Мәсчит һәрәмдә хәлқаралиқ қуран мусабиқиси өткүзүлди

2011 - Йили 12 - айниң 19 - күнидин 26 - күнигичә мәсчит һәрәмдә өткүзүлгән хәлқаралиқ қуран кәрим мусабиқисиниң нәтиҗилири елан қилинди.
Ихтияри мухбиримиз өмәрҗан
2012-01-09
Share
quran-musabiqisi-305.png Қуран мусабиқисида нәтиҗигә еришкәнләр кишиләр
Photo: RFA

Қуран кәрим мусабиқисигә сәуди әрәбистанида интайин зор әһмийәт берилиду вә мусабиқә наһайити дағдуғилиқ өткүзилиду. 33 Йилдин бири һәр йили сәуди әрәбистаниниң мәккә мукәррәмә шәһиридә хәлқаралиқ қуран кәрим мусабиқиси өткүзүлүп кәлгән болсиму, бу йилқи мусабиқә мәсчит һәрәмниң ичидә өткүзүлгәнлики вә иштиракчилириниң көплүки билән алдинқи йиллардики мусабиқиләрдин алаһидә пәрқлинип туриду.

Хәлқаралиқ қуран кәрим мусабиқиси дәсләптә һиндунизийидә мундин 50 йил илгири йолға қоюлған болуп, сәуди әрәбистанида 33йилдин бири давам қилип кәлмәктә.

Сәуди әрәбистанида чиқидиған“әл вәтән”, “әл мәдинә” вә“оказ”гезитлириниң сәһипиридә, сәуди әрәбистаниниң мәккә мукәррәмә шәһиридә өткүзүлгән хәлқаралиқ қуран кәрим мусабиқиси вә униң нәтиҗилиригә көп орун берилгән.

Мәзкур гезитләрдики хәвәрләргә көрә, хәлқаралиқ қуран кәрим мусабиқиси 2011 - йили12 - айниң 19 - күнидин 26 - күнигичә мәсчит һәрәмниң ичидә давам қилған. Мусабиқигә африқа, асия вә явропа қитәлиридин, шундақла америкидин болуп, җәми53дөләттин 161 киши иштирак қилған. Мусабиқигә иштирак қилғучиларни баһалап уларға дәриҗә бериш үчүн сәуди әрәбистанидин4, башқа дөләтләрдин6, җәми 10 киши бәлгиләнгән болуп, мусабиқә нәтиҗиси шуларниң баһаси билән күчкә игә қилинған.

Мусабиқә соаллири вә дәриҗиси


Мәсчит һәрәмдә өткүзүлгән 33 - нөвәтлик хәлқара қуран кәрим мусабиқиси иштиракчилирини 5 гуруппиға бөлүп мусабиқә елип барған. Биринчи гуруппиға 30пара қуран кәримни толуқ ядлиған, қуран оқуш қаидилирини яхши өгәнгән вә тәпсириниму билгәнләр, иккинчи гуруппиға қуран кәримни толуқ ядлиған вә қуран оқуш қаидилирини билгәнләр, үчинчи гуруппиға қуран кәримдин 20пара ядлиғанлар, төтинчи гуруппиға қуран кәримдин 10пара ядлиғанлар, бәшинчи гуруппиға қуран кәримдин5 пара ядлиғанлар қатнаштурулған.

Мусабиқигә қатнашқан һәр бир кишигә, униң келип кетиш, йетп - қопуш вә йемәк - ичмәк чиқимлирини көтүргәндин башқа миң доллардин нәқ пул берилгәнниң сиртида, мусабиқидә утуп чиққан 25 кишиниң һәр биригә алған дәриҗисигә қарап нәқ пул вә қиммәт баһалиқ һәдийә қатарлиқлар тарқитилған.

Мәзку гезитләрдә тәкитлишичә, сәуди әрәбистани һөкүмити хәлқаралиқ қуран кәрим мусабиқиси йолға қоюлғандин бири 100 милйон риял( тәхминән 26милйон доллар) дин көпрәк пул сәрп қилған. Һазирғичә 500миңдин көпрәк адәм мусабиқигә иштирак қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт