Qirghizistanning jenubidiki toqunush pesiyishke yüzlendi

Qirghizistan waqitliq hökümitining bir qatar keskin tedbirlerni qollinishi netijiside, qirghizistanning osh, jalal'abad oblastlirida yüz bergen toqunushlar pesiyishke yüzlendi.
Muxbirimiz azat
2010-06-15
Élxet
Pikir
Share
Print
Sürette, 14 - iyun, osh shehirining ayrodrom etrapini saqlawatqan qirghiz eskerliri.
Sürette, 14 - iyun, osh shehirining ayrodrom etrapini saqlawatqan qirghiz eskerliri.
AFP Photo

Öz - ara étishishlar we insanperwerlik yardimi ilip kétiwatqan aptomobillargha qol sélish weqeliri anda - sanda yüz bérip turuwatqan bolsimu, waqitliq hökümet jenubqa ewetken herbiy qisimlar we alahide saqchi qisimlirining keskin tedbirliri netijiside, osh, jalal'abad sheherliride nisbiy tinchliq weziyiti shekillendi.

Osh shehiride ikki nan zawuti ishqa kirishtürülüp, insanperwerlik yardimi süpitide kelgen unlar bilen nan, bolka qatarliqlar teyyarlinip acharchiliqta qalghan ammigha tarqitip bérilishke bashlidi. Jalal'abad shehiridiki bazarlar, soda dukanliri échilip, hökümet organliri normal tertipte ishleshke bashlidi.

Itar agéntliqining 15 - iyundiki melumatigha qarighanda, bu qétimqi toqunushta öy - makanlirini tashlap kétishke mejbur bolghan qachaqlarning sani 275 mingdin éship ketken. Yawrupa ittipaqi qachaqlargha insanperwerlik yardimi teriqiside alte dane il - 76 ayropilan bilen ozuq - tülük we dora - dermeklerni ewetishni qarar qilghan bolup, bu ayrupilanlarning birinchisi 16 - iyun küni özbékistanning enjan shehirige kelmekchi.

Qirghizistan sehiye ministirliqi tarqatqan melumatlar boyiche, toqunushta ölgenlerning sani 178 ge, yarilan'ghanlar 1800 ge yetken. Waqitliq hökümet bashliqi roza otunbayéwa 15 - iyun bishkek shehiridiki amma wekilliri bilen bolghan uchrishishida ölgen we yarilan'ghanlarning heqiqiy sanining buningdinmu köp bolushi mumkinlikini éytqan.

Roza otunbayéwa sözide, bu toqunushni texittin qoghlan'ghan sabiq prézidént qurmanbék baqiyéf a'ilisidikilerning pilanlighanliqini, ularning 27 - iyun ötküzülidighan omumi xelqning asasiy qanun'gha awaz bérish pa'aliyitige buzghunchiliq qilish arqiliq waqitliq hökümetni aghdurup özlirining a'iliwi hökümranliqini eslige keltürüsh qestide boluwatqanliqini qattiq eyibligen hemde awaz bérish pa'aliyitining öz waqtida ötküzülidighanliqini élan qilghan.

Qirghizistan dölet xewpsizlik komitétining bashliqi kéngeshbék düshébayif döletlik téléwiziye qanilining ziyaritini qobul qilip sözligen sözide, en'gliyide qolgha élin'ghan maksim baqiyéfni qirghizistan'gha qayturup kélish üchün bash prokuror bilen birlikte tégishlik matériyallarning teyyarliniwatqanliqini, bu qétimqi toqunushni maksim baqiyéfning biwaste pilanlighanliqi heqqide ishenchilik pakitlarning barliqini, bu toqunushni pilanlashqa qatnashqan hemde öz waqtida qurmanbék baqiyéf hakimiyitide xizmet qilghan bir türküm kishilerning qolgha élin'ghanliqini ashkarilighan.

Itar agéntliqining bügünki xewirige qarighanda, bélorusiye hökümiti qirghizistan bash prokrurining qurmanbék baqiyéfni qirghizistan'gha qayturup bérish telipini ret qilghan hemde "siyasiy mesililer qayturup bérishning asasi bolalmaydu" dep körsetken.

Nöwette, qirghizistanning her qaysi jayliridin osh, jalal'abad oblastlirigha insanperwerlik yardimi toplash pa'aliyetliri dawam qiliwatidu.

Yuqiridiki awaz ulinishidin, bu heqtiki melumatimizning tepsilatini anglaysiler.

Toluq bet