Ablikim abduréhimning qolgha élin'ghanlighi - dunyaning közide

2007-04-20
Élxet
Pikir
Share
Print

Amérika hökümiti we xelq'ara kechürüm teshkilati qatarliq kishilik hoquq teshkilatliri, xitay hökümitining Uyghur milliy herikitining rehbiri we dunya Uyghur qurultiyining re'isi rabiye qadir xanimning oghli ablikim abdurehimni intérnétte bölgünchilikni terghib qilidighan maqalilerni tarqatqan we ammini xitay hökümitige qarshi heriket qilishiqa qutratqan dep eyiblep, 9 yilliq qamaq jazasigha höküm qilghanliqigha inkas qayturdi.

Urümchi rayonluq sot mehkimisining, Uyghur milliy herikitining rehbiri we dunya Uyghur qurultiyining re'isi rabiye qadir xanimning oghli ablikim abdurehimni,"intérnét torida bölgünchilikni terghib qilidighan maqalilarni tarqatqan, ammini hökümetke qarshi heriketke qilishqa qutratqan, kishilik hoquq we azsanliq milletler siyastini burmilaydighan maqalilerni yazghan" dégen jinayet bilen eyiblep, 9 yilliq qamaq jazasigha höküm qilghanliqi xelq'ara jama'etning qattiq tenqidige uchridi.

Amérikaning inkasi

Amérika tashqi ishlar minstirliqining bayanatchisi jowanni mor peyshenbe küni, urümchi rayonluq ottora sot mehkimisning rabiye qadir xanimning oghli ablikim abdurehimni 9‏ yilliq qamaq jazasigha höküm qilghanliqi munasiwiti bilen erkin asiya radi'osigha bergen bayanatida, amérika hökümitining rabiye qadir xanimning oghli ablikim abdurehimning 9 yilliq qamaq jazasigha höküm qilin'ghanliqidin epsuslan'ghanliqini bildürdi.

Jowanni mor radi'omizgha bergen bayanatida mundaq dédi": amérika hökümti ablikimge yöklen'gen jinayetler we rabiye qadirning yene ikki oghligha bérilgen jaza heqqide özlirining endishilirini bayan qilip kelmekte. Amérikining béyjingdiki bash elchixanisi xitay hökümiti bilen élip bérilghan söhbetlerde sot jeryanining hemde bérilgen hökümning adaletlik bolghan ‏- bolmighanliqi mesilisini otturigha qoydi. Biz bu mesilini dawamliq küzitimiz."

Kishilik hoquq teshkilatlirining inkasi

Xelq'ara kishilik hoquq teshkilatliri Uyghur milliy herikitining rehbiri we dunya Uyghur qurultiyining re'isi rabiye qadir xanimning oghli ablikim abdurehimning 9 yilliq qamaq jazasigha höküm qilin'ghanliqini qattiq tenqid qildi.

Xelq'ara kechürüm teshkilati peyshenbe küni bir bayanat élan qilip, xitay hökümitining ablikim abdurehimini 9 yilliq qamaq jazasigha höküm qilghanliqini qattiq tenqid qilip, xita'i rehberlirini ablikim abdurehimge shundaqla alim abdurehim we qahar abdurehimge özini aqlash pursiti bérishke chaqirdi.

Xelq'ara kechürüm teshkilatining bayanatida, xitay sot mehkimisining ablikim abdurehimni 9 yilliq qamaq jazsigha höküm qilghanliqi, béyjing hökümitining Uyghurlarning kishilik hoquqi üchün pa'aliyet élip bériwatqan rabiye qadirdin 1999‏- yili uni qolgha élish bilen bashlan'ghan üch élish herikitining dawami dep körstilgen.

Wakaletsiz milletler we xelqler teshkilatining inkasi

Merkizi gollandiyidiki wakaletsiz milletler we xelqler teshkilati rabiye qadir xanimning oghli ablikim abdurehimning 9 yilliq qamaq jazasigha höküm qilin'ghanliqi munasiwiti bilen élan qilghan bayanatida, rabiye qadir xanim xitay hökümitining agahlandurushlirigha qarimay, Uyghurlarning kishilik hoquqi üchün élip bériwatqan pa'aliyetlirini özlüksiz dawamlashturup kelmekte. Ablikim abdurehimning 9 yilliq qamaq jazsigha höküm qilin'ghanliqi, xitay hökümitining rabiye qadir xanimgha qaratqan tehditlirini emelge ashuruwatqanliqini körsitidu dep tekitligen.

Wekaletsiz milletler we xelqler teshkilatining bayanatida, yene mundaq déyilgen " biz xitay hökümitining rabiye qadir xanimning sherqiy türkistan xelqining kishilik hoquqi we démokratiyisi üchün élip bériwatqan pa'aliyetliri üchün uning a'ilisini jazalash qilmishini qattiq eyibleymiz. Ablikim abdurehimning 9 yilliq qamaq jazasigha höküm qilin'ghanliqi, ablikimning adaletlik sotlinish we özini aqlash hoquqini depsende qilipla qalmastin, xitay hökümitining kishilik hoquq we démokratiyige hörmet qilidighan bir dölet bolushtin qanchilik uzaq ikenlikini ispatlap béridu. Wakaletsiz milletler we xelqler teshkilati rabiye qadir xanim we dunya Uyghur qurultiyining sherqiy türkistan xelqining kishilik hoquqi we démokratiyisi üchün tinchliq élip bériwatqan pa'aliyetlirini dawamliq qollaydu." (Ömer qanat)

Pikirler (0)
Share
Toluq bet