'Муһәббәтниң 10 шәрти' намлиқ һөҗҗәтлик филим тәйвәнни ләрзигә салди

'Муһәббәтниң 10 шәрти' намлиқ һөҗҗәтлик филим тәйвәнниң һәммә йерини ләрзигә салди. Тәйвән президенти ма йиңҗуниң хитай сиясити хәтәргә дуч кәлди.

2009-10-23
Share
Rabiye-Xanim-Filim-Festiwalida-sozde-305 2009 - Йили 8 - авғуст, рабийә қадир ханим австралийиниң мелбурн шәһридә өткүзүлгән хәлқаралиқ филим фестивалида, "муһәббәтниң 10 шәрти" намлиқ филимниң тунҗи қойулуш мурасимида сөз қилмақта.
AFP Photo

Франсийә агентлиқиниң баян қилишичә, буниңдин бурун тәйвән һөкүмитиниң ички ишлар министири 'рабийә қадирға тәйвәнниң бихәтәрлики үчүн виза берилмәйду, униң тәшкилатниң америка бекиткән шәрқий түркстан ислам һәрикити дегән террорчи тәшкилат билән мунасивити бар' дәп җакарлиған иди. Униңдин кейин, рабийә қадир буниңға қарита, өзиниң яки тәшкилатиниң һечқандақ бир террорчи тәшкилат билән мунасивити йоқлуқини җакарлап рәддийә бәргән иди.

Ма йиңҗуниң сөзидин кейин тәйвәндә йәнә рабийә қадир һәққидә муназирә башланди

Франсйә агентлиқиниң баян қилишичә, тәйвәндә һазир рабийә қадир һәққидә қозғалған бәс - муназирә вә давалғуш -- тәйвәндә чиқидиған 'алма гезити' уйғур рәһбири рабийә қадирға виза бәрмәслик һәққидә сегнал бәргән тәйвән президенти ма йиңҗудин 'рабийә қадир террорчиму' дәп сориғанда, президент ма пәқәт 'әмәс' дәпла җаваб бәргән, әмма буниңға даир соралған башқа соалларға җаваб бәрмәй турувалғандин кейин мәйданға чиқти.

Бүгүн тәйвән учур вастилири дуня уйғур қурултейиниң рәиси рабийә ханим һәққидә ишләнгән 'муһәббәтниң 10 шәрти' намлиқ һөҗҗәтлик филим тәйвәнниң һәммә йерини ләрзигә салди, дәп хәвәр қилди. Шундақла, тәйвәндә һәр саһәдин ма йиңҗу һөкүмитиниң хитай сияситигә берилгән баһалар, соралған суаллар, һәтта тәйвән мәмури мәһкимисидә бу һәқтә елип берилған җиддий муназириләр вә тәнқидләрни ютубқа қойди.

'Буниңдин кейин коммунист партийә милтиқ көтүрүп кәлсиму, биарам қилмаймиз, дәп тосмамсән?'

Бүгүн тәйвән учур вастилири елан қилған ютублардин мәлум болушичә, тәйвән мәмури мәһкимисиниң башлиқи ву дүнйи 'чоң қуруқлуқтин тәйвәнгә келидиған шунчә көп адәмни биарам қилидиған ишни қилмаслиқ керәктә' дегәндин кейин, муназириләр наһайити кәскин болди. Қанун палатасиниң әзаси гуән билин 'далай лама кәлсиму, бизниң ички ишимизға арилишивалса, кино қойсақму арилишивалса, бу қандақ гәп? арилашма десәк биарам боламдикән? әмди буниңдин кейин милтиқ көтүрүп кәлсиму, биарам қилмаймиз, дәп тосмамсән? дәп соал сориди. Мәмури мәһкиминиң йәнә бир әзаси 'гоминдаңчилар билән гоңчәндаңчиларниң һәммиси бир йолдики адәмләр' дәп көрсәтти.

'Алма гезити'ниң баян қилишичә, бундақ әһвал астида, атәйвәнниң муавин ички ишлар мниситири чен тәйляң бүгүн рабийә қадирға виза берилмигәнликиниң сәвәби һәққидә қайтидин изаһат берип 'рабийә қадирға виза беришни һөкүмәт тосуп қойған иди, гәрчә бейҗиң һазир рабийә қадирни 5 ‏- июл күни үрүмчидә вәқә пәйда қилип 200 адәмниң өлүп кетишигә сәвәбчи болди, дәп әйибләп келиватсиму, әмма биз рабийә қадирни террорчи дәп атимаймиз' дәп җакарлиди.

'Тәйвәндә һәммә адәм рабийә қадирни яхши көриду'

Тәйбей шәһириниң аһалилиридин яң фамилилик бир ханим бүгүн кәч саәт 3тә (тәйвән вақти әтигән саәт 3 тә) телефон зияритимизни қобул қилип 'муһәббәтниң 10 шәрти' дегән филим һәққидики тәсиратини сөзләп бәрди.

-- Мән тәйвәндә бундақ алқишқа еришкән, шәһәрдиму, йезидиму һәр мәйданда 5 миң адәм көридиған бундақ кино филимини көрүп бақмиған идим, -- дәйду бу ханим, -- тәйвәндә һазир һәммә адәм бу филмдики һәм рәһбәр, һәм ана, һәм аилә айилидин ибарәт бу образниң растчиллиқини яқтуруп қалди, һазир һәммә адәм рабийә қадирниң өзини көрүшни арзу қилиду.

'Һазир дуняда пикри техичә қалақ һаләттә туруватқан гоминдаңдин башқа йәнә, чоң қуруқлуқтики коммунист партийә қалди'

Америкиниң шималий каролина шитатида туруватқан мустәқил язғучи доктор җу шөюән чоң қуруқлуқтики коммунист партийә билән тәйвәндики гомндаңниң мунасивити һәққидә бүгүн елан қилған обзорида 'һазир дуняда пикри техичә қалақ һаләттә туруватқан гоминдаңдин башқа йәнә, чоң қуруқлуқтики коммунист партийә қалди. Әйни вақитта бир - бирини дүшмән дәп қирған бу икки партийә һазир дуняда мислисиз дәриҗидә йетим қелип, улар һазир йәнә хитай милләтчилики җәһәттики охшашлиқта бирлишип, өз - ара ака - ука дейишкә мәҗбур болди' дәп көрсәтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт