғанлар 1800 гә йәткән. Вақитлиқ һөкүмәт башлиқи роза отунбайева 15 - июн бишкәк шәһиридики амма вәкиллири билән болған учришишида өлгән вә яриланғанларниң һәқиқий саниниң буниңдинму көп болуши мумкинликини ейтқан.

Роза отунбайева сөзидә, бу тоқунушни тәхиттин қоғланған сабиқ президент қурманбек бақийеф аилисидикиләрниң пиланлиғанлиқини, уларниң 27 - июн өткүзүлидиған омуми хәлқниң асасий қанунға аваз бериш паалийитигә бузғунчилиқ қилиш арқилиқ вақитлиқ һөкүмәтни ағдуруп өзлириниң аиливи һөкүмранлиқини әслигә кәлтүрүш қәстидә болуватқанлиқини қаттиқ әйиблигән һәмдә аваз бериш паалийитиниң өз вақтида өткүзүлидиғанлиқини елан қилған.

Қирғизистан дөләт хәвпсизлик комитетиниң башлиқи кеңәшбек дүшебайиф дөләтлик телевизийә қанилиниң зияритини қобул қилип сөзлигән сөзидә, әнглийидә қолға елинған максим бақийефни қирғизистанға қайтуруп келиш үчүн баш прокурор билән бирликтә тегишлик материялларниң тәйярлиниватқанлиқини, бу қетимқи тоқунушни максим бақийефниң бивастә пиланлиғанлиқи һәққидә ишәнчилик пакитларниң барлиқини, бу тоқунушни пиланлашқа қатнашқан һәмдә өз вақтида қурманбек бақийеф һакимийитидә хизмәт қилған бир түркүм кишиләрниң қолға елинғанлиқини ашкарилиған.

Итар агентлиқиниң бүгүнки хәвиригә қариғанда, белорусийә һөкүмити қирғизистан баш прокруриниң қурманбек бақийефни қирғизистанға қайтуруп бериш тәлипини рәт қилған һәмдә "сиясий мәсилиләр қайтуруп беришниң асаси болалмайду" дәп көрсәткән.

Нөвәттә, қирғизистанниң һәр қайси җайлиридин ош, җалалабад областлириға инсанпәрвәрлик ярдими топлаш паалийәтлири давам қиливатиду.

Юқиридики аваз улинишидин, бу һәқтики мәлуматимизниң тәпсилатини аңлайсиләр.