Qizil naxsha éytish-mirasxorlar hakimiyitining perde échish neghmisi

Xitayda hazir qizil naxsha éytish herikiti qozghitilmaqta. Bu, kommunist partiyining 18‏-qurultiyida textke chiqidighan mirasxorlar hakimiyitining perde échish neghmisi.
Muxbirimiz weli
2011.06.20
qizil-naxsha-305.jpg Chungchingdiki kishilerning baghchigha yighilip qizil naxsha éytiwatqan körünüshi. 2011-Yili 20-aprél.
AFP

Xitayning in'glizche xelq géziti yéqindin buyan, xelq ammisi kommunist partiyige bolghan muhebbiti urghup-téship, qizil naxsha éytish herikitini bashlidi dep teshwiq qilishqa bashlighan idi. Bügün yene, tyenjindiki yash ösmürler qizil naxsha éytish herikitini qozghiwetti dep xewer qildi.

“Los anjilis post” gézitining bayan qilishiche, xitayda qozghitilghan qizil naxsha herikiti, xitay boyiche nopusi eng köp ölke dep hésablinidighan sichüendiki eng chong sheher-chungchinda bashlandi. Bu herikette éytilghan qizil naxshilar, maw zédung 36 milyon ademge siyasiy ziyankeshlik qilghan we bir milyon 500 ming ademni qiynap öltürgen “Medeniyet inqilabi” da, maw zédungperesler éytqan naxshilar. Bundaq qizil naxsha éytish herikitini, chungchin shehirining partkom bashliqi, mirasxor bö shiley, xitay merkizi komitétining da'imiy ezasi bolush üchün qozghighan.

Amérikining chikago shehiride chiqidighan “Xuféngtun post” gézitining bayan qilishiche, xitay kommunist partiyisi özining 90 yilliqini xatirilesh üchün, hazir qizil naxsha éytish herikitini qozghidi. Bu herikette éytilghan naxshilar pütünley “Medeniyet inqilabi” dégen siyasiy herikette éytilghan, xuddi “ Kommunist partiye bolmisa junggo bolmaytti”, “Kommunist partiyige egishimiz” dégendek naxshilar.

Hazir xitayda qozghitilghan qizil naxsha éytish herikitige, “Medeniyet inqilabi” ni körmigen, emma bu heqte herxil hékayilerni anglap chong bolghan yash ösmürler özgiche qarashta. Jéjyangdiki 14 yashliq bir ottura mektep oqughuchisi mezkur gézitning muxbirigha, eyni waqitta bundaq naxshilarni xelq chin qelbidin hayajanlinip éytqanmu yaki mejburlinip éytqanmu, shuni bilgüm kélidu, dégen.

“Boshün” torgézitining bayan qilishiche, xitay kommunist partiyisining 17-qurultiyida, kommunist partiyining hakimiyitini qurushqa qatnashqan “Péshqedem inqilabchilar” ning mirasxorlirigha xéli köp orun bérilgen (bundaq mirasxorlarni mulahizichiler begzadiler, kommunistlarning jeddi-jemeti depmu ataydu. Bezi sha'irlar, naxshichilar ularni qizilbayraqning tuxumliri depmu atighan) idi. Bundaq orunlashturush kommunist partiye péshqedemliridin chén yün, déng yünchawlarning, hakimiyetni balilirimizgha tapshurup bérimiz, ular héchbolmighanda ata-anilirigha qarshi chiqmaydu, dégen tapshuruqi boyiche bolghan. Mana hazir shu mirasxorlar 18‏-qurultayda hakimiyet béshigha chiqish aldida turmaqta. Ular hazir xelqning himayisini qolgha keltürüsh üchün, xu jintaw dewride peyda bolghan xiyanetchilikke qarshi turush sho'arini towlap meydan'gha chiqti.

Siyasiy mirasxorlarni iz basar qilish xitay kommunist partiye qolliniwatqan qandashliq siyasiti. Hazir sichüende qizil naxsha éytish herikitini qozghighan bö shiley, del “Medeniyet inqilabi”dewride, maw zédunggha egiship “Qehriman atining balisi ezimet” dégen sho'arni towlap, dadilirining siyasiy reqiblirige ziyankeshlik qilghan esheddiy chomaqchilarning biri.

“Xu'asha munazire munbiri” dégen tor gézitide élan qilin'ghan chungchindin yézilghan bir obzorda bayan qilinishiche, chungchin shehirining qizil naxsha ömiki yéqinda béyjinggha kélip, azadliq armiye ikkinchi topchi qisim kilobi, béyjing herbiy rayon kilobi, milletler medeniyet sariyi qatarliq chong kulublarda qizil naxsha kéchiliki ötküzgen. Uninggha bö shiley özi qatnashqan. Béyjingliqlar hazir bu qizil naxsha herikitini, solgha burulush signali dep qarimaqta.

Obzorda éytilishiche, chungchinda köpchilik xelq qizil naxsha éytishqa soghuq mu'amile qilidu. Birinchidin xelq hazir bundaq sol éqimni xalimaydu, ikkinchidin qizil naxsha éytish zaman'gha mas kelmeydighan tetür éqim.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.