Uyghurlarning qurban héyt harpisidiki hés - tuyghuliri

Qedirlik oqurmenler, dunya musulmanlirining en'eniwi bayrimi, uluq qurban héyt harpisi bolghan mushundaq bir künlerde, Uyghurlar dunya musulmanliridin perqliq halda, "5 - iyul ürümchi weqesi" ning jarahetliri téxi saqaymighan halette, éghir qayghu we musibetler ichide, bu yilliq qurban héyt bayrimini kütüwalmaqta.
Muxbirimiz mihriban
2009-11-25
Share
Uyghur-eli-Urumqide-roza-heyt-305.jpg Süret, ürümchi noghay meschiti hoylisida ötküzülgen roza héyt samasidin bir körünüsh bolup, qaysi yili ikenliki namelum.
youtube.com Din élindi.

Bu yilqi qurban héytning yillardikidin perqliq yéri shuki, gerche ürümchi iyul weqesige 5 ay bolup qalghan bolsimu, xitay hökümiti Uyghur élide yenila qattiq basturush siyasitini qollinip, Uyghur aptonom rayonining chet'eller bilen bolghan barliq intérnét we téléfon alaqilirini üziwétip, weten ichidiki basturush herikitini dawamlashturuwatqanliqi üchün, biz wetendiki Uyghurlar bilen alaqilishish, ular bilen téléfonda körüshüsh imkaniyitige ige bolalmiduq.

Emma türlük sewebler bilen chet'ellerde muhajirette turuwatqan Uyghur qérindashlirimiz ziyaritimizni qobul qilip, özlirining dunya musulmanlirining en'eniwi bayrimi bolghan qurban héyt bayrimi kélish harpisidiki murekkep hés -  tuyghulirini ipadilidi. Ular sözliride, özlirining wetende xitayning zulumi astida yashawatqan uruq - tughqan, dost - buraderlirige bolghan otluq salimini yollash bilen bille, bu yil yaz peslide ürümchide yüz bergen " 5 ‏- iyul weqesi" de, xitay hökümitining qanliq basturushida ölüp ketken hem türmide yétiwatqan yash - oghul qizlar üchün öz qayghulirini ipadilidi, ularning uruq - tughqanliridin semimiy hal soridi.

Amérikida yashawatqan nurmemet ependi ziyaritimizni qobul qilip, bu yilliq qurban héyt bayrimining Uyghurlar üchün alahide bir dewrge toghra kelgenlikini bayan qildi. U sözide, pütün dunya musulmanlirining bayrimi bolghan qurban héyt bayrimida, Uyghurlarning murekkep hés tuyghular ichide 5 - iyul weqeside xitay kommunist hakimiyiti teripidin öltürülgen, qolgha élinip, türmilerde qiynaq astida turuwatqan, iz - déreksiz yoqap ketken Uyghur qiz - oghullirini yad étish bilen musibet ichide kütüwéliwatqanliqini bayan qildi.

Nurmemet ependi, xitay hökümitining mushundaq bir bayram mezgilidimu, Uyghurlargha qaratqan basturush, teqib astigha élish, insanning eng eqelliy bolghan kishilik hoquq erkinlikinimu depsende qiliwatqanliqini eyiblidi.

Wetendiki türlük bésimlar sewebidin wetende turush imkaniyiti bolmay, yawropadiki melum bir dölette turushqa mejbur bolghan bir Uyghur yash özining shu taptiki murekkep hés - tuyghusini hem qayghusini ipadilidi.

Özining Uyghur medeniyiti ipadilen'gen bir yürüsh resimliri arqiliq, Uyghurlar we Uyghur medeniyitining chet'ellerde tonulushigha bir kishilik hessisini qoshup kéliwatqan, ressam merwayit xanim ziyaritimizni qobul qilip, özining weten'ge bolghan séghinishini ipadilesh bilen bille, wetendiki uruq ‏- tughqan, dost ‏-buraderlirige bolghan salimini yollidi.

Qedirlik oqurmenler, musulmanlarning uluq bayrimi bolghan qurban héyt munasiwiti bilen erkin asiya radi'o istansis Uyghur bölümi'idiki barliq xizmetchi xadimlirimiz namidin weten ichi we sirtidiki Uyghur qérindashlarning ténige salametlik, turmushigha xatirjemlik, künlirige xushalliq tileymiz.
 
 
Anonymous says:
Nov 26, 2009 01:32 AM

0081-3-4580-7301

Anonymous says:
Nov 25, 2009 03:13 PM

Köz yéshidiki wetenni chongqur séghinish ichide qurban héytni kütiwilish ﯪldida turuptimiz...
Biz üchün héyt -héyt emes...Biz üchün eng xushallinarliq héyt ,shéhitlirimizning eziz rohi ﯪram tapqan, türmidiki qiz-yigitlirimiz erkinlikke érishken, közimizdiki, qelbimizdiki ﯪzap yashliri tügigen kün...

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet