Rabiye xanim perzentliri hökümet teripidin teyyarlan'ghan eyibnamige qol qoydurulghan

• Muxbirimiz qanatning bu heqtiki melumati
• Download story audio

Qahar abduréhim

Igilishimizche, peyshenbe küni etigen sa'et 8 de bashlan'ghan sot chüsh waqti sa'et 12 giche 4 sa'et dawamlashqan bolup, yéqin uruq-tughqanlardin peqet 4 kishining yeni qahar abduréhimning ayali aygül we alim abduréhimning ayali rahile shundaqla rabiye xanimning bir newre inisi we küy'oghlining qatnishishigha ruxset qilghan hemde sirttin, eqide soda saryidin jilil haji we ötkür haji qatarliq ikki kishini qatnashturghan. Sotqa hökümet we saqchilardin bolup 20 etrapida adem qatnashqan.

Yéngidin peyda bolghan deliller

Sot tengritagh rayonluq sot mehkimiside échilghan bolup, sot échilidighanliqi toghrisdiki uqturush qahar we alim abduréhimlarning a'ilisige emes, rabiye qadir soda sariyining amanliq saqlash bölümining bashliqigha tapshurulghan. Qahar we alim abduréhimlarning a'ilisi sottin aghzaki xewerdar qilin'ghan.

Peyshenbe küni échilghan sottin xewerdar bezi kishilerning bildürüshiche, ten salametliki hemde rohi keypiyatliri yaxshi körün'gen qahar we alim abduréhim sotchining so'allirigha salmaqliq bilen jawab bergen.

Sotchi qahar abduréhmni anisi rabiye qadir xanimdin pul élip aqsudiki tijaritige ishletken dep eyibligen bolup, rabiye xanimning sabiq katibi ayshemgül we sabiq tijaret shériki memet shangxey dégen kishi, qahar abduréhimning rabiye xanimdin pul élip ishletkenliki heqqide sotta guwahliqtin ötken. Sotchi qahar abduréhim anisi rabiye qadir xanimdin pul élip ishletkende, oghrilan'ghan pul 2 milyon 400 ming yü'en bolghanliqi üchün bu pulning qaharning boynigha atilidighanliqini bildürgen.

Igilishlerge qarighanda, rabiye qadir soda sariyigha ot ketken mezgilde köyüp ketken we qahar abduréhimning anisi rabiye qadir xanimdin pul élip ishletken mezgillerdiki tijaret pa'aliyitige a'it höjjet we tamghilar qandaqtur yéngidin yasap chiqilghan bolup, sotta qahar abduréhim qol qoyghan we tamghisi bésilghan höjjetler delil süpitide körsitilgen.

Rabiye xanim: xitay da'irilirining qayta tekshürüshini ümid qilimen

Alim abduréhim

Sottin xewerdar bezi kishilerdin igilishimizche, rabiye xanimning tijaret pa'aliyitige a'it pütün höjjetler xitay saqchi idarisi teripidin musadire qilin'ghanliqi üchün, qahar abduréhim bu eyibleshlerge, apam rabiye qadirdin pul alghanliqim toghra, lékin baj oghrilighanliq we dukan élip‏ - satqan mesililerdin méning xewirim yoq depla jawab bergen. Lékin shundaqtimu sotta 2 milyon 400 ming yü'en pul qaharning boynigha artilghan.

Sotta, xitay hökümiti teripidin baj oghrilighan dep eyiblen'gen Uyghur kishilik hoquq we démokratiye herikitining yétekchisi rabiye xanimning yene bir oghli alim abduréhimning üstige 240 ming yü'en pul artilghan.

Rabiye qadir xanim bügün radi'omizgha bergen bayanatida "béyjing hökümiti men amérikigha kélip Uyghur kishilik hoquqi üchün pa'aliyetni bashlighandin kéyin, mini 50 milyon yü'en baj oghrilighan dep eyibligen idi. Emdi tekshürüsh arqiliq 2 milyon 400 ming yün baj oghrilighanliqimni bildürmekte. Men xitay hökümitining yene tekshürüsh élip bérip, balam qahar abduréhim bilen héchqandaq munasiwiti bolmighan bu 2 milyon 400 ming yü'enni uning üstidin élip tashlishini ümid qilimen" dédi.

Igilishimizche, alim abduréhim sotta otturigha qoyulghan eyibleshlerge, pütün höjjetler saqchilar teripidin élip kétilgenliki üchün bizning qolimizda héchqandaq pakit yoq. Sotta otturigha qoyulghan eyibleshler 20, 30 yil burunqi hésabat bolghachqa, buninggha néme dep jawab bérishni akam qaharmu bilmeydu, menmu bilmeymen dep, jawab bergen.

Sotning axirida, qahar abduréhim we alim abduréhim eyibnamige qol qoydurulghan. (Qanat)